Read wanga ZAKARIA 5 Bible Online

ZAKARIA 5 - wanga bible

ZAKARIA 5

¹Ndahenga khandi, nendola eshitabu eshikanye nishipuluushe mumuuya.

²Omumalaika oyo niyareeba ari, “Nishiina eshiololanga?” Nasi nemukalusia endi, “Endolanga eshitabu eshikanye nishipuluushe mumuuya. Oburambi bwashio bwali obuhela hambi tsimiita shienda, nabwo obuchiikha bwashio tsimiita tsine neinusu.”

³Mana niyamboolela ari, “Eshitabu eshio shilimwo eshilaamo shiobubi, eshitsia okhuba khubandu boosi khushialo. Okhuba khulubeka lulala shiahandikwakhwo mbu, omwifi yesi yesi alaakamibwa narusibwaho khushialo. Ne khulubeka lundi shiahandikwakhwo mbu, omundu yesi yesi owitsubila obubatsa, yesi alaakamibwa narusibwaho khushialo ario.

⁴OMWAMI Nyasaye mwene mahe aboola ari, Isie omwene ndalaruma eshilaamo shiobubi shino, nashio shilenjila munzu yomwifi nende eya oyo owitsubila eliira lianje naboola obubatsa. Nashio shilamenya munzu omwo nishichisasia, eshilama nende lisiisi biosi halala.”

⁵Mana omumalaika owaboola ninasi oyo nasita ahambi khandi, niyamboolela ari, “Henga olole eshindu shiitsanga eshio.”

⁶Nasi nemureeba endi, “Ni shiina eshio?” Naye niyangalusia ari, “Eshio neshimwelo shiobwonooni bwabandu mushialo shiosi.”

⁷Eshimwelo tsana shiali neshifuunikho, eshiakaasibwa khushibia. Eshifuunikho eshio shiachinguulwa, ne nendola omukhasi niyekhaale mushimwelo omwo.

⁸Omumalaika oyo niyamboolela ari, “Omukhasi oyo asinjiliile obumayanu.” Mana namusiinyila mushimwalo omwo, nashifuunikhakhwo eshifuunikho eshio khandi.

⁹Mana nehenga ikulu, nendola abakhasi babili nibetsanga ewa ndali. Bali nibapulushilanga khumuyeka, nibali netsimbaha tsisiro shinga tsielikuuyi. Babukula eshimwelo eshio nibapulukha nibatsia ninashio.

¹⁰Ne nereeba omumalaika oyo endi, “Bayilanga hena eshimwelo eshio?”

¹¹Naye niyangalusia ari, “Bashiyilanga mushialo shia Shinari, ewa betsa okhushiumbashilayo Ihekalu. Ihekalu tsana olwa niyibe niyimalile okhuumbakhwa, eshimwelo eshio nishirenjekhwemwo khulwa okhwinamilwa.”