Read wanga HAGAI 2 Bible Online

HAGAI 2 - wanga bible

HAGAI 2

¹Mumuyika kwa khabili omuruchi Dario nali muburuchi, khunyanga yamakhumi kabili nende ndala, eyomumwesi kwomusafu, OMWAMI Nyasaye yaboolela omulakusi Hagai ari,

²“Reebakhwo Zerubabeli omwana wa Shealitieli, omuruchi wa Yuda, nende Yoshwa omwana wa Yehozadaki, omwisaaliisi omukhulundu, nende abandu boosi abachelela okhurula mubuhambe

³ori, ‘Niwiina khwinywe owalolakhwo ing'oono nende oluyali lwali lweimbeli lweihekalu yino? Ne bulano muchilola murie? Shiyimuloleshela butswa shinga eshindu eshikhaya noho?

⁴Nebutswa yuma ikholo, iwe Zerubabeli, yuma ikholo iwe Yoshwa, omwana wa Yehozadaki, omwisaaliisi omukhulundu. Mume ikholo inywe mwesi abandu abeshialo shino, nolwa isie OMWAMI Nyasaye omwene mahe emboola. Khole emilimo namaani okhuba isie endi halala ninenywe.

⁵Shinga olwa ndamusuubisia olwa mwarula Misiri, endi halala ninenywe. Shimulariakhwo eshindu shiosi shiosi tawe.’

⁶“Okhuba isie OMWAMI Nyasaye omwene mahe emboola mbu, mubwangu muno khandi nditsa okhutechesia likulu nende eshialo, inyanza nende liloba,

⁷ndalatechesia amahanga koosi, nindeera emiandu chiako chiosi muhekalu muno, mana ndalachikhola okhuba Ihekalu eyeing'oono muno, nolwa isie OMWAMI Nyasaye omwene mahe emboola.

⁸Ifeetsa neyanje, khandi itsahabu yoosi neyanje, nolwa isie OMWAMI Nyasaye omwene mahe emboola.

⁹Ing'oono yeihekalu eyolunyuma yino yilashila eyali yeimbeli, nolwa isie OMWAMI Nyasaye omwene mahe emboola. Ne habundu hano niho aha ndalahelesilia abandu banje amalayi nende omulembe, nolwa isie OMWAMI Nyasaye omwene mahe emboola.”

¹⁰Khunyanga yamakhumi kabili nakhane eyomwesi kwa shienda, kwomuyika kwakhabili Dario nali omuruchi, OMWAMI Nyasaye yaboolela omulakusi Hagai ari,

¹¹“Isie OMWAMI Nyasaye omwene mahe emboola mbu, reeba abesaaliisi eshiamalako kaboola khumakhuwa kano mbu,

¹²Omundu naba nabukula inyama indakatifu eyokhumusango, mana afundishe eshifwaloshie okhuchinjilamwo, ne eshifwaloshie eshio nishiitiila khumukaate, noho idivai noho amafura, noho kata khushiokhulia shiosi shiosi, kho eshiokhulia eshio shilekhola okhuba eshitakatifu noho?” Abesaaliisi nibamukalusia bari, “Tawe.”

¹³Mana Hagai nabareeba khandi ari, “Ne omundu yesi yesi ouli owomusilo khulwa okhwitiisia khumulambo, naba natiila khushilala khubindu bino, eshindu tsana eshio shiba shiikhola eshiomusilo noho?” Abesaaliisi nibamukalusia bari, “Kali habwene, shiosi shiba shiikhola eshiomusilo.”

¹⁴Mana Hagai nabakalusia mbu, OMWAMI Nyasaye aboola ari, “Nolwa kali khubandu bano, khwihanga lino elili imbeli wanje, khandi nolwa kali khubuli shindu eshiabakhola namakhono kabwe, eshia bahaana khubimalilo biemisango shiikholile eshiomusilo.

¹⁵“Nebutswa bulano yililisie khukeetsa okhubekholekhakhwo okhuchaaka olwa leelo luno. Olwa mwali nimushili okhuchaaka okhumbakha obuyia Ihekalu ya OMWAMI yino,

¹⁶obulamu bwenywe bwali burie? Omundu niyatsitsanga mwibiishilo lieimele nasuubiile okhunyoola ebimwelo amakhumi kabili, yanyoolanga ekhumi bionyene. Niyatsitsanga mululeemo lweidivai nasuubiile okhwitsusia tsinyungu amakhumi karano, yetsusinjia butswa tsinyungu amakhumi kabili tsionyene.”

¹⁷OMWAMI Nyasaye aboola ari, “Ndaruma eshimiyu, oluyongo nende ifula yamachina, nesasia buli shindu shia mwateema okhuraaka, nebutswa kata olwa ndakhola endio, inywe shimwekalukhasia tawe.

¹⁸Inyanga yino, ni inyanga yamakhumi kabili nakhane, eyomwesi kwa shienda, inyanga yino, eyomuse kwa Ihekalu eya OMWAMI Nyasaye kumalile okhusimikhwa. Olole eshilekholekha okhurula olwa leelo.

¹⁹Ebiachi bishilimwo imele noho? Emitsabibu, emikhuyu, emikomamanga nende emiseituni chishilikhwo nebiamo noho? Nebutswa okhurula olwa leelo, ndalakhuhelesia tsikhabi.”

²⁰OMWAMI Nyasaye yaboolela omulakusi Hagai khunyanga tsana eyo, eyamakhumi kabili nende khane, eyomwesi kwashienda ari,

²¹“Boolela Zerubabeli omuruchi wa Yuda mbu, endi ahambi okhutechesia likulu nende eshialo,

²²nengwisia oburuchi bwamahanga nende okhusasia obunyali bwako. Ndalafuumamia amakaari aketsifarasi nende abachendelangakhwo. Tsifarasi tsilafwa, nabo abachendelanga khutsio baleerana nolukanga abeene khu beene.”

²³OMWAMI Nyasaye omwene mahe aboola ari, “Khunyanga eyo, ndakhakhubukule iwe omusumba wanje, Zerubabeli omwana wa Shealitieli, nekhukhola shinga ingaka yeshibalikho, okhuba ndakhwahula.” Nolwa OMWAMI Nyasaye omwene mahe aboola.