Read wanga HABAKUKU 1 Bible Online

HABAKUKU 1 - wanga bible

HABAKUKU 1

¹Oburumbusi bwa OMWAMI Nyasaye bwomulakusi Habakuku yalola.

²“Iwe OMWAMI Nyasaye, ndalakhuhaabila okhuula liina, norambulilisinjia kata okhumbabina ta? Mbushiina ehabanga nemboola endi, ‘Amahababa,’ nawe shiuhonokosinjia ta?

³Mbushiina umanyisinjia obumayanu, nende okhuukhola okhulola amasila? Obusasishi nende amahababa bibuushile, obusoolo nende obuyingani bibuushile.

⁴Kho amalako kabula amaani, nabwo obukhalachi bwahabwene shibukholungwa tawe. Abamayanu babotokhaane abalunjishi, ne obukhalachi bwahabwene bukholungwa nibushiamiibwe.”

⁵Mana OMWAMI Nyasaye namukalusiamwo naboola ari, “Henga khumahanga mana olole! Shiolesundukha ta, khandi shiolahuka tawe. Okhuba ndalakhola eshikhole noshiliho mwoyo, eshikhole shiolanyala okhusuubila noba noboolelwa nomundu undi tawe.

⁶Okhuba embuusinjia Abababuloni, lihanga lilulu khandi elieliruma libi elo! Lihanga elibiranga khushialo shiosi, nilibukula ebimenyo biabandu bandi ebilali ebialio tawe.

⁷Abo nabandu bokhuriisia khandi abokhutechesia, abeene bekhalachilanga akokhukhola nende okhwiruka namalako kabwe abeene.

⁸Tsifarasi tsiabwe etsia lihe netsia tsimbilo okhushila tsingwe. Tsiilukhanga tsimbilo okhushila ebisuutse ebili inzala. Tsifarasi tsiabwe tsitsa namaani. Abokhulwanila khutsifarasi etsio barula ehale, betsa bwangu shinga indutsu eyitsa okhukwa khushiminywi.

⁹Boosi betsanga khulwa amahababa, betsa nibakhuuniye mumooni mwabwe, babunjelesia ababohe abanji shinga omuyeshe.

¹⁰Batseshelela abaruchi, nende okhulechelesia abaami. Balechelesinjia buli olukoba, bebunjishilanga liloba nibalibukula.

¹¹Beyuula nibahuutsa shinga omuyeka, bakholanga obumayanu niberaakhwo eshikha, amaani kabwe niye omunyasaye wabwe.”

¹²Iwe shioli niwe OMWAMI Nyasaye okhurula khale nakhale noho? Shioli niwe Nyasaye wanje, Omutakatifu wanje, Oubetsangaho mwoyo noho? Iwe wamalile okhwahula Abababuloni mbu bakhukhalachile ifwe eshiina. Iwe ouli Olwanda, wabaralisiye kho mbu, bakhuhelesie ifwe eshinyasio!

¹³Iwe oli omutakatifu muno, shionyala okhufuchilila okhulola obumayanu ta, khandi shionyala okhwifwila okhulola amabi tawe. Kho mbushiina ololanga nibakhola obumayanu, ne noholeela butswa tsi? Mbushiina oholeelanga butswa tsi, olwa abamayanu basishia abo abali abalunjishi okhubashila?

¹⁴Wakholile abandu okhuba shinga tsinyeni tsiomunyanza, noho okhuba shinga ebilonje ebimoolanga, ebibula omuruchi!

¹⁵Abababuloni balobanga abandu shinga abaloba tsinyeni, babakhwesanga nibabareera elwanyi netsikhanda tsiabwe, bababunjelesinjia boosi mulukhanda lwabwe, khandi bekhoyanga nibasaangaala.

¹⁶Kho Abababuloni abo bakholanga emisango khutsikhanda etsio, nibasambilakhwo obubane, okhuba tsikhanda etsio tsibanyalilanga okhumenya obulamu bweshifwabi, nende okhulia ebiokhulia ebilayi.

¹⁷Kho balatsiililila butswa okhwikhoonyela tsinganga tsiabwe etsio inziayo noho? Balatsiililila butswa okhutiila abandu, nende okhumulula amahanga nibalakabeelelelakhwo ta noho?