Read wanga NAHUMU 1 Bible Online

NAHUMU 1 - wanga bible

NAHUMU 1

¹Obukhalachi bwa Nyasaye khwitookho lia Nineve. Eshitabu shiamalolelo akomulakusi Nahumu, owokhurula Elikoshi.

²Nyasaye ounyala biosi ni Nyasaye oweimbalikha khandi owokhurunjia eshikwoli. Nyasaye ounyala biosi arunjinjia eshikwoli, khandi noweliruma. Nyasaye ounyala biosi arunjinjia eshikwoli khubasukube, namalila lirumalie khubasukube.

³Nyasaye ounyala biosi shiatilungwa noburuma bwangu ta, nebutswa ali nobunyali obunji. Shialekhanga okhuhaana eshinyasio khubakholi bobumayanu tawe. Aha achendanga, imbumbuyeka yihutsa, amaleesi nolufu lwebilenjebie bituumuulanga.

⁴Alakanga inyanza okhukhama, nayo ikhama. Akhaminjia emialo chiosi pe. Emikunda chieshialo shia Bashani nende eshikulu shia Karimeli biumanga, nabio ebimuli bia Lebanoni biniala.

⁵Ebikulu bireenganga imbeli wa OMWAMI Nyasaye, natsio tsingulu tsikhamulukha. Liloba lirenganga olwa alolekha, eshialo nashio shitechela halala nende abandu abalimwo boosi.

⁶Niwiina ounyala okhuhonokokha khuburima bwa Nyasaye ounyala biosi? Niwiina ounyala okhuhonokokha olwa aba nasinyishe? Ye atsukhanga oburumabwe obwakhanga shinga omulilo, kata yarakanga tsinyanda.

⁷Nyasaye ounyala biosi nomulayi, nolukoba mutsinyanga tsiamanyakhano, alindanga abandube abamwisiikanga.

⁸Amululanga abasukube bosi, shinga omukhula omukhongo kwamatsi. Yeranga yabo bosi abamufukulanga.

⁹Inywe abandu ba Nineve! Nishiina eshia muloosinjia okhukholela Nyasaye ounyala biosi? Alamwira inywe. Abulaho oukalushilanga okhumufukula.

¹⁰Shinga amahwa akabohana, khandi shinga amakata kooma, namusambe inywe mwesi pe.

¹¹Okhurula mwiwe litookho lia Nineve, arulilemwo omundu ourechekhanga amabi oulosinjia akobumayamu.

¹²Nyasaye ounyala biosi aboolela abandube ari, “Kata nikali mbu abandu ba Asiria nabanji khandi abamani, balerwa mana babuleho. Inywe abandu banje, kata nikali mbu ndamusandia, shinemusandie khandi ta.

¹³Bulano ndalakamia obunyali bwa Asiria khwinywe nekhalaka eminyololo echiamuboha halala.”

¹⁴Yalaka abandu ba Asiria amakhuwa kano mbu, “Shimwakhabekhwo nende abetsukhulu abakhachile eliira lienywe liatsiililila okhulangwa ta. Nindonoonie ebifwanani bienywe ebiamwakaasia nimura mutsinzu tsiabanyasaye benywe. Isie ndalamuyabila ebilindwa bienywe, okhuba shimukhoya eshindu shiosi ta.”

¹⁵Inywe abandu ba Yuda henje, omurumwa yetsanga okhurula khubikulu nareera amakhuwa amalayi. Omurumwa oulandinjia akomulembe. Inywe abandu ba Yuda, mwisangasie mumasabo kenywe, nimukhola ebiamwetsuba okhukhola okhuba abamayanu shinibaseerekhwo liloba lienywe ta. Bamalile okhumululwa pe!