Read wanga MATAYO 10 Bible Online

MATAYO 10 - wanga bible

MATAYO 10

¹Yesu yalanga abarumebe ekhumi nababili halala nabahelesia obunyali okhurusia ebishieno nende okhuhonia obuteshele bwetsimbia tsiosi nende obulwale bwosi.

²Ne kano niko ameera kabarume ekhumi nababili abo, owambeli yali, Simoni, owalangwa mbu, Petero nende omusiani wabwe oulangwa mbu Andereya, Yakobo nende omusiani wabwe owalangwa mbu Yohana, abasiani ba Zebedayo.

³Filipo nende Batsolomayo, Tomasi nende Matayo omusololi wobushuru, Yakobo omusiani wa Alufayo, Tsadayo,

⁴Simoni omukananayo, nende Yuda Isikarioti, owakhoba Yesu.

⁵Yesu yabaruma ekhumi nababili abo nabalachilisia ari, “Shimulatsiekhwo mubamahanga kata mwitookho liosi liosi elia Abasamaria tawe.

⁶Nebutswa mutsiile amakondi akakora akoluyia lwa Isiraeli.

⁷Mana mutsie nimuyaala muri, ‘Obwami bwa Nyasaye buli ahambi!’

⁸Muhonie abalwale, nimulamusia abafwile, musiiye abobuchele, nimurusia ebishieno. Mwahebwa obularunga eshindu ta, nenywe muhaanenje obularungwa eshindu ta.

⁹Shimulabukulekhwo itsahabu kata ifetsa noho amapesa mumifuko chienywe ta;

¹⁰shimulachingakhwo omufuko okwokhusuma khuluchendo kata tsingubo tsindi, kata ebilaaro, kata indabushi tawe. Shichila omukholi wemilimo akhoyeele okhuhebwa ebiokhuliabie.

¹¹“Ne mwitookho liosi kata mwitaala liosi eliamwinjilamwo mukhabilisiemwo oukhoyele okhumwinjisia, mana mumenye ninaye okhuula olwa murulamwo.

¹²Ne olwa mwinjila munzu mubashiesie omulembe.

¹³Ne nikaba mbu, abandu abomunzu eyo bamwinjisia, kho amashiesio kenywe komulembe kabe ninabo. Ne nibalamwinjisia ta, emilembe chienywe chimukalushile inywe abeene.

¹⁴Ne omundu yesi yesi nalamwinjisia ta, kata okhuhulila akamuboola ta, olwa murula munzu omwo, noho mwitaala omwo, muteng'ulule olufu olwokhubilenje bienywe.

¹⁵Emuboolela toto mbu, khunyanga eyokhukhalaka eshiina, Nyasaye yakhabeele tsimbabasi abandu aba Sodomu nende Gomora okhushila abomwitookho elo!

¹⁶“Hulile! Emurumanga inywe shinga amakondi mubisutse. Mube abachesi shinga tsinzokha, ne abaholo shinga amahusi.

¹⁷Mwirecheshe okhuba abandu balamutiila nibamuyila mubiina, nibamunywekha netsikhoba nimuli mutsisinagogi tsiabwe.

¹⁸Khandi mwakhayilwe imbeli wabami, abaruchi nende abamahanga khulwanje, mbu mubayaalile Amakhuwa Amalayi.

¹⁹Ne olwa bamureera mushiina shimulahenda mbu naboole shiina noho mbu namuboole murie ta; olwa ebise biula, mulahebwa akamuboola.

²⁰Shichila shimuli inywe abalaboola ta, habula Roho wa Senywe niye oulaboolela mwinywe.

²¹“Abasiani bomunzu ndala balakhobana abeene khu beene okhwiirana, abasamwana balakhola bario khubaana babwe; abaana nabo bulabushila khubebusi babwe nibabeera.

²²Abandu boosi balamukiya khulwanje. Nebutswa yesi owifwila okhuula khushihesi alahonibwa.

²³Ne olwa bamusandia mwitaala elala mwilushile mulilondakhwo. Emusuubisia mbu, shimulamala emilimo chienywe mumataala koosi aka Isiraeli Omwana womundu nashili okhukalukha tawe.

²⁴“Abulaho omwechi oushilanga omwechesiawe ta; kata omusumba shiashila omwamiwe tawe.

²⁵Nobulayi omwechi okhuteema okhuba shinga omwechesiawe, kata omusumba okhuba shinga omwamiwe. Kho nibaba nibalanjile omwenengo mbu Belizebuli, shibalalanga abomungomwe ameera amabi muno!

²⁶“Khulweshio, shimularitsanga abandu ta, shichila libulaho elifuunishilwa, elilafuunulilwa ta, kata elibiswa, elilabisulwa tawe.

²⁷Akemuboolela mushiilima mukaboole habulafu, ne akamumonyelwa mushirwi mukarumbule ebulafu khu boosi.

²⁸Shimularitsanga abeera omubili ne nibalanyala okhwira omwoyo ta. Habula muritsenje Nyasaye ounyala okhusishia biosi, omwoyo nende omubili mumulilo okulasimanga tawe.

²⁹Okhuba onyala okhukula tsiminyi tsibili isende ndala, nebutswa kata iminyi ndala shiyinyala okhukwa hasi ahalali okhwenya khwa Senywe tawe.

³⁰Nebutswa inywe, kata liswi liokhumirwe chienywe liosi, Nyasaye alimanyile.

³¹Kho shimularitsanga ta, okhuba inywe mushila tsiminyi tsinyinji.

³²“Omundu yesi yesi naba niyeyama habulafu mbu, nomulondi wanje, nasi sieisi ndalamwiyama endio imbeli wa Papa wanje ouli Mwikulu.

³³Ne omundu yesi yesi ounzikaana habulafu, nasi siesi ndalamwikaana endio imbeli wa Papa wanje ouli Mwikulu.

³⁴“Shimulapaare mbu, ndetsa okhureera omulembe mushialo ta, habula ndetsa okhureera obukabukhani.

³⁵Ndetsa okhureera obukabukhani hakari womwana nende samwana, Omukhaana nende nyina, omukhasi womusiani nende nyakhufialanyene;

³⁶ne abasuku bomundu balaba abeinzuye beene.

³⁷“Yesi ouheelanga samwana noho nyina okhushila isie, shiakwanile okhuba omulondi wanje tawe. Yesi ouheela omusianiwe noho omukhaanawe okhushila isie, shiahelile okhuba omulondi wanje tawe.

³⁸Yesi oulekha okhwituukha omusalabakwe niyanondakhwo, shiakwanile okhuba omulondi wanje tawe.

³⁹Yesi outeema okhuhonia obulamubwe alabukosia; nebutswa yesi oukosia obulamubwe khulwanje alabunyoola.

⁴⁰“Omundu yesi oumwinjisia inywe yanzinjisia isie; ne yesi ounzinjisia isie amwinjisia oyo owaruma.

⁴¹Yesi owinjisia omulakusi owa Omwami shichila mbu nomulakusi, alanyoola omurungo kwomulakusi oyo. Ne yesi owinjisia omundu omulunjishi, shichila mbu nomulunjishi, alanyoola omurungo kwomulunjishi oyo.

⁴²Emuboolela toto mbu, omundu yesi ouhaana amaatsi amanyifu kokhunywa khumutiiti khubalondi banje bano shichila mbu nomulondi wanje, shialachweya okhunyoola omurungokwe tawe.”