Read wanga ZAKARIA 10 Bible Online

ZAKARIA 10 - wanga bible

ZAKARIA 10

¹Musaaye OMWAMI Nyasaye, amureerere ifula yeirotso. OMWAMI Nyasaye niye oukaasinjia amaleesi keifula, nakwisilia abandu ifula mubunji, nende okhubanesilia boosi emimela mumikunda.

²Ebifwanani biboola aka butswa, nabo abafumu bafumula akobobeeyi, abalakusi balakula akobubeeyi, baboola amakhuwa akokhuhotselesia ka butswa. Khulweshio abandu ba Yuda bachendachenda shinga amakondi akakorire, banyakhana khulwa okhubula omwayi.

³Endi neliruma elinji khubaayi, ne ndalasaalisia abemilisi abo. Okhuba OMWAMI Nyasaye omwene mahe niye oulindanga omukandakwe kwaboluyia lwa Yuda, naye alabakhola okhuba tsifarasitsie tsiamaani.

⁴Okhurula mubo alanyoolekhamwo omuruchi oularalila shinga lichina liomukoona, oularalila shinga eshibambo shieliheema, khandi owamaani shinga obuyingo bwelihe, okhurula mubo alanyoolekhamwo buli omuseesia welihe.

⁵Abandu ba Yuda balaba shinga abalwani abasitsa, abasenachila abasuku babwe hasi mumatoyi kokhunjila. Balalwana okhuba isie OMWAMI Nyasaye endi halala ninabo, khandi balafwimbia ebelushilanga khu tsifarasi emirwe.

⁶Ndalameeta aboluyia lwa Yuda amaani, khandi ndalahonia abolwibulo lwa Yosefu. Ndalabachelesia ewabwe okhuba ebaloleele tsimbabasi, nabo balaba shinga aba ndalayebalakhwo ta, okhuba isie nisie OMWAMI Nyasaye wabwe, ne ndalabakalusia.

⁷Mana abandu ba Efuraimu balaba abalwani bamaani, balasaangaala shinga abanywele idivai. Abaana babwe balalola bario nibasaangaala, balaba nobusaangaafu mumioyo chiabwe khulwa aka isie OMWAMI Nyasaye ekholile.

⁸Ndalabalanga nebakhung'aasia halala, okhuba emalile okhubanunula, nabo balaba abanji shinga olwa balinji khale.

⁹Kata nemba nindabasalaasia mumahanga kandi, balanzitsulila nibali ebweneyo, nabo halala nabaana babwe balamenya, mana bachelele ewabwe.

¹⁰Ndalabachelesia mushialo shiabwe okhurula mushialo shia Misiri, ndalabakhung'aasia okhurula mushialo shia Ashuru, ndalabareera mushialo shia Giliadi nende eshia Lebanoni, ne obwiyangu shibulabamwo obubahela tawe.

¹¹Balaambukha inyanza yamanyakhano, nasi ndalaholelesia amarunda kayo, kata olusiba lwamaatsi komwalo kwa Naili lulakhama. Okhwichinjimisia khwa Ashuru khulatuutuyibwa, nako amaani ka Misiri kalarusibwaho.

¹²Ndalakhola abandu banje okhuba bamaani mwisie OMWAMI Nyasaye, nabo bambulilanga nibanzinamila, nisie OMWAMI Nyasaye ouboolile.