Read wanga MATAYO 11 Bible Online

MATAYO 11 - wanga bible

MATAYO 11

¹Ne olwa Yesu yali namalile okhuhaana ameechesio ako khubeechibe ekhumi nababili, yarulaho natsia okhwechesia nende okhuyaala mumataala kabwe.

²Olwa Yohana Omubatiisi yahulila nali mumbohe aka Kristo yali nakholanga, yaruma abeechibe khuye.

³Abeechi abo nibareeba Yesu bari, “Niwe omwenoyo owa Yohana yasuubisia abandu mbu yakhetse, noho khulindilile oundi?”

⁴Yesu nabakalusia ari, “Mukalushe muboolele Yohana akamuhulilanga nende akamulolanga mbu,

⁵ababofu banyalilungwa okhulola, abalema bachendanga, abobuchele basiiyungwa, abatimbe bahulilanga, abafu balamusibungwa, ne abamanani bayaalilungwa Amakhuwa Amalayi.

⁶Nabeikhabi abobusuubili bwabwe bulatitihanga muisie tawe!”

⁷Olwa Abeechi ba Yohana bali nibenyokhanga, Yesu yachaaka okhuboolela abemikanda khu aka Yohana ari, “Olwa mwatsia khu Yohana mushitsiimi mwenyanga okhulola shiina? Olusi niluresibwa nomuyeka noho?

⁸Mwarula nimutsia okhulola shiina? Omundu owifwalile tsingubo tsindayi etsiobukusi noho? Abandu abefwala tsingubo shinga etsio bamenyanga mutsinzu tsiabaruchi!

⁹Kho nishiina eshiachila nimutsiayo? Okhulola omulakusi noho? Emuboolela toto mbu, ye ashilakhwo omulakusi.

¹⁰Uno niye Yohana, omwenoyo owa Amahandiko kaboolanga khuye mbu; ‘Lola, eruma omurume wanje imbeliwo, naye alakaasia injilayo imbeliwo.’

¹¹Emuboolela toto mbu, Yohana Omubatiisi nomukhongo okhushila omundu yesi owebulwakhwo mushialo muno. Nebutswa ouli omutiiti mubwami bwa Nyasaye ashila Yohana.

¹²Ne okhurula munyanga tsia Yohana omubatiisi yayaala oburumebwe okhuula bulano, Obwami bwa Nyasaye bulwanilungwa nabandu abamaani nibabwitsumba.

¹³Shichila abalakusi boosi nende amalako ka Musa balakula khukobwami bwomwikulu okhurula khunyanga tsia Yohana omubatiisi okhuula bulano.

¹⁴Ne nimuba nimwakhafuchilila oburume bwabwe, Yohana niye Eliya owali mbu alitsa.

¹⁵Kho ouli namarwi akokhuhulila lekha ahulile.

¹⁶“Bulano nishiina eshia ndakhachelasiakhwo abolwibulo lwa leelo? Bali shinga abaana abekhaale mushiiro. Omukanda mulala kulanjilisinjia okundi kuri,

¹⁷‘Khumwimbiile tsinyimbo tsiokhwikhoya, ne nimulashina ta! Khumwimbiile tsinyimbo tsieshibeela ne nimulekhuula ta!’

¹⁸Olwa Yohana yetsa, nahonga inzala nalanywakhwo idivai ta, buli mundu yaboola mbu, ‘Ali nebishieno.’

¹⁹Ne olwa Omwana womundu yetsa, nalia, nanywa, buli mundu yaboola mbu, ‘Lole, omundu uno nomulangu khandi nomunywi, omwitsa wabasololi bobushuru nende abonooni!’ Ne obuchesi bwa Nyasaye bulolesibungwa okhuba obwatoto okhubirira mubikhole biabwo.”

²⁰Abandu bomumatookho aka Yesu yakholamwo emilimochie chiamakana, shibayekalukhasia nibalekha obwonooni bwabwe ta. Mana Yesu nachaaka okhukondeshela abandu bomumatookho ako naboola ari,

²¹“Muli mushilaamo shiobubi inywe abelitookho lia Korasini! Muli mushilaamo shiobubi inywe abelitookho lia Betsisaida! Okhuba ebiamakana ebiakholwa mwinywe, biba nibiakholwa mumatookho ka Tiro nende Sidoni, khane baba bekalukhasia khale nibefwala amakunia, nibepuuka likoshe okhumanyia mbu bekalukhasiye.

²²Emuboolela toto mbu, khunyanga yeshiina, Nyasaye alibeela tsimbabasi abandu ba Tiro nende Sidoni okhushila inywe.

²³Ne inywe abelitookho lia Kaperinaumu! Mwenya okhwichinguula okhuula mwikulu? Muleshibwa okhuula emakombe! Akamakana akakholwa mwinywe nikaba niko akakholwa mwitookho lia Sodomu, liakhabele nilishiliho okhuula bulano!

²⁴Emuboolela toto mbu, khunyanga yeshiina, Nyasaye yakhabeele tsimbabasi abandu ba Sodomu okhushila inywe!”

²⁵Mubise ebio, Yesu naboola ari, “Papa, Omwami welikulu nende eshialo! Ekhupila orio, shichila wabisula amakhuwa ako khubasilu ne nokabisa khubachesi nende khubarechelefu.

²⁶Nakahabwene Papa, okhuba nolwa kakhukasila iwe mbu kekholeshe kario.

²⁷“Papa wanje yambelesia ebindu biosi. Abulaho oumanyile Omwana habula Papa, khandi abulaho oumanyile Papa habula Omwana, nende abo boosi aba Omwana yaahulanga okhubamanyisia khupapawe.

²⁸“Mwitse khwisie inywe mwesi abachonyile okhuchinga emisiko emisiro, nasi ndalamuhulusia.

²⁹Mubukule likokolo lianje mwifwale, mana mweche okhurula khwisie, okhuba isie endi omuholo khandi omwongoli mumwoyo, ne mulanyoola obuhuluushi.

³⁰Okhuba likokolo eliemuhelesia neliangu, ne khandi omusiko kwanje nomwangu.”