Read wanga NAHUMU 3 Bible Online

NAHUMU 3 - wanga bible

NAHUMU 3

¹Olimushilaamo shiobubi iwe litookho eliobwiri elietsulamwo obukaati nende obunuuli, okhuyaaya khwemiandu khubula eshiakamo.

²Hulila! Okhwatulukha khwemisharati, okhukukuma khwemigurudumu okhwilukha khwetsifarasi, obuyoka bwamakaari akobulwani.

³Abalwani abokhutsifarasi baseera tsinganga tsiabwe tsiakha, nako amafumo kang'inang'ina! Emilambo chibunjiikhwe eshituuli eshikhongo, emilambo echilanyala okhubalwa ta, abandu besichirala khuchio.

⁴Nineve! Oli shinga omutamba ouhelesibungwa eshinyasio. Oli welikondo lilayi nende obulosi bwokhwira. Wakatia amahanga nokayila mubuhambe khulwa obutambabwo, nende abandu bamahanga khulwa obulosibwo.

⁵Isie OMWAMI Nyasaye omwene mahe emboola mbu, ndalakhuhelesia eshinyasio iwe Nineve! Ndalakhufwalula tsingubo osikale eshieechenye mana endeshe amahanga kalole eshihechenye shishio.

⁶Ndalakhubakha eshifwabwi, nekhukholela akeshifwolo, abandu balakhuhenganga nibakhuchaya.

⁷Yabo bosi abalakhuhengangakhwo balakhwilukha. Balaboola mbu, “Nineve omuluulwe! Niwiina oulakhulemia omwoyo.”

⁸Iwe Nineve, oshila litookho lia Tsebezi, eliali niliombakhwa khuluchinga lwomwalo kwa Naili noho? Omwalo kwa Naili kwali shinga olukoba lwalio, amaatsi nako omushingachi kwalio.

⁹Tsebezi liesikanga Etsiopia nende Misiri obunyali bwalio shibwalikhwo nende eshiakamo ta. Abandu beshialo shia Puti nende Libia batilana obwitsa ninalio.

¹⁰Kata kario, abandu ba Tsebezi batiilwa nibayilwa mubuhambe. Abaana babwe bakhupungwa okhuula okhufwa olwa banyoolungwa habundu hosi khumihanda. Abandu babwe abolunyaali babohwa neminyololo nibayilwa mubuhambe. Abandu babatiila babakhupila ikha shinga abasumba.

¹¹Nawe khandi Nineve wakhameere, noutumana. Wakhateeme okhwilukha okhurula khubasuku nende okhwitsa okhurula khubo.

¹²Tsingoba tsitsio tsili shinga emisaala chiemikhuyu, echia ebiamo biachio biambeli bienjele. Olwa emisaala tsana chisunguswa, ebiamo bikwitsanga hasi ebilibwa habwene nahabwene yaho.

¹³Henga abelihebo abalwani, bali noburi shinga abakhasi. Eshialoshio shibula eshishinga khubasuku bo. Omulilo kusambile emishingachi chiebilibwa biosi pe.

¹⁴Inywe abandu ba Nineve, tahe amaatsi khulwa okhwirecheshela okhuseewa nabasuku. Sinjisie tsingoba tsienywe tsitinye tatata. Swale litohi khulwa okhukaasia amatifwari mana murecheshe eshisambilo shiamatifwari.

¹⁵Nebutswa kata nimukhola murie, mulamululwa nomulilo, noho okhwirwa mwihe. Mulamululwa pe shinga olwa tsisiche tsilitsanga ebirache biosi. Mwebulana mana nimumeteekha shinga tsisiche.

¹⁶Mwali mwekhola abanji shinga tsing'ining'ini tsiomwikulu. Nebutswa bulano shibaliho tawe, bafwana shinga tsisiche etsiabambule amabaha mana nitsipulukha.

¹⁷Abemilisi benywe bafwana shinga omusinga kwetsisiche okuyeelile khwisisi khunyanga eyomunyiri. Olwa eliuba libalanga, tsipulukha nitsitsia ne shialiho oumanyilisinjia aha tsitsiile tawe.

¹⁸Iwe omuruchi wa Asiria, abakhulundubo bafwile nabo abandubo aboluyali bakona tsindolo tsieinziayo. Abandubo basalaanile mubikulu, ne abulaho ounyala okhubakalusia halala tawe.

¹⁹Omusaala kwokhusilikha obusaalilibwo shikuliho tawe, kata amafumireko shikanyala okhusilikhwa mana kahone ta. Yabo bosi abahulilakhwo amakhuwa kakhwikholeeshekhwo basaangaala nibakhupa amakhofi. Mana yakhabakhwoho owahonokokha okhurula bwo obululu obweinziayo?