Read wanga ZAKARIA 3 Bible Online

ZAKARIA 3 - wanga bible

ZAKARIA 3

¹Mwilolelo lindi, OMWAMI Nyasaye yamanyia Yoshwa, Omwisaaliisi Omukhulundu nasinjiile imbeli womumalaika wa OMWAMI Nyasaye, naye Setani nasinjiile khumukhonokwe musaatsa, niyerecheeshe okhumufukula.

²Omumalaika wa OMWAMI Nyasaye naboolela Setani ari, “OMWAMI Nyasaye akhoya yakhukondeshela iwe Setani! Tooto OMWAMI Nyasaye owaahula litookho lia Yerusalemu akhoya yakhukondeshele! Omusaatsa uno ali shinga eshichienga shirusiibwe mumulilo?”

³Yoshwa, Omwisaaliisi Omukhulundu, yali nasinjiileho, nafwalile tsingubo etsifuulabile.

⁴Omumalaika oyo naboolela yabo abali nibasinjiileho ari, “Mufwalule tsingubo tsifuulabile etsio.” Ne naboolela Yoshwa ari, “Lola, emalile okhukhurusiakhwo obwonoonibwo, ne ndalakhufwala tsingubo tsioluyali.”

⁵Mana omumalaika oyo nalachilisia abakhalabanibe ari, “Bohe khumurwekwe eshilemba eshilayi.” Kho nibamufwala ebifwalo ebilayi, khandi nibamuboha eshilemba khumurwe, naye omumalaika wa OMWAMI Nyasaye yali nasinjiileho nahenganga.

⁶Mana omumalaika wa OMWAMI Nyasaye nasuubisia Yoshwa namuboolela ari,

⁷“OMWAMI Nyasaye mwene mahe aboola ari, ‘Noba nolonda amalako kanje nokhola koosi aka ndakhulaka, oba olatsiililila okhuba omusinjililili oweihekalu yanje nende tsinyanyi tsiayo. Nasi ndalahulila okhusaayakhwo shinga olwa ehulilanga okhusaaya khwabamalaika basinjiile hano bano.

⁸Ne bulano iwe Yoshwa, recheresia ekhuboole, iwe ouli Omwisaaliisi Omukhulundu, halala nabashio abali ninawe! Okhuba inywe muli eshilolelo shiamakhuwa aketsanga. Ndalamureerela omukhalabani wanje oulangwa mbu, Omurombo.’

⁹Okhuba OMWAMI Nyasaye mwene mahe aboola ari, ‘Ndalasaara amahandiko akeshilolelo shino khwichina liendeere imbeli wa Yoshwa, elili nobweni musafu. Ne khunyanga ndala butswa ndalarusiaho obwonooni bweshialo shino.’

¹⁰OMWAMI Nyasaye omwene mahe aboola ari, ‘Khunyanga eyo buli mulala khwinywe yakhalanje owashie mbu, betse bekhoye mumikunda chiemitsabibu nende chiemikhuyu.’ ”