Read wanga ZAKARIA 12 Bible Online

ZAKARIA 12 - wanga bible

ZAKARIA 12

¹Lino nilio likhuwa lia OMWAMI Nyasaye yaboolela Isiraeli. OMWAMI Nyasaye owabambula likulu, nalonga eshialo, ne nara obulamu mumundu aboola ari,

²“Ndalakhola litookkho lia Yerusalemu okhuba shinga eshikombe shieidivai. Nako amahanga koosi akalibotokhaane kayinywa nikakoyaana shinga abameesi. Olwa litookho lia Yerusalemu lilaseerwa, kata amatookho ka Yuda kosi khandi kalaseerwa.

³Khunyanga eyo, ndakhakhole litookho lia Yerusalemu okhuba shinga lichina lisiro khubandu boosi, omundu yesi yesi owakhateeme okhulichinguula yakhesaalisie omwene. Abandu bamahanga kokhushialo koosi bakhaseere litookho elo.

⁴OMWAMI Nyasaye aboola ari, Khunyanga eyo, ndakhare oburi mubuli ifarasi, ne ndakhakhole buli mundu wilushilanga khutsifarasi okhuba omulalu. Ndakhabofusie tsifarasi tsiamahanga kandi, nebutswa ndakhaliinde aboluyia lwa Yuda.

⁵Mana abebiliibwa bia Yuda bakhaboole mumioyo chiabwe bari, ‘Abamenyanga mu Yerusalemu banyoolile amaani kabwe okhurula khu OMWAMI Nyasaye mwene mahe, ouli Nyasaye wabwe.’

⁶“Khunyanga eyo, ndakhakhole abebiliibwa bia Yuda okhuba shinga inyungu eyiyiitsanga niyili hakari wamachienga komulilo, noho shinga eshichienga shiomulilo mumukunda okwebichese biamala okhuuma. Bakhamulule amahanga koosi akababotokhana. Nebutswa abandu bakhatsiililile okhumenya mwitookho lia Yerusalemu mumulembe.

⁷“Mana OMWAMI Nyasaye yakharanjilile okhuhelesia abandu ba Yuda obuhuli kho mbu, oluyali lwabolwibulo lwa Daudi nende abandu ba Yerusalemu banyoola luleshe okhuba olukhongo okhushila olwabandu bandi ba Yuda.

⁸Khunyanga eyo, OMWAMI Nyasaye yakhakure abandu abamenyanga mu Yerusalemu, ne kata abateshele muno mubo bakhabe bamaani shinga olwa omuruchi Daudi yali. Nabo abolwibulo lwa Daudi bakhabe shinga Nyasaye, shinga omumalaika wa OMWAMI Nyasaye nabemiliile.

⁹Khunyanga eyo ndakhamulule amahanga koosi akalienya okhuseera litookho lia Yerusalemu.

¹⁰ “Ndakhetsusie roho weshisa nende amasaayo mubolwibulo lwa Daudi nende mubamenyanga mwitookho lia Yerusalemu. Olwa bakhahenje khuwabaliba nibafumiire, bakhamwikhuule shinga olwa omundu yekhuulanga omwanawe omutelwa, nende okhulila obululu shinga olwa omundu alilanga omwana omwikulanda.

¹¹Khunyanga eyo, khwakhabeho okhwikhuula okhunji mu Yerusalemu shinga okhwikhuula khwa Hadadirimoni mumuhololokhwe kwa Mekido.

¹²Abandu boosi mushialo bakhekhuule, buli olwibulo khulwabwo. Abolwibulo lweinzu ya Daudi bakhekhuule khulwabwe, nabo abakhasi babwe khulwabwe. Abolwibulo lweinzu ya Natsani bakhekhuule khulwabwe, nabo abakhasi babwe khulwabwe.

¹³Abolwibulo lweinzu ya Lawi bakhekhuule khulwabwe, nabo abakhasi babwe khulwabwe. Abolwibulo lweinzu ya Shimei bakhekhuule khulwabwe, nabo abakhasi babwe khulwabwe.

¹⁴Abetsinzibulo tsindi tsiosi bakhekhuule, buli abolwibulo bakhekhuule khulwabwe, nabo abakhasi babwe khulwabwe.”