Read wanga MIKA 5 Bible Online

MIKA 5 - wanga bible

MIKA 5

¹OMWAMI Nyasaye aboola ari, “Iwe Betselehemu, elili mu Efuratsa, bulano obotokhaanwe nelisiisi, abasukubo bakhufumbiile naye omwimilisi wa Isiraeli akhupungwa khuluseya nolusaala.”

²OMWAMI Nyasaye aboola ari, “Iwe Betselehemu, ouli mu Efuratsa, oli elala khumataala amatiiti akali mu Yuda, nebutswa omuruchi alarula mwiwe, oularuka Isiraeli mushilenje shianje, lihanga elialiho okhurula khale.”

³Nyasaye yakhaleshe abandube okhuula olwa omukhasi owakhabe nalumungwa yakhebule. Mana nilwo olwa abaana babwe abasikala bakhakalushe khubandu babwe ba Isiraeli.

⁴Omuruchi oyo yakhemilile nalinda abandube, shinga olwa omwayi alindanga ebiayobie mumaani ka OMWAMI Nyasaye, khandi mubunyali bwa OMWAMI Nyasayewe. Abandube bakhamenye mumulembe, okhuba yakhabe omukhongo okhuula khutsindulo tsieshialo.

⁵Niye owakhareere omulembe. Olwa abandu ba Asiria baliseera eshialo shiefwe, khandi nibafunaka tsingoba tsiefwe, nilwo olwa khuliruma abalindi befwe musafu okhulwana ninabo, nende abemilisi befwe munane.

⁶Bakhahule nibaruka eshialo shia Asiria khulwobunyali bwebimanulwa biabwe, khandi netsinganga tsiabwe baliseera eshialo shia Nimurodi. Mana olwa omuruchi oyo yakhetse, alikhuhonokosia okhurula Asiria.

⁷Obolwibulo lwa Yakobo abakhasikale bakhabe mutsimbia tsiabandu shinga liime elirula khu OMWAMI Nyasaye, khandi bakhabe shinga ifula eyikwa khubunyasi, eyilashindanga okhukwa khulwa abandu noho okhuliindilila omundu tawe.

⁸Abolwibulo lwa Yakobo abakhasikale, bakhabe mumahanga amanji nende mutsimbia etsiabandu shinga italanyi mutsisolo nabulimo, khandi bakhabe shinga italanyi imbuukha mubiayo biamakondi. Buli habundu aha yibira, yikwitsanga khubioluyitsi biayo nende okhubirandula, obulaho omundu yesi owokhubihonokosia tawe.

⁹Nolwa abandu ba Isiraeli bakhahule abasuku babwe, nende okhubamulula pe bario.

¹⁰OMWAMI Nyasaye aboola ari, “Mubise ebio, ndakharusieho tsifarasi tsienywe, nende okhusasia amakaari kenywe akelihe.

¹¹Ndakhasasie amatookho keshialo shienywe, nende okhulikulula tsingoba tsienywe.

¹²Ndakharusieho ebikhole bienywe ebiobulosi, khandi shimwakhabekhwo nende abafumu tawe.

¹³Ndakhasasie ebifwanani bienywe, nende tsisiilo tsienywe tsinzienukhu, nenyu shimwakhatsiililile okhwinamila ebifwanani biabeene mwakaasia tawe.

¹⁴Ndakhasiule ebifwanani biomunyasaye Ashera okhurula mwinywe, nende okhumulula amatookho kenywe.

¹⁵Muburuma bwanje obululu, ndakhamale eshikwoli khumahanga koosi akalambulilanga tawe.”