Read wanga MATAYO 12 Bible Online

MATAYO 12 - wanga bible

MATAYO 12

¹Mutsinyanga etsio, Yesu nabeechibe babirira mumikunda chieingano khunyanga eya Isabato; abeechibe bali inzala nibachaaka okhwimula ingano nibalia.

²Nebutswa olwa Abafarisayo babalola nibakholanga bario, baboolela Yesu bari, “Lola, abeechibo bakholanga akomusilo khunyanga eya Isabato.”

³Yesu nabakalusia ari, “Shimwasomakhwo aka Daudi yakhola, ye halala nende aba yali ninabo olwa bali nibali inzala ta?

⁴Yenjila munzu ya Nyasaye, mana ye, halala nende abandube nibalia emikaate echiahaanilwa Nyasaye. Ne lilako shiliali nibafuchilila ta, habula abesaaliisi bonyene nibo abali nibafuchililwa okhuliakhwo khumikaate echio.

⁵Kata shimwasomakhwo mumalako ka Musa mbu, buli khunyanga eya Isabato, abesaaliisi abali muhekalu bafunakanga lilako elia Isabato, ne shibaali neshikha ta?

⁶Nasi emuboolela mbu, aliho hano oushila Ihekalu.

⁷Amahandiko kaboolanga mbu, ‘Enzenyanga abalolesinjia tsimbabasi, tawe abakholelanga isie emisango.’ Nimwakhamanyile eshisina shiamakhuwa kano, shimwakhakhalachiile ababula eshikha eshiina tawe.

⁸Okhuba Omwana womundu niye Omwami owa Isabato.”

⁹Yesu yarulaho niyenjila musinagogi,

¹⁰ewa omundu owomukhono kwafwokoya yali. Abandu bandi baliho abenya okhwinjilila Yesu khulwokhufunaka amalako, kho nibamureeba bari, “Amalako kafuchililanga okhuhonia omundu khunyanga eya Isabato?”

¹¹Yesu nakalusia ari, “Niwiina khwinywe owakhaba nelikondi mana likwe mubwina oburambi khunyanga eya Isabato, ne nalekha okhulikhwesa nalirusiamwo?

¹²Omundu ashila likondi muno! Khulweshio amalako kafuchilila okhukhola akali amalayi khunyanga eya Isabato.”

¹³Mana naboolela omundu owomukhono kwafwokoya oyo ari, “Kololosia omukhonokwo.” Mana omundu oyo nakukololosia, ne nikuhona nikuba shinga okundi.

¹⁴Kho Abafarisayo nibarula musinagogi niberechekha shinga olwa banyala okhwira Yesu.

¹⁵Ne olwa Yesu yamanya mbu bali niberecheshe okhumwira, yarulaho, mana emikanda eminji nichimulondakhwo. Ne nahonia abalwale boosi,

¹⁶ne nabalaka mbu, baleshe okhuboolelakhwo abandu bandi aka yali nakholile.

¹⁷Yakhola ako kho mbu, aka Nyasaye yaboola okhubirira mumulakusi Isaya kosibwe mbu;

¹⁸“Lole, uno niye omukhalabani wanje omulobole, niye omuheelwa wanje, ounjamisinjia muno. Ndalamuramwo Roho wanje, naye alaboolela abamahanga boosi habulafu akobukhalachi bwanje bwahabwene.

¹⁹Shiyakhayingane kata okhulanjilisia, noho kata omundu okhuhulila oluyokalwe khumuhanda tawe.

²⁰Yakhabe omuholo khubateshele, khandi wetsimbabasi khubabula oubakhoonya. Yakhatsiililile ario okhuula olwa yakhakhole akahabwene okhuhula.

²¹Abamahanga boosi bakhabe nobunaayi muye.”

²²Mana abandu bandi nibareerera Yesu omundu omubofu, khandi oulanyala okhuboola ta, shichila yali neshishieno. Yesu nahonia omundu oyo, nikachila nachaaka okhuboola nende okhulola khandi.

²³Abemikanda boosi nibang'ang'aala khuka Yesu yali nakholile. Nibaboola bari, “Uno yakhaba Omwana wa Daudi noho?”

²⁴Ne olwa Abafarisayo bahulilakhwo kano, bakalusia nibaboola bari, “Ayininjia ebishieno shichila anyoolanga obunyali okhurula khu Belizebuli, omwami webishieno.”

²⁵Yesu namanya aka bali nibapaaranga, kho nababoolela ari, “Buli oburuchi obukabukhana mumikanda echilwana echiene khuchiene bulasasikha. Khandi litookho noho abeinzu abakabukhana mumikanda echilwana echiene khuchiene shibalaralila tawe.

²⁶Kho Setani naba niyakhaloonda Setani washie, aba yelwana omwene, kho oburuchibwe bwakharalila burie?

²⁷Muboolanga mbu, isie erusinjia ebishieno khulwa obunyali bwa Belizebuli. Kali habwene, ne bulano ouhelesinjia abalondi benywe obunyali bwokhubirusia niwiina? Akabalondi benywe bakholanga kamanyisinjia mbu akamuboolanga shikali akahabwene tawe.

²⁸Shierusinjia ebishieno khulwa obunyali bwa Belizebuli ta, habula khulwa Roho wa Nyasaye; akamasia mbu, Obwami bwa Nyasaye bumalile okhumwitsila.

²⁹“Abulaho ounyala okhwinjilila omundu owamaani munzuye mana ayaaye emianduchie, nalaranjiliile okhuboha omundu wamaani oyo, kho mana amuyaaye emianduchie tawe.

³⁰“Omundu oulakholanga halala ninasi ta, niye oufukulanga; ne omundu oulakhoonyanga okhubunjelesia ta, niye ousalasinjia.

³¹Khulweshio, emuboolela mbu, abandu bakhabeelwe tsimbabasi khulwa obwonooni bwosi bwosi nende amanyeko koosi koosi khu Nyasaye. Nebutswa omundu yesi yesi naba nanyeka Roho Omutakatifu, shiyakhabeelwekhwo tsimbabasi tawe.

³²Ne omundu yesi yesi oufukula Omwana womundu, yakhabeelwe tsimbabasi, nebutswa yesi yesi oufukula Roho Omutakatifu, shiyakhabeelwekhwo tsimbabasi tawe, kata mutsinyanga tsia bulano noho mutsiakhetse olunyuma.

³³“Omusaala omulayi kwamanga ebiamo ebilayi, ne omusaala omubi kwamanga ebiamo ebibi. Omusaala kumanyishilanga khubiamo biakwo.

³⁴Inywe abolwibulo lwetsinzokha, mwakhanyala murie okhuboola akali amalayi olwa muli ababi? Okhuba omunwa kuboolanga aketsuule mumwoyo.

³⁵Omundu omulayi, arusinjia mwibishilolie liebindu ebilayi, ebindu ebilayi, ne omundu omubi, arusinjia mwibishilolie liebindu ebibi, ebindu ebibi.

³⁶“Mumanyiile elala mbu, khunyanga yokhukhalachilwa eshiina, buli mundu alikhalachilwa okhulondana nende buli likhuwa liabutswa eliaboola.

³⁷Amakhuwako niko akakhakhukhalachile eshiina nikakhukhola okhuba omulunjishi noho oweshikha.”

³⁸Mana abandi khubeechesia aba Amalako nende Abafarisayo bamureeba bari, “Omwechesia, khwenya okhukholelekhwo eshilolelo shiamakana.”

³⁹Nebutswa yabakalusia naboola ari; “Abolwibulo olubi khandi olwobwilaasi bareebanga mbu baheebwe eshilolelo shiamakana, nebutswa shibalamanyibwa eshilolelo shindi ta, habula eshilolelo shiomulakusi Yona.

⁴⁰Shinga olwa Yona yali mukunyeni tsinyanga tsitaru eshilo neshiteere, nolwa Omwana womundu yesi yakhabe mung'ani ario tsinyanga tsitaru eshilo neshiteere.

⁴¹Khunyanga eyokhukhalachilwa eshiina, abandu ba Nineve bakhasinjile mumuse okhumukhalachila inywe eshiina, shichila bekalukhasia okhurula mubwonooni bwabwe, olwa bahulila Yona nayaala; kho emuboolela mbu, aliho hano omukhongo okhushila Yona!

⁴²Khunyanga yokhukhalachilwa eshiina, Omuruchi Mukhasi owa Sheba[4] yakhamukhalachile inywe eshiina, shichila yachenda okhurula mushialoshie niyetsa okhuhulila obwibaali bwobuchesi bwa Solomoni. Ne emuboolela mbu, aliho hano omukhongo okhushila Solomoni!

⁴³“Olwa eshishieno shirulanga mumundu, shitsitsanga nishibirira khushialo eshiumu nishikhaaba aha shihuluushila. Nishilanyoola ta,

⁴⁴nishiiboolela eshiene shiri, ‘Ndalakalukha munzu yali yanje.’ Ne olwa shikalukha nishianyoola mbu, inzu yatsana eyo niyikhaya, khandi mbu yeyilwe mana yikasiibwe obulayi,

⁴⁵nishikalukhayo shitsia okhulanga ebishieno bindi musafu ebibi muno, nibichelela okhumenyamwo. Ne olunyuma lwokhumwinjilamwo, omundu tsana aba obubi okhushilakhwo shinga olwa yali olwambeli. Ako niko akatsia okhwikholekha khubandu bolwibulo olumayanu lwa bulano.”

⁴⁶Yesu yali nashiboolanga nabandu, ne nyina nende abaana babwe nibolaho. Basinjila elwanyi nibenya mbu baboole ninaye.

⁴⁷Kho omundu mulala khubandu balimwo namuboolela ari, “Lola, mamawo nende abaana benywe basinjiile elwanyi benyanga okhuboolakhwo ninawe.”

⁴⁸Yesu nakalusia ari, “Mama wanje niye niwiina? Nabo abaana befwe nibeena?”

⁴⁹Kho yamala namanyia omukhonokwe khubeechibe naboola ari, “Lole! Bano nibo mama wanje nende abaana befwe!

⁵⁰Omundu yesi yesi oukholanga akokhwenya khwa Papa wanje ouli mwikulu, niye omusiani wefwe, niye omukhaana wefwe khandi niye mama wanje.”