Read wanga ZAKARIA 2 Bible Online

ZAKARIA 2 - wanga bible

ZAKARIA 2

¹Mwilolelo lindi ndalola omundu natiilile omukoye kwokhuchela mumukhonokwe.

²Mana nemureeba endi, “Otsitsanga heena?” Naye niyangalusia ari, “Enzitsanga okhuchela litookho lia Yerusalemu, emanye oburambi nende obuchikha bwalio”.

³Mana omumalaika wali naboolilenje ninasi nasita hambeli, ne omumalaika undi niyetsa okhumwakaanila.

⁴Kho omumalaika owali naboolilenje ninasi oyo naboolela owashie ari, “Tsia tsimbilo, oboolele omubuukha ouli nomukoye kwokhuchela oyo mbu, litookho lia Yerusalemu lilabamwo abandu abanji nende emiruko eminji. Lilaba likhongo muno, elilanyala okhusirwa namasiisi tawe.”

⁵Okhuba OMWAMI Nyasaye aboola ari, “Isie omwene ndalekhola lisiisi liomulilo okhulinda litookho elo tsimbeka tsiosi, khandi ndalalimenyamwo muluyali lwanje lwosi.”

⁶OMWAMI Nyasaye aboola ari; “Buushe bwangu! Buushe bwangu! Yilushe murule mushialo shiemasaba, eshia ndamusalaasiamwo tsimbeka tsiosi.

⁷Buushe bwangu mukalushe Zayuni, inywe mwesi abali mubuhambe mushialo shia Babuloni.”

⁸Okhuba OMWAMI Nyasaye mwene mahe aboolela amahanga akakhuyaaya ari, “Omundu yesi oumutiilakhwo abetsanga natiilile khundolelo yeimoni yanje.

⁹Lola isie omwene ndalalwana ninabo, nebakhola okhuyaaywa nende abandu ababeelenje abasumba babwe. Olwa ako koosi kaliikholekha, nolwa abandu boosi bakhamanye mbu, OMWAMI Nyasaye omwene mahe niye owaaruma isie.”

¹⁰OMWAMI Nyasaye aboola ari, “Yimbe nimwikhoya inywe abandu ba Zayuni okhuba nditsanga okhumenya ninenywe.

¹¹Amahanga amanji kalanzitsila, nikekhola abandu banje, nasi ndalamenya hakari wenywe. Ne olwa ako kalikholekha nolwa mulimanya mbu, OMWAMI Nyasaye omwene mahe niye owaaruma khwinywe.”

¹²OMWAMI Nyasaye yakhakhole Yuda okhuba omukabokwe omwahule mushialoshie eshitakatifu, nalio litookho lia Yerusalemu liakhabe litookho lia yaheela mumatookho koosi.

¹³Abandu boosi muholeele tsi imbeli wa OMWAMI Nyasaye, okhuba yetsanga narula mushimenyoshie eshitakatifu.