Read wanga MIKA 7 Bible Online

MIKA 7 - wanga bible

MIKA 7

¹Endi mushilaamo shiobubi! Isie endi shinga omundu ounyoola nibamalile okhufuna ebiamo biosi pe, khandi nibamalile okhunoka emitsabibu chiosi pe, shibulaho eshisakanya eshiemitsabibu kata shilala eshienyala okhulia, noho emikhuyu chieshirongole echiomwoyo kwakhenya tawe.

²Abulaho omundu yesi yesi ousikale khushialo ouriitsanga Nyasaye, kata abulaho omundu yesi yesi omulunjishi mubandu tawe. Buli mundu akoneshelanga okhuraatsia eshitsayi, khandi ayiimanga owashie nolurimba.

³Boosi nabasitsa abokhukhola amabi, abemilisi nende abakhalachi beshiina bareebanga okhuhebwa eshiomufusi. Abali nobunyali baboolanga akemioyo chiabwe chienya, mana balola mbu kakholwa.

⁴Ouli omulayi muno khubo ali shinga lirakalu, naye ouli omukololofu ali shinga olukaka lwamahwa. Inyanga yeshinyasio shiabwe eyaliindililungwa yimalile okhuula. Ne bulano bali mukhukoyaana.

⁵Shiolasuubilanga owashio, kata shioleesiikanga omwitsawo yesi yesi tawe. Ohenjenje aka aboola, kata khumukhasiwo mwene.

⁶Okhuba omusiani afwolanga samwana, naye omwana omukhaana afukulanga nyinamwana, omukhasi womwana asoolananga nende nyakhufialanyene weshikhasi. Abasuku bomundu nabeinzuye beene.

⁷Nebutswa isie ndalahenga khu OMWAMI Nyasaye, ndalaliindilila Nyasaye ouli omuhonia wanje. Nyasaye wanje alambulila.

⁸Iwe omusuku wanje, shiolasaangaalila amatinyu kanje ta, kata ningwa ndalabuukha, kata nindikhala mushiilima, OMWAMI Nyasaye alaba obulafu bwanje.

⁹Okhuba ndonoonela OMWAMI Nyasaye, ndalefwila lirumalie lilulu, okhuula olwa alandeerera nende okhuukhalachiila aka habwene. Alandeera elwanyi mubulafu nasi ndalalola obuhoniabwe.

¹⁰Mana omusuku wanje alalola ako, naye alafwimbwa omurwe, okhuba yamboolela ari, “OMWAMI Nyasayewo ali hena.” Isie omwene ndalamulola nakwa, alasenachilwa hasi shinga amatoyi akokhunjila.

¹¹Inyanga yitsanga olwa amasiisi kamatookho kenywe kalombakhwa obuyia, khunyanga eyo, olwakho lweshialo shienywe lulabanguulwa.

¹²Khunyanga eyo, abandu benywe balamukalushila, okhurula Asiria okhuula mutsingongo tsia Misiri, khandi okhurula Misiri okhuula khumwalo kwa Yufurate, okhurula tsimbeka tsieinyanza nende tsimbeka etsiebikulu.

¹³Nebutswa eshialo shindi shiosi shilaba eshitsiimi, khulwa obwonooni bwabandu abamenyamwo.

¹⁴Iwe Nyasaye, obe omwayi wabandubo neindabushiyo, abandu aba iwe omwene waahula abamenya bonyene mumutsuru, ne babotokhanwa nemikunda eminulu. Obaaye shinga olwa wakhola khale, mubiayilo bia Bashani nende Giliadi.

¹⁵Iwe Nyasaye, okhukholele akamakana, shinga olwa wakhola mutsinyanga tsia wakhuyinia mushialo shia Misiri.

¹⁶Olwa abandu bamahanga kandi balalola kano, balaba nobuhendi kata nibali namaani amanji. Balara amakhono kabwe khuminwa nibekala amarwi kabwe.

¹⁷Balamoola mulufu shinga tsinzokha, balamoola shinga ebilonje bimoolanga. Balarula mutsingoba tsiabwe, nibatechelanga khulwa oburi. Balakhushiukhanila iwe OMWAMI Nyasaye noburi.

¹⁸Iwe Nyasaye, niwiina ouli shinga iwe, ouleshelanga abandu obwonooni? Iwe oleshelanga obwonooni bwabandubo abasikala. Shiobiikhanga oburuma khulwa inziayo ta, okhuba osaangaalilanga okhukhumanyia obuheelibwo oburalilu.

¹⁹Olakhubeela tsimbabasi khandi, olasenachila obwonooni bwefwe hasi mubilenjebio, nobufuuba hasi mulusuba lweinyanza.

²⁰Olamanyia obusubilibwo khubolwibulo lwa Yakobo, nende obuheelibwo oburalilu khubolwibulo lwa Aburahamu, shinga olwa wetsubila abakuuka befwe okhurula mutsinyanga tsiakhale.