Read wanga ZAKARIA 1 Bible Online

ZAKARIA 1 - wanga bible

ZAKARIA 1

¹Mumwesi kwomunane mumuyika kwa khabili Dario nali omuruchi wa Perisia, OMWAMI Nyasaye yaboolela omulakusi Zakaria omusiani wa Berekia, omwitsukhulu wa Ido ari,

²“Isie OMWAMI Nyasaye ndasinyisibwa muno nende abakuuka benywe.

³Khulweshio baboolele mbu, isie OMWAMI Nyasaye omwene mahe emboola mbu, mungalushile, nasi ndalamukalushila inywe.

⁴Shimulaba shinga abakuuka benywe, ababalakusi bambeli bachetsiyia mbu, baleshe okhumenya obulamu obumayanu, kata okhukhola obwonooni, nebutswa baloba okhubarecheresia kata okhulonda amalako kanje isie OMWAMI Nyasaye omwene mahe, ta.

⁵Kho abakuuka benywe abo bali hena? Kata abalakusi batsana bali hena? Bashimenyangaho inziayo noho?

⁶Ne kata abakuuka benywe abo, shibaanyoola eshinyasio khulwa okhuloba okhulonda obuchetsiyi nende amalako kanje, aka ndabahelesia okhubirira mubakhalabani banje abalakusi noho? Nebutswa bamala nibekalukhasia okhurula mubwonooni bwabwe, khandi nibamanya mbu, isie nisie OMWAMI Nyasaye omwene mahe, owabahelesia eshinyasio shia bali nibakhoyile okhunyoola, shinga olwa ndali ninjoomile okhukhola.”

⁷Mumuyika kwa khabili Dario nali omuruchi, khunyanga yamakhumi kabili nakhane eyomwesi kwekhumi nalulala, nikwo omwesi kwa Shebati, OMWAMI Nyasaye yaboolela omulakusi Zakaria, omusiani wa Berekia, omwitsukhulu wa Ido, naye yahandika naboola ari,

⁸“Ndalola omundu mushilo naniinile khufarasi ya lando! Omundu tsana oyo yali nasinjiile mwibanda hakari wemisaala echiemihadasi. Emukongowe tsialiho tsifarasi tsia lando, etsia ratieli nende tsia rachaari.”

⁹Mana nemureeba endi, “Omwami wanje, eshisina shietsifarasi tsino nishiina?” Naye niyangalusiamwo ari, “Ndalakhumanyia eshisina shietsifarasi etsio.

¹⁰Etsio nitsio etsia OMWAMI Nyasaye yaarumile okhulambuula eshialo.”

¹¹Tsifarasi etsio nitsikalusia omumalaika owa OMWAMI Nyasaye, owali nasinjiile hakari wemisaala chiemihadasi tsiri, “Khuchendile eshialo shiosi, ne khunyoolile mbu, shiosi pe shili nomulembe.”

¹²Mana omumalaika wa OMWAMI Nyasaye oyo naboola ari, “Iwe OMWAMI Nyasaye omwene mahe, olatsiililila okhusinyishila litookho lia Yerusalemu nende amatookho ka Yuda nokeema tsimbabasitsio okhuula liina? Okhuba bulano nemiyika amakhumi musafu niwabasinyishila.”

¹³OMWAMI Nyasaye yakalusia omumalaika oyo amakhuwa amalayi khandi akokhulemia omwoyo.

¹⁴Kho omumalaika oyo niyamboolela ari, “Rumbula amakhuwa kano noboola ori: OMWAMI Nyasaye omwene mahe aboola ari, ‘Isie ndaheela litookho lia Yerusalemu nende eshikulu shia Zayuni muno.

¹⁵Nebutswa endi noburuma obunji khumahanga akahulilanga obulayi, khandi akali nomulembe. Okhuba olwa ndali nesinyishiile abandu banje ba Isiraeli, amahanga ako kameeta okhubasandia.

¹⁶Khulweshio, kano niko aka isie OMWAMI Nyasaye omwene mahe emboola mbu, engalushiile litookho lia Yerusalemu netsimbabasi. Ihekalu yanje yilombakhwa obuyia mulio, nalio liosi liloombakhwa obuyia.’ ”

¹⁷Omumalaika oyo niyamboolela khandi mbu, rumbula noboola ori, “OMWAMI Nyasaye mwene mahe aboola ari, ‘Amatookho kanje kalayindihala muno khandi, isie OMWAMI Nyasaye ndalahotselesia abandu banje ba Zayuni, nindaahula litookho lia Yerusalemu okhuba elianje.’ ”

¹⁸Mwilolelo lindi, ndalola tsinzika tsine.

¹⁹Mana nereeba omumalaika wali naboolilenje ninasi endi, “Eshisina shietsinzika tsino nishiina?” Naye niyangalusia ari, “Tsinzika tsino tsimanyisinjia amahanga akasalasia abandu ba Yuda, aba Isiraeli nende aba Yerusalemu.”

²⁰Mana OMWAMI Nyasaye niyamanyia aberaanyi bane.

²¹Nemureeba endi, “Abandu bano betsanga okhukhola shiina?” Naye niyangalusia ari, “Betsile okhurundusia nende okhusasia amahanga akaseera eshialo shia Yuda khandi nikasalaasia abandu bashio.”