Read wanga MALAKI 1 Bible Online

MALAKI 1 - wanga bible

MALAKI 1

¹Buno nibwo oburume obwa OMWAMI Nyasaye yahelesia omulakusi Malaki okhuboolela Abaisiraeli.

² OMWAMI Nyasaye aboola ari, “Isie Ndamuheela.” Nebutswa nabo baareeba mbu, “Wakhuheela endiena?” Naye OMWAMI Nyasaye abakalusia mbu, “Esau shiyali omusiani wabwe Yakobo? Nebutswa ndamuheela Yakobo

³ne nendoba Esau. Ndasasia eshialo shiebikulu shia Esau khandi nendeshela amabwe akomushitsiimi okhuchendakhwo.”

⁴Abandu beinzu ya Esau, Abaedomu banyala okhuboola mbu, “Kata nikaba mbu Eshialo shiefwe shia Edomu shiasasibwa, khulashiumbakha khandi.” Nebutswa, isie OMWAMI Nyasaye omwene mahe emboola mbu, banyala okhushiumbakha obuyiakha nebutswa ndalashisasia khandi. Abandu balabalanga mbu, “Eshialo shiobwonooni, eshia OMWAMI Nyasaye yasinyishila inziayo.”

⁵Abandu ba Isiraeli balalola kano netsimoni tsiabwe mana baboole mbu, “Obunyali obwa OMWAMI Nyasaye buulanga kata elwanyi weshialo shia Isiraeli.”

⁶OMWAMI Nyasaye omwene mahe aboolela inywe abesaaliisi abafwolanga eliiralie mbu, “Omwana ahelesinjia omwibusiwe oluyali, naye omukholi ahelesinjia omwamiwe oluyali, isie nimba nendi seenywe, oluyali lwanje luli heena? Nimba nendi omwami wenywe, mbushiina shimumbesinjia oluyali ta? Nenyu muureebanga mbu, ‘Khukhulechile khurie?’

⁷Mundechile khulwa okhuhaana khushimalilo shianje ebiokhulia ebilali bioluyali ta. Khandi muureebanga mbu, ‘Khubulile khurie okhukhuhelesia oluyali?’ Olwa mulekanga eshimalilo shianje, nolwa mulambelesinjia oluyali tawe.

⁸Ne, shimulolangakhwo mbu, okhuhaana omusango kwomuruko okwabofula, noho okwalema, noho omuteshele nobubi ta? Teemekhwo okhuhaana omuruko shinga okwo khumuruchi. Mupaara mbu omuruchi alachamisibwa ninanywe noho okhumuhesia inywe eshia mwenya?”

⁹Khulweshio inywe abesaaliisi, saaye Nyasaye akhubeele ifwe tsimbabasi. Ebihaanwa shinga ebio nibiba nibirula mwinywe, toto mwene OMWAMI Nyasaye omwene mahe anyala okhumufuchilila inywe?

¹⁰OMWAMI Nyasaye omwene mahe aboola ari, “Omundu mulala niyakhabeleho mwinywe, owakhekale emiliango echia Ihekalu kho mbu muleshe okhuhafia emilimo echialakhoya khushimalilo shiemisango shianje. Shieyanzisibwe ninenywe ta, khandi shindalafuchililakhwo omusango kwosi okwamuhinilia tawe.

¹¹Abandu bamahanga koosi mushialo beetsoominjia eliira lianje okhurula khukhufwinda khweliuba okhuula khukhuyeela khwalio. Buli habundu hoosi, balasaambilangaho obubane nende okhuuhaanilaho emisango echikhoyeele, okhuba eliira lianje isie OMWAMI Nyasaye omwene mahe litsoomibungwa hakari wabwe.

¹²Nebutswa inywe abesaaliisi shimumbelesinjia oluyali olwa muboola mbu, eshimalilo shianje shiemisango shibula obukhala khandi olwa muhaanakhwo ebiokhulia ebiamuchayile.

¹³Muboolanga mbu, ‘Amakhuwa kano kakhuchonyiye muno!’ Ne mundechelesia. Mundeereranga emiruko echiibilwe, noho echialema, noho emiteshele mbu, chibe ebihaanwa. Nasi OMWAMI Nyasaye omwene mahe shindalafuchilila ebihaanwa shinga ebio okhurula khwinywe tawe.

¹⁴Ali mushilaamo shiobubii omukatii oyo oubukulanga eshitsubo okhumalila omusango kwomuruko omuheleleshe okhurula mumiruko chiichie nebutswa yahalilanga omusango okwomuruko okulakhoyele ta. Lola, isie OMWAMI Nyasaye omwene mahe endi omuruchi omukhongo, ne ndiinamilungwa nende abandu abomumahanga koosi.”