Read wanga ZAKARIA 8 Bible Online

ZAKARIA 8 - wanga bible

ZAKARIA 8

¹OMWAMI Nyasaye mwene mahe yamboolela ari,

²“Endi neimbalikha ikhongo khulwa litookho lia Zayuni, imbalikha nende liruma elinji khubasuku balio.

³Ndalakalushila litookho lia Zayuni, nimenya mu Yerusalemu. Litookho lia Yerusalemu lilalangwa mbu, ‘Litookho elisiikwa,’ nashio eshikulu shianje isie OMWAMI Nyasaye mwene mahe shilalangwa mbu, ‘Eshikulu eshitakatifu.’

⁴Isie OMWAMI Nyasaye mwene mahe emboola mbu, abakofu nabashiele abachendelanga khumitunga balekhala mutsinyanyi tsia Yerusalemu khandi.

⁵Nachio emihanda chiomwitookho chiletsulamwo abaana abasiani nabakhaana nibabayilamwo.

⁶Isie OMWAMI Nyasaye mwene mahe emboola mbu, kano kanyala okhulolekha okhuba amatinyu khu abo abasikala khubelihanga, nebutswa shikali amatinyu khwisie tawe.

⁷Isie OMWAMI Nyasaye mwene mahe emboola mbu, ndalahonia abandu banje okhurula mushialo shiebukwe nende shia mumbo,

⁸mana ndalabareera okhumenya mu Yerusalemu. Balaba abandu banje nasi ndalaba Nyasaye wabwe mubwisiikwa nende mubulunjishi.”

⁹OMWAMI Nyasaye mwene mahe aboola ari, “Yume ikholo! Inywe muhulilenje amakhuwa kano okhurula khubalakusi abaliho olwa omuse kwokhumbakha obuyia Ihekalu yanje isie OMWAMI Nyasaye Omwene Mahe kwali nikukhupungwa.

¹⁰Okhuba mutsinyanga etsio, omurungo shikwalikhwoho khumilimo chiabandu bakholile, noho khu tsisolo tawe. Khandi kata obuteetswi shibwalikhwoho khubasuku khulwomundu ousamula kata ouchelela ta, shichila ndayakula buli mulala okhuseera owashie.

¹¹Nebutswa bulano shindalakholela abandu abatong'a bano shinga olwa ndakhola mutsinyanga tsia khale tawe. Nolwa isie OMWAMI Nyasaye omwene mahe emboola.

¹²Okhuba ebise bilabaho ebia balaraaka ebiraache biabwe mumulembe. Emitsabibu chilaama ebiamo ebinji, nalio liloba lilahaana ebichese bialio, khandi ifula yilabaho inyinji. Ndalahaana ebindu bino biosi okhuba obulaame khubandu banje abasikala.

¹³Inywe abandu ba Yuda nende aba Isiraeli, shinga olwa mwaloleshenje mutsinyanga etsiabira okhuba abandu abalaamwa eshilaamo shiobubi hakari wabamahanga, nolwa ndalamuhonia endio, nemukhola abetsikhabi. Kho tinye, nimularia tawe.”

¹⁴Okhuba OMWAMI Nyasaye mwene mahe aboola ari, “Olwa abaakuuka benywe baasinyisia, ndachooma okhubamulula, nendakalukhasia lichoomo lianje elio ta, nolwa isie OMWAMI Nyasaye mwene mahe emboola.

¹⁵Nebutswa bulano enduutsi mbu, ekholele abandu ba Yerusalemu nende aba Yuda amalayi, kho shimularie tawe.

¹⁶Aka mukhoyile okhukhola ngakano mbu, buli mundu aboolelenje owashie aka tooto, mukholenje obukhalachi bwa habwene mushiina khandi bube obwokhureera omulembe.

¹⁷Omundu yesi yesi mwinywe alapaarakhwo okhukholela owashie amabi ta, khandi shimulakholekhwo ebiitsubo biobubeeyi ta, okhuba isie ndasila ebikhole ebio, nolwa isie OMWAMI Nyasaye emboola.”

¹⁸OMWAMI Nyasaye mwene mahe yamboolela isie Zakaria ari,

¹⁹“Isie OMWAMI Nyasaye mwene mahe emboola mbu, tsinyanga tsiokhwihonjia inzala khulwokhusaaya, etsia mumwesi kwa khane, okwa kharano, okwa musafu nende okwekhumi tsilaba tsinyanga tsiobusaangaafu nende etsiokhwikhoya khubandu ba Yuda. Khulweshio muheele obwatooto nende omulembe.”

²⁰OMWAMI Nyasaye mwene mahe aboola ari, “Abandu okhurula mumahanga amanji nende abamenyanga mumatookho amanji bakhetse mwitookho lia Yerusalemu.

²¹Abandu abamenyanga mwitookho elala, bakhatsiile abashiabwe mwitookho lindi nibababoolela bari, ‘Yitse khutsie bwangu khumwinamile OMWAMI Nyasaye mwene mahe, khandi khumusabe akhulaamile tsikhabi, isie erulile enzitsanga.’

²²Abandu okhurula mumahanga amanji kata akali nobunyali bakhetse mu Yerusalemu okhunzinamila isie OMWAMI Nyasaye mwene mahe nibaasaaya ebalaamile tsikhabi.

²³Isie OMWAMI Nyasaye mwene mahe emboola mbu, olwa kano kakhekholeshe, abandu ekhumi okhurula mumahanga aketsinimi tsindi bakhahaande khungubo ya Omuyahudi nibamuboolela bari, ‘Lekha khutsie ninawe okhuba khuhuliile mbu, Nyasaye ali ninawe.’ ”