Read wanga HAGAI 1 Bible Online

HAGAI 1 - wanga bible

HAGAI 1

¹Khunyanga yambeli yomwesi kwakhasasaba, mumuyika kwakhabili Dario nali omuruchi wa Perisia, OMWAMI Nyasaye yaruma omulakusi Hagai mbu, aboolele Zerubabeli omwimilisi wa Yuda, omwana wa Shealitieli, khandi mbu, aboolele Yoshwa omwisaaliisi omukhulundu, omwana wa Yehozadaki ari,

²“OMWAMI Nyasaye omwene mahe aboola mbu, abandu bano baboolanga mbu, eshise shiokhumbakha obuyia Ihekalu yanje shishili okhuula.”

³Mana OMWAMI Nyasaye nareeba omulakusi Hagai ari,

⁴“Kali habwene inywe okhumenya mutsinzu tsienywe, etsiombakhwa obulayi netsimbao, nayo Ihekalu yanje niyitong'a butswa likunda yirio?”

⁵Khulweshio, OMWAMI Nyasaye omwene mahe aboola ari, “Yililisiekhwo khukamukwilanga inywe.

⁶Inywe mwaraaka ebinji, nebutswa mwachesa bituutu, mulitsanga ebiokhulia, nebutswa shimwikuranga ta, munywetsanga amaatsi, nebutswa shimunyalikhanga ta, mwifwalanga ebifwalo, nebutswa mushihulilanga omunyiri, omukholi wemilimo ali butswa shinga oubikhanga omurungokwe mushifuuko eshiafutukha.”

⁷OMWAMI Nyasaye omwene mahe aboola ari, “Yililisiekhwo khukamukwilanga.

⁸Tikulushe mubikulu murikande emisaala, mumbashe obuyia Ihekalu eyo kho mbu, enyale okhuchisangaalila khandi nindinamilwamwo.” OMWAMI Nyasaye aboola ari,

⁹“Mwakhaaba ebinji, nebutswa mwanyoola bituutu. Ne olwa mwabireera hango, nasi nebifuura nibihwaho. Mbushiina nekhola endio? Ndakhola endio khulwa Ihekalu yanje, eyatong'a butswa likunda, olwa buli mulala khwinywe atetekhanilanga okhukaasia inzuye omwene.” OMWAMI Nyasaye omwene mahe aboola ari,

¹⁰“Niko kachila likulu nililakwisia ifula ta, nalio liloba nililaamia ebiraakwa tawe.

¹¹Endeerire eshimiyu khushialo, khubikulu, khumikunda echia imele, echia emitsabibu, echia amafura akemiseituni nende khumikunda chiebiraache, khubandu nende khumiruko, nende khubuli shindu shiosi eshia mukhola.”

¹²Mana Zerubabeli omwana wa Shealitieli, nende Yoshwa omwisaaliisi omukhulundu, omwana wa Yehozadaki, halala nende abandu boosi abali nibachelela okhurula mubuhambe, bakhola aka OMWAMI Nyasaye wabwe yali nalachilisiye, khandi shinga lwomulakusi Hagai yali nababooleele aka OMWAMI Nyasaye wabwe yali namurumile. Mana abandu nibenamila OMWAMI Nyasaye.

¹³Mana omulakusi Hagai, owali omurume wa OMWAMI Nyasaye naboolela abandu oburume okhurula khu Nyasaye, obuboola buri, “Isie OMWAMI Nyasaye endi ninenywe.”

¹⁴Kho OMWAMI Nyasaye natinyisia omwoyo kwa Zerubabeli, omwana wa Shealitieli, omuruchi wa Yuda, nende okwa Yoshwa, omwana wa Yehozadaki, omwisaaliisi omukhulundu, nende emioyo chiabandu bandi boosi abali nibachelela okhurula mubuhambe. Betsa nibachaaka emilimo khuhekalu ya OMWAMI Nyasaye wabwe, OMWAMI Nyasaye omwene mahe,

¹⁵khunyanga yamakhumi kabili nende khane, eyomwesi kwakhasasaba okwo.