Read wanga NAHUMU 2 Bible Online

NAHUMU 2 - wanga bible

NAHUMU 2

¹Iwe Nineve! Omusuku wokhukaasia yetsanga okhukhuseera! Linda olukoba olwakhusira! Ra abalindi khumihanda! Wirecheshe okhulwana! Bunjeresia amaaniko koosi!

²(Nyasaye ounyala biosi akalusilia inzu ya Yakobo oluyalilwe, Toto akalusilia abandu ba Isiraeli oluyali lwabwe, kata nikali mbu abasuku babwe shibabaleshelakhwo eshindu shiosi ta, basasia okhurula khumisaala chiabwe chiemitsahabu)

³Ebikhumba ebia abasukube biakhaanye. Abalwanibe bafwalile ebifwalo ebiakhanyu. Amakaari ketsifarasi tsiabwe kamwesukha shinga omulilo, kanzilwe khulwa okhwirecheshela okhuseera natsio tsifarasi tsiabwe tsisola nitsienya okhuseera.

⁴Amakaari kelihe kelukhana khumihanda nikatsia imbeli khandi nikakalukha inyuma welitookho, kakha shinga tsinzese tsiomulilo, nikabira bwangu shinga tsimbenu.

⁵Abelihe abakhongo balangwa betse okhulwana besicherala nibetsa. Batsia tsimbilo khulukoba, nibasinjisia ebikhumba khulwa okhwishinga.

⁶Emishingachi chiomwalo chirabukha, litookho litiilwa neindenga.

⁷Lilako limalile okhurula mbu litookho lia Nineve liyilwe mubuhambe. Abasumba balio beshikhasi batiilwa, bekhuula shinga amahusi, nibekhupa khubilifu.

⁸Litookho lia Nineve lili shinga litiba liamaatsi kalio kabira nikatsia. Abelihe balanjilisia mbu, “Sinjile! Sinjile.” Nebutswa abulaho oukhupanga lishemo.

⁹“Yaaye ifetsa! Yaaye itsahabu! Litookho litsulemo itsahabu.”

¹⁰Nineve lisasiibwe, likwile likunda, limuluulwe. Abandu bafwile emioyo, khandi batiililwe neindenga. Bahwele amaani, mumoni musamushile.

¹¹Lili hena litookho eliabelenje shinga eshimenyo shietsitalanyi! Habundu aha tsitalanyi tsimbuukha tsialisibungwe? Aha tsitalanyi tsiatsilenje ne abaana batsio babaho mumulembe?

¹²Italanyi isaatsa yirire eshioluyitsi shiayo, ishirandulanga mubitonye niyikabila abaana bayo nende eyeshikhasi yayo. Yitsusiye tsimbinga tsiayo nende eshioluyitsi, eshimenyo shiayo shitsuulemwo ebitonye bieinyama.

¹³Lola! Isie OMWAMI Nyasaye omwene mahe ndalalwana ninawe. Ndalasamba amakaariko aketsifarasi. Ndaleera abalwani benywe khulwa olukanga. Ndalabukula bulishindu eshia mwanuula abashienywe. Omwoyo okwabarume benywe shikulahulikhanakhwo khandi ta.