Read wanga ZAKARIA 4 Bible Online

ZAKARIA 4 - wanga bible

ZAKARIA 4

¹Mana omumalaika owali naboolilenje ninasi yanzitsila khandi, niyambuusia shinga oubuusia omundu mundoolo.

²Niyareeba ari, “Ololanga shiina?” Nasi nemukalusia endi, “Endolanga eshichibi shietsitaha eshiakaasibwa shiosi khutsahabu, nishili neshikaye shiamafura hekulu washio. Khushichibi tsana tsilikhwo tsitaha musafu, ne buli itaha yili neminwa musafu echiokhwinjisiliamwo tsindambi.

³Ahambi khushio chiliho emisaala chibili chiemiseituni, mulala khumukhono omusaatsa nokundi khumukhono mukhasi.”

⁴Mana nereeba omumalaika oyo endi, “Omwami wanje, eshisina shiebindu bino nishiina?”

⁵Naye niyangalusia niyareeba ari, “Shiomanyile eshisina shiebindu bino tawe?” Nasi nemukalusia endi, “Omwami wanje, shiemanyile ta.”

⁶Omumalaika oyo niyamboolela mbu, emboolele Zerubabeli amakhuwa akarula khu OMWAMI Nyasaye kano endi, “Shiolahula khulwobunyali bwokhulwana lihe, noho khulwa amaaniko omwene ta, habula khulwobukhonyi bwa roho wanje, nolwa isie OMWAMI Nyasaye mwene mahe emboola.”

⁷Khandi nameeta okhuboola ari, “Kho kata iwe eshikulu eshirambi, oli shiina imbeli wa Zerubabeli? Alakhukwalaasia nakhukhola eshikuuri, naye alareera ebulafu lichina liene elieisiilo, nibalanjisia mbu ‘Obukoosia, obukoosia bube khulio!’ ”

⁸Mana khandi OMWAMI Nyasaye naboola ari,

⁹“Zerubabeli niye oukhupile omuse kweihekalu yino, khandi niye owakhachimalilisie. Olwa kano kakhekholeshe, nolwa abandu banje bakhamanye mbu, isie OMWAMI Nyasaye mwene mahe, nisie owakhuruma khubo.

¹⁰Okhuba abatseshelela obuchaachilo obuteshele, bakhekhoye olwa bakhalole Zerubabeli namalililanga okhuchiumbakha.” “Tsitaha musafu etsio tsimanyisinjia tsimoni musafu tsia OMWAMI Nyasaye, etsilolanga buli habundu khushialo shiosi.”

¹¹Mana nemureeba endi, “Ne emisaala chiemiseituni chibili chino, echili mulala khumukhono musaatsa nokundi khumukhono mukhasi kweshichibi shieitaha eshio chimanyisinjia shiina?”

¹²Khandi nemeeta okhumureeba endi, “Nako amasaka kabili ako, akemisaala chiemitseituni, akachetulushilanga amafura muminwa chieitsahabu nako kamanyisinjia shiina?”

¹³Naye niyareeba ari, “Shiomanyile shinga olwa kali ta?” Nasi nemukalusia endi, “Shiemanyile tawe, Omwami wanje.”

¹⁴Mana niyamboolela ari, “Amasaka kabili ako kamanyisinjia abandu babili abaahulwa, nibatsushililwakhwo amafura mbu, bamukhalabanilenje OMWAMI Nyasaye weshialo shiosi.”