Read wanga ZAKARIA 11 Bible Online

ZAKARIA 11 - wanga bible

ZAKARIA 11

¹Iwe Lebanoni, yikula emiliangochio kho mbu, omulilo kumulule emisaalachio chiemisiita!

²Inywe emitarakwa, khupe tsimbungu, okhuba emisiita chikwiile, emisaala chioluyali chisasiibwe! Inywe emiruba chia Bashani, khupe tsimbungu, okhuba omutsuru okwayumba kuremuulwe!

³Hulile, abaruchi bakhupanga tsimbungu mushibeela, okhuba oluyali lwabwe lusasiibwe! Hulile tsitalanyi tsibuuluula, okhuba omutsuru kwomwalo kwa Yorodani kusasiibwe!

⁴OMWAMI Nyasaye, Nyasaye wanje, yamboolela ari, “Wikhole okhuba omwayi wamakondi akatsia okhusinzwa.

⁵Abakuli bako bakasinza, nebutswa shibahelesibwa eshinyasio tawe. Abakakusia baboola bari, ‘OMWAMI Nyasaye aheebwe oluyali! Bulano endi omuyinda,’ nebutswa kata abaayi bako beene shibakalolelakhwo eshisa tawe.

⁶Isie OMWAMI Nyasaye emboola mbu, shindalalolelakhwo eshisa khandi abandu bokhushialo tawe. Ndalalekha buli mundu mumakhono kowashie nende akomuruchiwe. Bo balonoonia eshialo, nasi shindalahoniakhwo omundu yesi yesi okhurula mumakhono kabwe tawe.”

⁷Khulweshio ndamala nindikhola okhuba omwayi wamakondi akali nikatsia okhusinzwa, okhuba ndahandikwa nende abakulaasinjia amakondi. Nimbukula tsindabushi tsibili: ndala nechikulikha mbu, “Obukoosia,” ne eyindi mbu, “Obulala,” mana nenzia okhwaya amakondi.

⁸Mumwesi mulala, ndarusiaho abaayi abali nibaliho bataru, okhuba baasinya, khandi siesi nebasinya.

⁹Kho nemboolela amakondi ako endi, “Shindalaba omwayi wenywe khandi ta. Lekha akenya okhufwa kafwe, ne akenya okhusasikha kasasishe! Nako akatong'a kaliitsane akeene khu keene.”

¹⁰Ndabukula indabushi yanje eyandakulikha mbu, “Obukoosia” nenjifunaka, okhulolesia mbu, indakano ya ndali nindakaasia nabandu yali niyifunaakwe.

¹¹Mana indakano eyo niyifunakwa inyanga eyo, nabo abakhala bamakondi abali nibaandolanga bamanya mbu, lino liali likhuwa lia OMWAMI Nyasaye.

¹²Mana nebaboolela endi, “Nimuba nimulola mbu nobulayi, mumbelesie omurungo kwanje, ne nimulola mbu shinobulayi ta, muleshe kube.” Kho nibaarunga omurungo kwanje, tsifeetsa amakhumi kataru.

¹³Mana omwami Nyasaye niyamboolela ari, “Kufuube mwibishilo lieihekalu.” Omurungo okwo nokwa bali nibaluutsi mbu kuhela nende emilimo chia ndali nekholile. Kho nembukula ebitonye bieifeetsa amakhumi kataru ebio, nebifuuba mwibishilo lieihekalu ya OMWAMI Nyasaye.

¹⁴Mana nefunaka indabushi yanje yakhabili eyandakulikha mbu, “Obulala” eyo, nikaba mbu, efunaache obulala bwali hakari wa Yuda nende Isiraeli.

¹⁵Khandi OMWAMI Nyasaye niyamboolela ari, khandi wikhole mbu oli omwayi wamakondi, nebutswa bulano obe omwayi oubula obukhoonyi.

¹⁶Okhuba ndalareera mushialo omwayi wamakondi oulanyala okhuteeba likondi elili okhufwa, kata okhukhaaba likondi elikorire tawe. Shialanyala okhusilikha likondi elifuniishe, noho okhuliisia lilamu ta, nebutswa ye aliitsanga akali amanefu, narandula kata tsimbakayu tsiako.

¹⁷Ali mushilaamo shiobubi omwayi oubula obukhala, owibalanga amakondike! Olukanga ma lwomukhonokwe, khandi lukhoya lwayiniayo imoniye yomukhono musaatsa! Omukhonokwe kufwililile elala, nayo imoniye eyomukhono musaatsa yibofulile elala!