Read wanga ZAKARIA 13 Bible Online

ZAKARIA 13 - wanga bible

ZAKARIA 13

¹OMWAMI Nyasaye mwene mahe aboola ari, “Olwa inyanga eyo yakhoole, isebele yakhekulwe khulwa okhusiiya abolwibulo lwa Daudi nende abandu ba Yerusalemu okhurula mubwonooni bwabwe nende mubumayanu bwabwe.

²Isie OMWAMI Nyasaye mwene mahe emboola mbu, khunyanga eyo, ndakhayinie mushialo ameera kebifwanani koosi, ne shikakhetsulilwekhwo khandi ta. Khandi ndakhayinie mushialo abalakusi nende obwikombi bwabwe bwobumayanu.

³Omundu yesi oulitsiililila okhuba omulakusi, abebusibe bamwibula bakhamuboolele bari, ‘Okhuula ofwe, shichila orumbulanga akobubeeyi muliira lia OMWAMI Nyasaye.’ Mana habwene yaho abebusibe bamwibula bakhamufumire olwa aba nalakula.

⁴Khunyanga eyo buli omulakusi yakhafwimbibwe omurwe khulwa obulakusibwe olwa aba nalakula. Shibakhefwalekhwo ebifwalo ebiobulakusi biobwoya khulwokhukaatia abandu ta,

⁵nebutswa buli mulala yakhaboole ari, ‘Isie shiendi omulakusi tawe. Isie endi butswa omulimi womukunda, okhuba liloba nomukabo kwanje okhurula mulubuukha lwanje.’

⁶Ne omundu naba nareeba mulala khubo ari, ‘Tsimbala tsili khumubilikwo tsino netsia shi?’ Yakhamukalusie ari, ‘Nitsio etsia ndafumirwa munzu yomwitsa wanje.’ ”

⁷OMWAMI Nyasaye mwene mahe aboola ari, “Iwe olukanga, buukha olwane omwayi wanje, buukha olwane omwayi oukholelanga isie emilimo,” Khupa omwayi mana amakondi kasalaane; ndalachinguula omukhono kwanje okhuseera abandu abateshele.

⁸OMWAMI Nyasaye aboola ari, Ebitonye bibili khubitaru biabandu mushialo shiosi balamululwa, nabandu eshitonye shilala khubitaru bonyene abalatong'aho mwoyo.

⁹Abandu balasikalaho eshitonye shilala khubitaru bano ndalabara mumulilo, ndalabasiiya shinga olwa ifeetsa yisiiyungwa, nebateema shinga olwa itsahabu yiteemungwa. Mana balaahaabila, nasi ndalabahulila. Ndalaboola endi, “Bano nabandu banje,” nabo balaboola bari, “OMWAMI Nyasaye niye Nyasaye wefwe.”