Read wanga MIKA 4 Bible Online

MIKA 4 - wanga bible

MIKA 4

¹Tsinyanga tsitsanga olwa eshikulu shieihekalu yombakhwakhwo shiakhabe ikulu muno okhushila ebindi biosi, shiakhachinguushe ikulu muno okhushila ebindi biosi. Abandu abanji bakhatsie aha shili.

²Abamahanga abanji bakhatsieho nibaboola bari, “Chenda khutikulushe khushikulu shia OMWAMI Nyasaye, khutsie munzu ya Nyasaye wa Yakobo. Khutsie akhwechesie tsinjilatsie, nefu khuloonde mutsinjilatsie. Okhuba amechesio kalarula mwitookho lia Zayuni, nalio likhuwa lia OMWAMI Nyasaye lilarula mwitookho lia Yerusalemu.”

³Nyasaye yakhamale obusoolo hakari wamahanga amanji, yakhakhalache eshiina shiamahanga kamaani akali ehale. Amahanga ako kakheraanye tsinganga tsiabwe okhuba tsimbako, nako amafumo kabwe okhuba emiholo. Lihanga shiliakhabuusiekhwo lihe nelihanga lindi ta, kata okhwirechekhakhwo khulwa okhulwana tawe.

⁴Buli mundu yakhamenye mumulembe, nali mumukundakwe kwemitsabibu, nende okwemikhuyu, shialiho owakhabarisiekhwo tawe. Okhuba OMWAMI Nyasaye mwene mahe amalile okhuboola.

⁵Amahanga kandi kaloondanga amalako kabwe abeene, nende okhwinamila abanyasaye babwe abeene. Nebutswa ifwe khuloondanga tsinjila tsiefwe, nende okhwinamila OMWAMI Nyasaye, Nyasaye wefwe khulwa inziayo.

⁶OMWAMI Nyasaye aboola ari, “Khunyanga eyo ndakhakhung'asie abalema, nimbunjelesia abayilwa mubuhambe, nende abandahelesia eshinyasio.

⁷Abalema abo nibo abalitong'a; nibaliho mwoyo, abayilwa mubuhambe nibo abakhekhole lihanga likhongo. Isie OMWAMI Nyasaye ndakhabaruche khushikulu shia Zayuni, okhurula ebise ebio khulwa inziayo.”

⁸Nawe eshikulu shia Yerusalemu, iwe olwanda lwa Zayuni, olwanda lwa Nyasaye aliindilangakhwo obulayi abandube, shinga olwa omwayi aliindanga amakondike, iwe nobe khandi litookho likhongo shinga olwa walinji khale, Yeresalemu nalibe khandi litookho likhongo eliomuruchi.

⁹Kho mbushiina mulilanga obutinyu? Mubula omuruchi noho? Omuchetsiyi wenywe afwile noho? Mbushiina nimukhupanga tsimbungu tsiobutsunwi, shinga omukhasi oulumwa inzibula?

¹⁰Inywe abandu ba Zayuni, mukhupe tsimbungu nimukalakala hasi, shinga omukhasi oulumwa inzibula. Okhuba bulano mwitsa okhurula mwitookho lino, mulatsia okhumenya mushitsiimi. Mulatsia Babuloni. Nebutswa nimuli ebweneyo, OMWAMI Nyasaye alamuhonia, alamununula okhurula mumakhono kabasuku benywe.

¹¹Amahanga amanji kekhung'asiye okhumuseera. Keboolela akeene kari, “Lekha litookho liabwe lia Yerusalemu lifwolwe, khuliluutsi nilisasiishe.”

¹²Nebutswa shibamanyile aka OMWAMI Nyasaye apaaranga ta, khandi shibamanyilekhwo aka aloosiye mbu, ababunjelesiye halala shinga ebinywa biokhuhuulwa tawe.

¹³OMWAMI Nyasaye aboola ari, “Inywe abandu ba Zayuni, buushe museere abasuku benywe. Ndalamuhelesia amaani shinga aka imbongo eyetsinzika tsieshibia khandi aka eyo eyatsimbakayu etsiomukasa. Mulasaasaka abandu abamahanga amanji, ebia bayaaya mulabihaana khwisie, nachio emiandu chiabwe mulambelesia isie Omwami oweshialo shiosi.”