Read wanga HABAKUKU 3 Bible Online

HABAKUKU 3 - wanga bible

HABAKUKU 3

¹Omulakusi Habakuku yasaaya naboola ari:

²Iwe OMWAMI Nyasaye omwene mahe, ndahuliile akoluyalilwo, nende akebikholebio, ne nditsuulemwo oburi. Bulano okholekhwo khandi munyanga tsiefwe tsino, amakhuwa amakhongo aka wakhola khale. Okhole kamanyishekhwo khandi munyanga tsiefwe tsino. Obetsenje netsimbabasi kata olwa oba notiilwa neliruma!

³Nyasaye yetsa narula Temani, Nyasaye Omutakatifu yetsa okhurula khushikulu shia Parani. Oluyalilwe lwatswana buli habundu mwikulu, nashio eshialo shietsulamwo ifumaye.

⁴Okhwakhakhwe khwali shinga okhweliuba. Tsinzese etsiobulafu tsiarula mumukhonokwe, omwa obunyalibwe bwebisa.

⁵Olumbe lwamuranjilila okhutsia imbeliwe, mana nalaka mbu okhufwa khumulondekhwo munyuma.

⁶Yasinjila, nashio eshialo nishirenga, yahenga, nako amahanga nikatechela. Ebikulu ebiobumeli biekha hasi, natsio tsingulu tsia yachendangakhwo khale tsielilisibwa.

⁷Ndalola abandu beshialo shia Kushani nibali mumatinyu, nabo abeshialo shia Midiani nibatechela.

⁸Iwe OMWAMI Nyasaye omwene mahe, osinyishiile emichela noho? Ne osinyishiile inyanza noho? Kho nikachila nocheesia tsifarasitsio, nende amakaariko kamahe khulwa okhunyoola obuhuli noho?

⁹Warechekha obuyingobwo, warechekha tsiseletsio khubuyingo, mana niwaraka eshialo nemichela.

¹⁰Ebikulu biakhulola, ne nibilikulukha, emikhula chiamaatsi chiabira khushialo, nako amarunda amakhongo akamaatsi nikabira nikahoola.

¹¹Eliuba nende omwesi biatong'a butswa nibiraliile mubwikhalo mwabio, olwa bialola tsimbenu tsiobuyingobwo nitsiiyuula bwangu, khandi lifumolio nilimwesukha.

¹²Mwirumalio wakhalasia khushialo, watubanjila hasi amahanga mwirumalio.

¹³Warula okhutsia okhuhonokosia abandubo, okhuhonokosia omuruchiwo owa watsushililakhwo amafura. Wakhupa omwimilisi wabandu abamayanu, mana nosishilia elala abalondibe.

¹⁴Wafumira omwimilisi wabelihebe netsiseletsio, olwa abelihe abo beetsa shinga eshimbalakusi okhukhusalaasia ifwe, beetsa nibeyitsiala shinga olwa berecheeshe okhusandia ababisandu ewa bebisile.

¹⁵Wachenda khunyanza netsifarasitsio, mana amarunda amakhongo nikarunda inyanza.

¹⁶Embulilanga amakhuwa ako, ne omubili kwanje kutechela, omunwa kwanje kurenganga khulwa obuhendi, amakumba kanje karekukha, nabio ebilenje bianje bitechela. Eniindililanga inyanga yamatinyu, eyiliitsila abakhuseranga ifwe.

¹⁷Kata emikhuyu nichilamulikha ta, kata emitsabibu nichilaama tsinzabibu ta, kata emiseituni nichilaama ta, kata emikunda nichilacheswamwo ebiokhulia ta, kata ebiayo nibihwa mushitioli, natsio tsing'ombe nitsilaba mukhonje ta,

¹⁸isie ndalatsiililila okhwikhoyela OMWAMI Nyasaye, ndalasaangaalila Nyasaye omuhonia wanje.

¹⁹Nyasaye, OMWAMI Nyasaye, niye amaani kanje, akholanga ebilenje bianje okhuralila shinga ebieshitsusu, mana yaakhola okhuniina khubikulu nomulembe.