Read wanga ZAKARIA 7 Bible Online

ZAKARIA 7 - wanga bible

ZAKARIA 7

¹Mumuyika kwakhane, omwesi kwa shienda nikuli khane, nikwo omwesi kwa Kisilewi Dario nali omuruchi, OMWAMI Nyasaye yaboolela Zakaria amakhuwa.

²Abandu abelitookho lia Betseli bali nibarumile Sharezeri nende Regemu-Meleki halala nende abandu babwe okhusaba tsikhabi okhurula khu OMWAMI Nyasaye.

³Khandi bali nibabarumile mbu, bareebe abesaaliisi beihekalu ya OMWAMI Nyasaye mwene mahe nende abalakusi amakhuwa kano bari, “Khutsiililile okhwikhuula nende okhwiyima ebiokhulia khulwa okhusaaya mumwesi kwakharano shinga olwa khwakholilenje khulwa emiyika eminji noho?”

⁴Mana OMWAMI Nyasaye mwene mahe niyamboolela ari,

⁵“Boolela abandu boosi khushialo nende abesaaliisi ori, ‘Kho mupaaranga mbu, khulwemiyika amakhumi musafu echiabirire, echia mwahonjilenje inzala khulwokhusaaya nende okhwikhuula buli khumwesi kwakharano nende okwa musafu, mwakholeelenje isie noho?

⁶Ne olwa muliitsanga nimunywa, shimukholanga murio khulwokhwikura inywe abeene noho?’

⁷Kano shikali niko amakhuwa aka OMWAMI Nyasaye yaboola okhubirira mubalakusi bambeli, mutsinyanga tsielitookho lia Yerusalemu, eliali niliayindihala khandi nililimwo abandu abanji, khandi mutsinyanga etsia abandu abanji bamenyanga mumataala akalibotokhana nende mulukongo lwemulambo nende khundulo khwebikulu ebili Mumbo.”

⁸OMWAMI Nyasaye yaboolela Zakaria ari,

⁹“Isie OMWAMI Nyasaye omwene mahe emboola mbu, khole obukhalachi bwa habwene, nimukholelana akeshisa nende okhubeelana tsimbabasi abeene khu beene.

¹⁰Shimulasandiakhwo abakhasi abalekhwa, abaana ababisandu, abarende, kata abamanani tawe. Khandi shimulaloosiakhwo mumioyo chienywe amakhuwa kokhusalisania abeene khu beene tawe.

¹¹“Nebutswa abandu banje baloba okhumbulila. Baakhupila omukongo nibasuba amarwi mbu, baleshe okhuhulila.

¹²Bomia emioyo chiabwe shinga olwanda, okhuba shibayenya okhuhulila amalako nende amakhuwa kanje isie OMWAMI Nyasaye omwene mahe, aka ndabarumila okhubirira mubalakusi ba khale tawe. Kho banyoola eshinyasio eshikhongo okhurula khwisie OMWAMI Nyasaye mwene mahe.

¹³Okhuba ndabalanga, ne nibalambulila ta, kho nabo olwa baahaabila siesi shindabakalusia likhuwa ta, nolwa isie OMWAMI Nyasaye mwene mahe emboola.

¹⁴Ndabasalaasia shinga eshimbalakusi, nebayila mumahanga kandi, ewa bamenya shinga abarende. Eshialo shiabwe shiasikala eshikhaya omundu yesi yesi nalamenyamwo ta, nashio eshialo shialinji eshiokhuchamisia shiakwisibwa likunda.”