Read wanga MIKA 6 Bible Online

MIKA 6 - wanga bible

MIKA 6

¹Hulile, OMWAMI Nyasaye aboola ari, “Sinjile, muboole amakhuwa akomuse kwenywe imbeli webikulu, leshe tsingulu tsihulile aka muboolanga.”

²Inywe ebikulu, hulile ebieshiina shia OMWAMI Nyasaye, inywe emise chieinziayo chieshialo, hulile, okhuba OMWAMI Nyasaye ali nende eshiina khubandube, ye yetsa okhuyaala Isiraeli.

³OMWAMI Nyasaye aboola ari, “Inywe abandu banje, eshiandamukholeele nishiina? Ndamuchoonyiye nende shi? Mungalusie!

⁴Isie ndamuyinia mushialo shia Misiri, nimununula okhurula mubuhambe. Ndaruma Musa nende Haroni nende Miriamu okhumwimilila inywe.

⁵Inywe abandu banje, mwitsulile akomuruchi Balaki wa Moabu yali narecheeshe okhukholela inywe, nende shinga olwa Balaamu omusiani wa Beori yamukalusia. Mwitsulile amakhuwa kekholekha khunjila okhurula Shitimu okhuula Giligali. Mwitsulile kano mana mumanyilisie ebikhole bianje ebiokhumuhonia.”

⁶Nishiina eshia ndakhatsia ninashio imbeli wa OMWAMI Nyasaye, khulwa okhumwinamila? Nekhatsie imbeliwe nendi nemisango emisambe, noho nekhatsie nebimoosi ebiomuyika mulala noho?

⁷Kho OMWAMI Nyasaye yakhasaangaala nimumuhaanila amamiiku ebikhumila noho emiyembo chiamafura ebikhumila amakhumi noho? Nekhamuhaanile omwana wanje omwikulanda khulwa obwonooni bwanje, tooto omwana wandebula khulwa obwonooni bwanje noho?

⁸Iwe ouli omundu namundu, Nyasaye yakhumanyia akali amalayi, aka OMWAMI Nyasaye yenyanga okhurula khwiwe ngakano mbu: okhole aka habwene, ololesie obuheeli oburalilu nende okhumenya mukhwituutuyia imbeli wa Nyasayewo.

⁹OMWAMI Nyasaye alanjisia khwitookho, ne nelikhuwa eliobuchesi okhuria ye. Aboola ari, “Hulile, inywe abandu ba Yuda. Hulile, inywe abebunjikha mwitookho!

¹⁰Isie ndakhanyala okhwibilila obwonooni, obwabiikhwa munzu yabamayanu, nende tsiratili tsiobubeeyi tsiikhoonyelungwa, elili likhuwa lieshisinyo noho?

¹¹Isie ndakhaboola mbu, abandu abekhoonyelanga tsiratili etsiobubeeyi babula eshikha, nende amachina aketsiratili akalali aka habwene ta noho?

¹²Abayinda bali mumatookho betsulamwo amahababa, nabo abamenyamwo baboolanga akobubeeyi, buli elia baboola neliobubeeyi.

¹³Khulweshio, emalile okhuchaaka okhumukhupa, nemumulula khulwa obwonooni bwenywe.

¹⁴Mulalia nebutswa shimulekura ta, inzala yilameeta okhumuluma. Mulachinga ebindu, nebutswa shimulabiikha ta, ne shiosi eshia mulabiikha, shilasasibwa mwihe.

¹⁵Mularaaka, nebutswa shimulachesa ta, mulatiinya amafura okhurula khumiseituni, nebutswa shimulekhoonyelakhwo amafura tsana ako tawe. Mulatiinya emitsabibu, nebutswa shimulanywakhwo idivai tsana tawe.

¹⁶Kano kalekholekha okhuba, mulondanga amalako akomuruchi Omuri, nende tsinjila tsiabolwibulo lwomuruchi Ahabu, khandi mulondanga amebaalo kabwe. Khulweshio, ndalamureerera inywe obumululwi, ne buli mundu alamuchaaya inywe. Abandu boosi abamulola balamunyekanga.”