Read wanga ZAKARIA 14 Bible Online

ZAKARIA 14 - wanga bible

ZAKARIA 14

¹Lola, inyanga ya OMWAMI Nyasaye okhukhalaka eshiina yili ahambi. Khunyanga eyo, emiandu chienywe, inywe abandu ba Yerusalemu chiakhakabanwe nimureerekhwo tsimoni.

²OMWAMI Nyasaye yakhakhung'asie amahanga koosi okhuseera litookho lia Yerusalemu. Litookho liakhabukulwe, tsinzu nitsiyaaywa, nabo abakhasi benywe nibakwibwakhwo namaani. Inusu yabandu baliyilwa mubuhambe, nebutswa abalisikala shibakhayinibwe elwanyi welitookho tawe.

³Mana OMWAMI Nyasaye yakharule okhutsia okhukhupana namahanga ako, shinga olwa akholanga lihe nililiho.

⁴Khunyanga eyo, yakhasinjile khushikulu shia Miseituni, eshili Ebukwe welitookho lia Yerusalemu. Nashio Eshikulu shia Miseituni eshio shiakhakabulwemwo nelibanda libambuukhu muno okhurula Ebukwe okhuula Mumbo. Inusu yeshikulu shiakhasite Emasaba, nashio eshindi inusu shiakhasite Emulambo.

⁵Nenyu mwakhelushe okhubirira mwibanda lili hakari webikulu bibili bia OMWAMI Nyasaye, okhuba liakhoole Asali. Mwakhelushe shinga olwa baakuuka benywe belukha okhurenga khweshialo mutsinyanga tsia Uzia yali omuruchi wa Yuda. Mana nolwa OMWAMI Nyasaye, Nyasaye wanje yakhetse halala nende abatakatifu boosi.

⁶Khunyanga eyo, obushindu kata omunyiri shibiakhabeho tawe.

⁷Eshiteere shiakhatsiililile okhubaho obulabaho eshiilima tawe. Eshiteere noho eshilo shibiakhabeho ta, shichila obulafu bwakhabetsenjeho kata mushilo. Ni OMWAMI Nyasaye yenyene owamanya inyanga yamakhuwa kano kakhekholeshe.

⁸Khunyanga eyo, amaatsi kobulamu kakhakholomoshe okhurula mu Yerusalemu, akandi khuko kakhatsie munyanza yebukwe, nako akandi kakhatsie munyanza ya mumbo. Amaatsi ako kakhatsiililile okhukholomokha kario mutsinya tsieirootso nende mutsieshiubwe.

⁹Mana OMWAMI Nyasaye yakhabe omuruchi yenyene khushialo shiosi, yakhabe OMWAMI Nyasaye mulala yenyene butswa, nalio eliiralie liakhabe elo lionyene.

¹⁰Eshialo shiosi okhurula Geba okhuula Rimoni khulubeka lwemulambo wa Yerusalemu shiakhakwe omuhololokhwe. Nebutswa litookho lia Yerusalemu liakhatoonye nilichinguushile habundu walio, okhurula mushiliibwa shia Benjamini okhuula mushilibwa shiokhuranga khandi okhuula mu shia Mukoona, nende okhurula khumunaara kwa Hananeli okhuula khubitiinyilo biomuruchi bieidivai.

¹¹Abandu bakhamenyemwo okhuba obusasishi shibwakhabemwo khandi tawe. Tooto litookho lia Yerusalemu liakhabe nomulembe.

¹²OMWAMI Nyasaye yakhareere obulwale obubi khumahanga koosi akaseera Yerusalemu. Emibili chiabwe chiakhabole nibashiliho mwoyo, tsimoni tsiabwe tsiakhabolele mubiikochi mukari, natsio tsinimi tsiabwe tsiakhabolele muminwa chiabwe.

¹³Khunyanga eyo, OMWAMI Nyasaye yakhakhole abandu okhutiilwa neyindenga ne bakhakhupane abeene khu beene.

¹⁴Kata abandu ba Yuda bakhakhupane khulwa okhuliinda litookho lia Yerusalemu. Emiandu chiamahanga akabotokhana eshialo shia Yuda chiakhakhung'asibwe, itsahabu, ifetsa, nende ebifwalo biakhakhung'asibwe mubunji.

¹⁵Obulwale obubi obwo bwakhatiile tsifarasi, tsinyumbu, tsingamia, tsisishili nende tsisolo tsiosi etsiakhabe mubimenyo biabasuku ebio khandi.

¹⁶Omundu yesi yesi owakhahonokoshe okhurula mumahanga koosi akakhaseere litookho lia Yerusalemu, yakhetsenje mu Yerusalemu buli khumuyika okhumwinamila OMWAMI Nyasaye mwene mahe, ouli Omuruchi, nende okhulia lisabo lia Amatili.

¹⁷Ne ifula shiyakhakwekhwo mwihanga liosi liosi khushialo eliakhaleshe okhutsia Yerusalemu okhumwinamila OMWAMI Nyasaye mwene mahe, ouli Omuruchi, tawe.

¹⁸Ne abandu beshialo shia Misiri nibakhalobe okhutsia okhulia lisabo elo, OMWAMI Nyasaye yakhabareerere obulwale shinga obwo, obwa arumilanga amahanga kalobanga okhutsia mwisabo elo.

¹⁹Eshio nishio eshiakhabe eshinyasio khwihanga lia Misiri nende amahanga kandi koosi akakhalobe okhutsia mwisabo liamatili elo.

²⁰Khunyanga eyo, amakhuwa kakhasaarwe khubikhuli bietsifarasi akaboola, “Eyaahuulwe okhuba indakatifu khulwa OMWAMI Nyasaye.” Tsinyungu tsili Muhekalu ya OMWAMI Nyasaye tsiakhabe shinga ebirobotobo etsibetsanga imbeli weshimalilo shiemisango.

²¹Ne buli inyungu mu Yerusalemu nende mu Yuda yakhabe indakatifu khu OMWAMI Nyasaye mwene mahe kho mbu, boosi abakhetse okhumukholela omusango bakhekhoonyele inyungu ndala khutsio khulwa okhuteeshelamwo inyama yomusango. Khunyanga eyo, omukholi wobukhala[1] yesi shiyakhabekhwo muhekalu ya OMWAMI Nyasaye mwene mahe tawe.