Read wanga ZEFANIA 3 Bible Online

ZEFANIA 3 - wanga bible

ZEFANIA 3

¹Woowe, litookho lia Yerusalemu, litookho limayanu, elieshisinyo khandi eliokhusandia.

²Shilihulilangakhwo obuchetsiyi bwosi ta, kata okhurechelesia olwa liba nilihalabilwa ta. Shiliisikanga OMWAMI Nyasaye ta, khandi shilisitangakhwo ahambi khu Nyasaye walio tawe.

³Abemilisi balio bali shinga tsitalanyi etsihoola, abayaasi balio bali shinga ebisuutse ebia inzala yiluma khungoloobe, ebilanyala okhulekha eshiokhulia shiosi okhuula mutsuli ta.

⁴Abalakusi balio nabandu balateebanga liosi ta, khandi ababatsa. Abesaaliisi balio bonooninjia ebili ebitakatifu khandi bafunakanga amalako ka Nyasaye.

⁵Nebutswa OMWAMI Nyasaye ouli mwitookho lio nomulunjishi, shiakholangakhwo obumayanu bwosi tawe. Buli lwosi mumabwibwi akholanga obukhalachibwe obwa habwene, buli inyanga akholanga ario obulachweya ta, nebutswa abamayaanu batsiilililanga okhukhola obumayanu nibalafimbwa omurwe ta.

⁶OMWAMI Nyasaye aboola ari, “Erusiyeho amahanga koosi, esasiiye amasiisi kabwe nende eminaara chiabwe chiosi. Esasiiye emihanda chiabwe chiosi, abulaho ouchenda khuchio. Amatookho kabwe kakwile amakunda, kabulamwo abandu, kabulamwo abokhumenyamwo.”

⁷Mana isie OMWAMI Nyasaye nemboola khwitookho elo endi, “Toto mwene abomwitookho lino balambulila, khandi balafuchilila amebaalo kanje.” Shibalebilila ebinyasio bianje biosi khubo ta. Nebutswa batsiililila butswa okhurakhwo omwoyo okhukhola akobumayanu mubuli likhuwa.

⁸OMWAMI Nyasaye aboola ari, “Mulindilile butswa, mulindilile inyanga eya ndalabuukha okhuyaasia amahanga, okhuba emalile okhulaka mbu, ndalareera amahanga halala, ndalakhung'asia abaruchi halala, mana ebasundulile eshinyasio shianje, halala nende omulilo kweliruma lianje. Okhuba eshialo shiosi shilamululwa nomulilo kwa liruma lianje lilulu.

⁹Mubise ebio, ndilikalukhasia obubooli bwabandu, ndilibukhola okhuba obubooli obunyushe, kho mbu boosi bahabile eliira lianje isie OMWAMI Nyasaye, khandi banzinamile nomwoyo mulala.

¹⁰Okhuchachila injelekha wemialo chia Etsiopia, abandu banje basalaana nebutswa abanzinamilanga, balindeerera ebihaanwa bianje.

¹¹Khunyanga eyo shimulifimbwa omurwe khulwa ebikhole bienywe biobukhayi bia mwakholela ta; Okhuba khunyanga eyo, ndilirusiaho mwinywe boosi abokhwichinjimisia nende okhwikhulumamia, nenyu shimwakhechinjimisiekhwo khandi nimuli khushikulu shianje eshitakatifu tawe.

¹²Ndililekha mwinywe abandu abokhwitutuyia khandi abaholo, abandu abalihabila isie OMWAMI Nyasaye wabwe khulwa obuhabinwi.

¹³Abaisiraeli abalitong'a, shibalikholakhwo obumayanu, kata okhuboolakhwo obubeeyi tawe, kata mubo shialibamwo ouliboola akobukaati ta. Balinyoola olwayilo, ne nibeyalisia hasi, khandi abulaho oulibarisia.”

¹⁴Inywe abandu ba Zayuni, yimbe nomwoyo omukhongo; Inywe abandu ba Isiraeli, khupe tsingalakala! Inywe aba Yerusalemu, tsaatsahale nimwikhoya nomwoyo kwosi!

¹⁵OMWAMI amurusiyekhwo eshinyasio shienywe, khandi ashiukhasiye abasuku benywe. OMWAMI Nyasaye, omuruchi wa Isiraeli ali ninenywe, shimulariakhwo amatinyu koosi khandi tawe.

¹⁶Khunyanga eyo kakharumbulwe khwitookho lia Yerusalemu mbu, “Shiolaria ta, iwe Zayuni, olatembusia amakhoonoko tawe.

¹⁷OMWAMI Nyasayewo, ali ninawe, obunyalibwe bulakhukhola okhuhula. Alakhusangalila nomwikhoyo omukhongo, khandi khulwa obuheelibwe alakhukhola okhuba nobulamu obuyia. Alakhwikhoyela niyeemba tsinyimbo nende okhukhupa tsingalakala,

¹⁸shinga butswa khunyanga ikhulundu yelisabo. Ndalakhurusiakhwo amatinyuko, nawe shiolahafibwakhwo tsisoni khulwa amatinyu ako tawe.

¹⁹Khunyanga eyo, ndilihelesia abakhusandia eshinyasio. Ndilihonokosia abetsindieku, nende okhukhung'asia boosi abasalasibwa. Ndilikalukhasia eshifimbwa murwe shiabwe okhuba oluyali, nende ifuma mushialo shiosi.

²⁰Khunyanga eyo, ndilimukhung'asia mwesi nimureera ingo, ndilimukhola okhuba noluyali nende ifuma mubandu boosi khushialo; ndilimukalusilia tsikhabi tsienywe, abeene nimureerekhwo tsimoni.” Nolwa isie OMWAMI Nyasaye emboola.