Read wanga MALAKI 2 Bible Online

MALAKI 2 - wanga bible

MALAKI 2

¹OMWAMI Nyasaye omwene mahe aboolela abesaaliisi ari, “Lino nililako elia mukhoyile okhuusia.

²Okhuula mumbelesie oluyali mubikhole bienywe. Ne nimuba nimulambulila ta, ndalamurakhwo eshilaamo shiobubi khandi tsikhabi tsienywe tsilakwa eshilaamo shiobubi. Toto mwene emalile okhutsikwisia endio okhuba shimuhulilanga lilako elo tawe.

³Ndalahelesia abaana benywe eshinyasio, khandi ndalabakha obweni bwenywe amasingo kemiruko chienywe chiemisango.

⁴Nolwa mulamanya mbu, ndamuhelesia lilako lino mbu, indakano yanje yibetsenjeho hakari wanje nende aboluyia lwa Lawi inziayo

⁵“Mundakano eyo, ndabalaka obulamu nende omuleembe, ne ebio nibio ebiandabahelesia kho mbu bambelesie oluyali, mutsinyanga etsio, bambelesia oluyali nende okhuria eliira lianje.

⁶Beechesinjia akobwatoto ne shibechesiakhwo akobubeeyi ta. Ndasanjilananga nibabo mumulembe. Shibakholanga butswa akali amalayi konyene ta, nebutswa bakhonya abanji okhulekha okhukhola amabi.

⁷Nomulimo kwabesaaliisi khwechesia abandu obuchesi bwahabwene khuka Nyasaye. Abandu bakhoyeele okhutsia khubo okhweka akandenya khubo, okhuba abesaaliisi nabarume aba OMWAMI Nyasaye omwene mahe.

⁸“Nebutswa inywe abesaaliisi mushiukhaane nimurula khunjila ya habwene. Ameebaalo kenywe kachoomiye abandu abanji mukhukhola akalakwanile ta. Mufunaache indakano ya isie OMWAMI Nyasaye omwene mahe ndakaasia ninenywe.

⁹Ne bulano ndalamukhola muchaywe nende okhulekwa nabandu boosi, okhuba shimwayambulila ta, khandi olwa mwechesia abandu banje, shimubakholelanga ebihelaana tawe.”

¹⁰Ifwe fwesi shikhuli nende papa mulala? Shiali Nyasaye mulala owakhulonga? Ne khulwa shiina khukhobananga abeene khu abeene, nikhwonoonia indakano eya OMWAMI Nyasaye yakaasia nende abakuuka befwe.

¹¹Abandu ba Yuda bafunaache akobusubisia khu Nyasaye khandi bakholile ekeshisinyo mu Isiraeli nende mwitookho lia Yerusalemu. Bafwolile Ihekalu eya OMWAMI Nyasaye yaheela. Khandi bateshiye abakhasi abenamilanga abanyasaye bebialo bindi.

¹²OMWAMI Nyasaye omwene mahe akhoya yeera abandu abolwibulo lwa Yakobo abakholanga amakhuwa ako. Ne shibalasangakhwo mukhuhinia obuloli noho okhureerera OMWAMI Nyasaye omwene mahe eshihaanwa ta.

¹³Kano khandi niko akamukholanga. Mwitsusia eshimalilo eshia OMWAMI Nyasaye nende amasika, mukhupa tsimbungu nende okhwikhuula okhuba shiafuchililanga ebihaanwa ebia mumuhinilinjia ta.

¹⁴Nenywe mureeba mbu, “Khulwa shiina shiabifuchililanga ta?” OMWAMI Nyasaye shiabifuchililanga ta okhuba yamanya mbu buli mulala khwinywe abasaatsa wafunaka indakano eyawakaasia nomukhasi owawateshia noshili omubuukha. Yali omukhasi wo, ne nawe wafunaka indakano eyawetsuba khuye, kata niwetsubila imbeli wa Nyasaye mbu wakhabe omusuubilwa khuye.

¹⁵Ne shiali Nyasaye owakhukholo okhuba omubili mulala khandi iroho ndala ninaye. Lichoomo liali shiina? Liali mbu munyoole abaana abali abandu ba Nyasaye. Shiolafunakakhwo eshiitsuboshio khumukhasiwo tawe.

¹⁶OMWAMI Nyasaye omwene mahe, Nyasaye wa Isiraeli aboola ari, “Ndasila okhulekhana khwomukhasi nomusaatsawe. Olwa omusaatsa alekhananga nomukhasiwe, shienjamanga tawe. Teeme mulole mbu, abulaho kata mulala khwinywe oulafunaka eshiitsubo shiokhuba abasuubilwa khubakhasi benywe.”

¹⁷Muchoonyiye OMWAMI Nyasaye namakhuwa kenywe. Nebutswa mureebanga mbu, “Khumuchoonyiye endiena?” Mumuchonyiye khulwokhuboola mbu, “OMWAMI Nyasaye alolanga omundu yesi oukhola amabi okhuba omulayi khandi achamisibungwa ninaye.” Noho okhureeba mbu, “Ali heena Nyasaye owobukhalachi bwa habwene?”