Read wanga ZAKARIA 6 Bible Online

ZAKARIA 6 - wanga bible

ZAKARIA 6

¹Mana khandi ndalola lilolelo lindi. Ndalola amakaari kane niketsanga okhubirira hakari webikulu biomukasa bibili.

²Likaari liambeli liali likhwesungwa nende tsifarasi tsia ratieli, eliakhabili liali nilikhwesungwa nende tsifarasi tsimali,

³eliakhataru liali likhwesungwa nende tsifarasi tsia rachaari, nalio eliakhane nende tsifarasi tsieshikoshakoshe.

⁴Mana nereeba omumalaika owali naboolile ninasi endi, “Omwami wanje, amakaari kano kamanyisinjia shiina?”

⁵Naye niyangalusia ari, “Chino nemiyeka chine echirulanga mumbeka tsine etsiomwikulu. Chiakhabetsanga imbeli wa OMWAMI Nyasaye mwene eshialo shiosi, ne bulano chirula nichitsia.

⁶Likaari likhwesungwa nende tsifarasi tsimali litsitsanga mushialo shiemasaba, elikhwesungwa netsifarasi tsia rachaari litsitsanga mushialo shiamumbo, nalio elikhwesungwa nende etsieshikoshekoshe litsitsanga mushialo shiemulambo.”

⁷Olwa tsifarasi etsio tsiali nitsirulanga, tsiali nitsiyobile okhutsia okhulambuula eshialo. Omumalaika natsiboolela ari, “Bulano tsie mulambuule eshialo.” Natsio nitsitsia okhulambuula eshialo.

⁸Mana omumalaika oyo nalanjilisia nomwoyo omukhongo niyamboolela ari, “Lola, tsifarasi etsitsiile mushialo shiemasaba tsihotselesiiye liruma lia OMWAMI Nyasaye.”

⁹OMWAMI Nyasaye yambelesia oburume buno.

¹⁰Yamboolela ari, “Bukula ebihaanwa ebirula khubahambe bali Babuloni, ebireerirwe nende Helidai, Tobiya nende Yedaya. Tsia bwangu inyanga yino ingo wa Yosia omusiani wa Zefania, ewa abandu bano batsiile olwa betsile okhurula Babuloni.

¹¹Obukule itsahabu nende ifeetsa ya bareerire, okaasie olusimbi khubio, mana ofwale khumurwe kwa Omwisaaliisi Omukhulundu Yoshwa, omusiani wa Yehozadaki.

¹²Mana omuboolele ori, OMWAMI Nyasaye mwene mahe aboola mbu, ‘Uno niye oulangwa mbu, Olusaka. Ye alaralila aha ali hano, khandi alombakha obuyia Ihekalu ya OMWAMI Nyasaye.

¹³Niye owakhombashe Ihekalu ya OMWAMI Nyasaye. Yakhaheebwe oluyali lwomuruchi, khandi niye owakhekhale khushifumbi shioburuchi okhuruka abandube. Omwisaaliisi yakhasinjile hambi neshifumbishie shioburuchi, nabo babili bario bakhakholele emilimo halala mumulembe.

¹⁴Olusimbi olwo lwakhabetsenje muhekalu yanje shinga eshiitsulilo shia Helidai, Tobiya, Yedaya nende Yosia, omusiani wa Zefania.’

¹⁵“Abandu abamenyanga mubialo biehale bakhetse okhukhoonya okhumbakha obuyia Ihekalu ya OMWAMI Nyasaye.” Ne olwa baliba nibamalile okhuchiumbakha, nolwa mwakhamanye mbu OMWAMI Nyasaye omwene mahe niye owaruma isie khwinywe. Kano kakhekholeshe nimuba tooto nimulonda amalako ka OMWAMI Nyasaye wenywe.