Read wanga HABAKUKU 2 Bible Online

HABAKUKU 2 - wanga bible

HABAKUKU 2

¹Isie ndalasinjila habundu ahokhuhenjelela, ndalekhala khumunara hekulu, ndalaliindilila meeso okhulola mbu, yamboolela shiina, okhulola mbu, yangalusiamwo shiina mu akokhwiyiniakana khwanje.

²Mana OMWAMI Nyasaye omwene mahe nakalusia Habakuku naboola ari, “Handika lilolelo lino, lihandiche habulafu khulubao, kho mbu omundu yesi yesi oubiraho anyale okhulisooma.

³Lilolelo lino lileetsa khubise bialio ebikhoyeele, khandi liboolanga akobwatoto khumakhuwa akeinduukho. Niliba nilishiinda okhuula, oliliindilile, toto mwene lileetsa, shililachweya tawe.

⁴Ne eliatsana ndielino mbu, ‘Lola abemirwe emiumu abo balasasibwa, nebutswa abalunjishi balabaho mwoyo shichila besikanga Nyasaye.’ ”

⁵Idivai yikaatinjia, naye omwichinjimisi shialatsiililila okhubaho mwoyo tawe. Yerecheeshe okhumila abandi shinga emakombe, ali shinga oluumbe olulekuranga tawe. Yekhung'asilinjia omwene amahanga koosi, mana atiila abandu boosi okhuba abeebe.

⁶Abandu boosi balamunyokhoosia omundu oyo, nende okhumutseshelela noluchelo luno nibaboola bari, “Oli mushilaamo shiobubi iwe owibunjishilanga ebindu ebilali ebibio ta! Iwe owituukhanga emiandu chiomusingo, ne nolarunga ta, olatsiililila okhukhola orio okhuula liina?

⁷Inyanga yindi, abaweholakhwo abo balabuukha bwangu, abakhutechesinjia baletsa, nawe olaba omuhambe wabwe.

⁸Iwe wayaaya amahanga amanji, nebutswa abo boosi abalatong'aho mwoyo balakhuyaaya iwe, khulwa eshitsaayi shia waraatsia nende amahababa ka wakhola khushialo, nende khumatookho nende khu abamenyamwo boosi.

⁹“Oli mushilaamo shiobubi iwe ouyindihalanga khulwa okhuyaaya owashio, iwe oumbakhanga inzuyo khushikulu nopaara mbu, oli nomulembe khandi mbu, oli ehale namatinyu.

¹⁰Nebutswa wara eshifimbwa murwe khubeinzuyo, khandi khulwa okhwira abandu abanji, wamala okhusishia obulamubwo omwene.

¹¹Kho kata amachina kalakhupa tsimbungu khwisiisi, emikuulo chiosi khandi chilaayula chirio.

¹²“Oli mushilaamo shiobubi iwe oumbakha litookho okhubirira mukhuraatsia eshitsaayi, iwe ouralisinjia litookho okhubirira mubumayanu!

¹³Shiali OMWAMI Nyasaye omwene mahe, oukholanga emilimo chiabandu bakhola, okhusasishila mumulilo, nako amahanga okhukhalabana khulwa butswa?

¹⁴Nebutswa eshialo shiletsulamwo obumanyi bwoluyali lwa OMWAMI Nyasaye omwene mahe, shinga olwa amaatsi ketsula munyanza.

¹⁵Oli mushilaamo shiobubi iwe oumeesinjia abamenyanibo, iwe oubanywesinjia amalwa muburuma okhuula olwa bameela, kho mbu, orangaale eshiechenye shiabwe.

¹⁶Olafwimbibwa omurwe mushilenje eshiokhuhebwa oluyali. Iwe omwene olanywa amalwa nomeera nohutuumana. OMWAMI Nyasaye omwene alakhumeesia, mana eshifwimbwa murwe shilafuunikha oluyalilwo!

¹⁷Amabi ka wakholela Lebanoni kalakhwitsila iwe omwene, weera tsisolo, natsio tsisolo tsilakhuriisia. Okhuba waraatsia amatsayi kabandu; ako koosi kalakhwitsila iwe, khulwa eshitsaayi eshia waraatsia khushialo, mumatookho nende khu boosi abamenya mushio.

¹⁸“Eshifwanani shili nabukhoonyi shi, eshindu shiomundu yakaasia butswa? Shio neshindu shiomundu yabaatsa butswa, neshikhuboolelanga obubeeyi bwonyene. Shili nabulayi shi khumundu owashibaatsa okhushisuubilila? Neshifwanani shiomunyasaye kata oulanyala okhuboola ta!

¹⁹Oli mushilaamo shiobubi iwe, ouboolelanga eshirundu shiomusaala ori, ‘Buukha,’ noho lichina ori, ‘Sinjila.’ Eshifwanani shinyala okhukhwechesiakhwo eshindu shiosi noho? Lola, shiareebwakhwo itsahabu nende ifeetsa, nebutswa shishilimwo obulamu tawe.”

²⁰Nebutswa OMWAMI Nyasaye ali muhekaluye indakatifu, buli mundu khushialo aholeele tsi imbeliwe.