Read wanga ZEFANIA 2 Bible Online

ZEFANIA 2 - wanga bible

ZEFANIA 2

¹Mwikhung'asie halala inywe, lihanga elibula isoni,

²mwikhung'asie halala nimushili okhutuumulwa nimuyilwa ehale shinga omukhuutsi, mwikhung'asie inyanga yeliruma lilulu elia OMWAMI Nyasaye niyishili okhumwitsila.

³Khaabe OMWAMI Nyasaye, inywe mwesi abetutuyia khushialo, inywe abalondanga amalakoke. Khaabe obulunjishi, khaabe obwitutuyi; haundi mwakhehonokosia okhurula khunyanga yeliruma elia OMWAMI Nyasaye.

⁴Litookho elia Gaza lilatong'a likhaya, nalio elia Ashikeloni lilatong'a likunda, Abamenyanga mwitookho elia Ashidodi balatafibwa tsimbilo mushiteere hakari, nabo abamenyanga mu Ekironi balarusibwamwo.

⁵Bali mushilaamo shiobubi abamenyanga khulukuku lweinyanza, abandu abamenyanga mushialo eshia Kirete! OMWAMI Nyasaye arumbula khwinywe, abamenyanga mushialo eshia Kanani, lihanga elia Abafilisiti ari; “Isie ndalamumulula, ne abulaho kata mulala khwinywe oulatong'aho.”

⁶Nenywe amahanga akali khuluku olwa inyanza, mulakwisibwa olwayilo, mulakholwa amatili ka abaayi nende ebitioli biemakondi.

⁷Eshialo shiokhulukuku lwe inyaanza shilabukulwa nabandu boluyia lwa Yuda abalehonokokha, balaaya ebiayo biabwe ebweneyo, balakhola tsinzu tsiamatookho ka Ashikeloni okhuba etsiokhwiyalisiamwo, okhuba OMWAMI Nyasaye omwene mahe alabetsulila, nende okhubakalusilia tsikhabi khandi.

⁸OMWAMI Nyasaye aboola ari, “Ndahuliile amaseyo ka abandu ba Moabu, nende amanyeko ka abandu ba Amoni, shinga olwa baseyanga abandu banje, nende okhwiyitsiala shinga olwa balabukula eshialo shiabwe.

⁹Khulweshio, isie OMWAMI Nyasaye omwene mahe, khandi Ouliho mwoyo, Isie Nyasaye wa Isiraeli nditsuba mbu, Moabu lilasasibwa shinga litookho lia Sodoma, nalio Amoni lilasasibwa shinga litookho lia Gomora. Ebialo ebio bilakwa tsisambakhulu nende amatikho komunyu, khandi bilakwa amakunda inziayo. Abandu banje abalatong'aho mushialo balabiyaaya, abandu beshialo shianje abalatong'a balabibukula.”

¹⁰Okwo nikwo okulaba omurungo kwa Moabu nende Amoni khulwa okhwichinjimisia khwabwe, khulwa okhubela baseya nende okhunyeka abandu aba OMWAMI Nyasaye omwene mahe.

¹¹OMWAMI Nyasaye aliba owamarisia khubo, alisasia abanyasaye boosi abokhushialo. Amahanga koosi kokhushialo kalimwinamila, buli lihanga liakhamwinamile habundu walio.

¹²Nenyu abandu ba Etsiopia, mwesi khandi mwakhamululwe nolukangalwe.

¹³OMWAMI Nyasaye yakhanyiile omukhonokwe elubeka lwemasaba, ne namulula Ashuru, khandi alikhola litookho lia Nineve okhutong'a likunda, lilitong'a eliumu ka shinga olwanda.

¹⁴Liakhakwe habundu hemiruko, nende tsisolo etsiomubulimo okhwiyalisia. Namulobi nende namulakha kakhamenye mutsisiilo tsialio, liyichichi liakhayochelele mwitirisha lialio, nalio likhokho liakhayochelele hamushingachi, okhuba tsimbaho tsialio tsiemisiita tsilafimbulwa ebulafu.

¹⁵Kho lino nilio litookho lieyitsialanga niliamenya mumulembe, niliboola liri, “Nisie ouliho, oundi abulaho.” Lolakhwo shinga olwa likwisiibwe likunda, likwisiibwe eshimenyo shietsisolo tsiomubulimo! Buli omundu oubiraho alinyokhosia nende okhulilechelesia.