Read wanga ZAKARIA 9 Bible Online

ZAKARIA 9 - wanga bible

ZAKARIA 9

¹ OMWAMI Nyasaye yarumbula amakhuwa nafukula lihanga lia Hadiraki, khandi nende akakhetse okhukwila litookho lia Damasiko. Okhuba amatookho ka Siria ni aka OMWAMI Nyasaye, shinga olwa tsimbia tsia Isiraeli tsili.

²Obusasishi bulaba khwitookho lia Hamatsi elirondokhaane nende Hadiraki, khandi bulaba khumatookho ka Tiro nende Sidoni, kata nikelolanga mbu, kali nende obuchesi obunji.

³Tiro lieyumbashila olukoba olusiro, niliibunjishila ifetsa inyinji shinga omuyeshe, liebunjishila itsahabu inyinji shinga amatoyi kokhunjila.

⁴Nebutswa OMWAMI Nyasaye alalinuula ebia lili ninabio, nafuuba obuyinda bwalio munyanza, nalio eliene lilasambwa nomulilo.

⁵Litookho lia Ashikeloni lilalola kano mana litiilwe noburi, nalio elia Gaza lilakalakala musaalisibwa, kata Ekironi liosi, shichila obunaayi bwalio bulahwelelela. Gaza lilakosia omuruchi walio, nalio Ashikeloni lilakwa likunda.

⁶Olwibulo lwomutamba lulamenya mu Ashitoti, khandi omwene ndalaakamia obwichinjimisi bwa Abafilisiti.

⁷Shibaliliakhwo inyama eyilimwo amatsayi ta, khandi shibaliliakhwo ebiokhulia biomusilo tawe. Boosi baliba balala khubandu ba Nyasaye abatoong'a, baliba shinga abeshiliibwa shiabolwibulo lwa Yuda, nabo abandu ba Ekironi bakhabe shinga Abayebusi.

⁸Mana isie omwene ndililiinda eshialo shianje, kho mbu, abuleho ouburaburamwo, kata abandu ababi okhusandia abandu banje tawe. Okhuba isie omwene enduutsi netsimoni tsianje shinga olwa banyakhananga.

⁹Inywe abandu ba Zayuni, saangaale! Inywe abandu ba Yerusalemu, khupe tsingalakala! Lole, omuruchi wenywe amwitsilanga, yetsa nomwikhoyo nende obuhuli, yetuutuyiyie, yetsanga naniinile khusishili, yetsanga naniinile khushimoosi shieisishili.

¹⁰Alarusiaho amakaari kelihe mu Isiraeli, khandi alarusiaho tsifarasi tsiabelihe mu Yerusalemu; Obuyingo bwelihe bulasasibwa. Naye omwene alareera omulembe mumahanga koosi, alaruka okhurula khunyanza okhuula khunyanza yindi, khandi alaruka okhurula khumwalo kwa Yufurate okhuula khutsindulo tsieshialo tsiosi.

¹¹OMWAMI Nyasaye aboola ari, “Khulweindakano ya ndakaasia nineywe, eyaralisibwa namatsayi, ndalalekhuula ababohe benywe okhurula mubuko obubulamwo amaatsi.

¹²Inywe ababohe abali nobunaayi, kalushe mulukoba lwenywe, leelo luno emuboolela mbu, ndalamurunga namalayi akhandi khabili.

¹³Okhuba ndalekhoonyela Yuda shinga obuyingo bwanje, nalio lihanga lia Isiraeli shinga tsisele tsianje. Iwe Zayuni, ndalekhoonyela abandubo, shinga olukanga lwokhuseera abandu ba Ebugiriki, balaba shinga olukanga olwomulwani omululu.”

¹⁴Mana OMWAMI Nyasaye alalolekha hekulu khubandube, ne alalasa ebiselebie shinga tsimbenu. OMWAMI Nyasaye alakhupa olwika, nachendela mushimbalakuusi shiemulambo.

¹⁵OMWAMI Nyasaye mwene mahe alateetsa abandube, nabo balahula abasuku babwe nibasenachila hasi. Balakhupa tsimbungu mwihe shinga abameelile idivai, nibaraatsia amatsayi kabasuku babwe. Amatsayi ako kalasundukha shinga amatsayi komusango, akanyululusibwa khushimalilo shiomusango okhurula mushikaye.

¹⁶Khunyanga eyo, OMWAMI Nyasaye wabwe yakhabahonie, okhuba bo nabandube. Bakhang'inang'ine mushialoshie, shinga amachina akobukusi khulusimbi.

¹⁷Lolakhwo shinga olwa ali wobukondo obulayi khandi owokhuchamisia! Imele yilanesia abaraaka nayo idivai imbia yilanesia abakhaana ababuukha.