Read wanga MATAYO 13 Bible Online

MATAYO 13 - wanga bible

MATAYO 13

¹Khunyanga yene eyo, Yesu yarula munzu natsia khuluchinga lweinyanza ne niyekhala hasi nachaaka okhwechesia.

²Emikanda emikhongo chiabandu nichikhung'anila aha yali, nikachila niyenjila muliaro niyekhalamwo, ne abemikanda abo nibasinjila khuluchinga.

³Yababoolela amakhuwa amanji mutsinjelo naboola ari, “Omumiitsi yatsia okhumiitsa imwo.

⁴Ne olwa yali namiitsanga, imwo yindi yakwa khunjila, ne amanyonyi niketsa nikachibootsa.

⁵Imwo yindi niyikwa khwiloba liokhulwanda, niyilaba neliloba elihela ta, niyimela lwangu okhuba liloba shiliali elinji tawe.

⁶Nebutwa lwomubasu kwasamba, yaniala ne olunyuma niyuma.

⁷Neyindi niyikwa hakari mumahwa, amahwa ako nikakhula lwangu nikachilundia.

⁸Nebutswa imwo yindi niyikwa khwiloba lilayi, mana niyama ebiamo ebinji; eyindi yama ebiamo eshikhumi shilala, eyindi amakhumi kasasaba, neyindi amakhumi kataru.”

⁹Mana Yesu namalilisia naboola ari, “Ouli namarwi ahulile!”

¹⁰Mana abeechi nibetsa khu Yesu nibamureeba bari, “Mbushiina noboolanga ninabo mutsinjelo?”

¹¹Yesu nakalusia nababoolela ari, “Inywe mwahebwa obumanyilisi bwokhumanya amabiso kobwami bwomwikulu, nebutswa bo shibahebwa tawe.

¹²Okhuba omundu ouli nebindu alaheebwa ebinji, kho mbu bishilaane, nebutswa omundu oulalikhwo neshindu ta, alanuulwa kata shitiiti eshiali ninashio.

¹³Emboolanga ninabo mutsinjelo shichila, bahenganga, ne shibalola ta; khandi bahulilanga, ne shibamanyilisia tawe.

¹⁴Kho obulakusi bwa Isaya busibwe khubo, obwa yalakula naboola ari, ‘Okhuhulila balahulila, nebutswa shibalatiila khushisina ta, balahenga, nebutswa shibalalola ta,

¹⁵shichila emioyo chiabwe nemisiro, amarwi kabwe kekaale khandi tsimoni tsiabwe tsiatimba, kho mbu bakhetsukhana nibalola netsimoni tsiabwe, nikahulila namarwi kabwe, ne emioyo chiabwe nichimanyilisia nabo nibangalushila isie, nasi nimbahonia.’

¹⁶“Nebutswa inywe muli neikhabi muno! Shichila tsimoni tsienywe tsilolanga khandi amarwi kenywe kahulilanga.

¹⁷Emuboolela toto mbu, abalakusi abanji nende abandu abalunjishi abanji, bekoomba okhulola aka inywe mulolanga, ne shibakalola ta; khandi beekomba okhuhulila aka inywe muhulilanga, ne shibakahulila tawe.

¹⁸“Bulano, rechelesie mumanyilisie eshisina shioluchelo lwomumiitsi.

¹⁹Olwa omundu yesi yesi ahulilanga likhuwa liobwami bwomwikulu, ne nalalimanyilisia ta, ali shinga imwo eyakwa khunjila. Omumayanu oyo yetsa lwangu nayinia likhuwa tsana eliamiitswa muye.

²⁰Ne imwo eyakwa khulwanda, yili shinga oyo oufuchililanga likhuwa elo lwangu nobusaangaali olwa alihulila.

²¹Nebutswa shilinjila muye ta, mana ahunzukha nalekha obusuubilibwe. Kho lwobutinyu noho obusandibwi bwitsa khulwa likhuwa, nakosia obusuubilibwe lwangu.

²²Ne imwo eyakwa mumahwa yili shinga oyo ouhulilanga likhuwa, nebutswa okhuhendela akobulamu bweshialo nende okhuchama obuyinda bweshialo, birusia muye likhuwa elo, ne shiyaama ebiamo tawe.

²³Ne imwo eyakwa mwiloba lilayi yili shinga oyo ouhulilanga likhuwa nende okhulimanyilisia. Omwenoyo yama ebiamo, ebihela kata eshikhumi, amakhumi kasasaba, noho amakhumi kataru.”

²⁴Yesu yababoolela oluchelo lundi ari, “Obwami bwa Nyasaye buli burinanwa; omundu yamiitsa imwo indayi mumukundakwe.

²⁵Ne eshilo, abandu nibali mundoolo, omusuku yetsa namiitsa libanze mungano eyo, ne narulamwo natsia.

²⁶Mana olwa ingano eyo yamela, niyikhula niyichaaka okhufumbara, nolwa libanze lialolekha nililimwo.

²⁷Abakhalabani ba mwene mukunda nibamwitsila nibamuboolela bari, ‘Omwami, shiwamiitsa imwo indayi mumukundakwo; ne libanze nalio lilimwo lirie?’

²⁸Nakalusia naboola ari, ‘Omusuku niye owakhola ako.’ Nibamureeba bari, ‘Wenya mbu khutsie khwiye nikhurusiamwo libanze elo noho?’

²⁹Naye nabakania ari, ‘Tawe, mwakhetsukhana mwakhung'asilia ingano mwibanze elio olwa muba nimuliyanga.

³⁰Leshe ingano nende libanze biosi bikhulile halala okhuula khwichesa. Ne khundukho yelichesa, ndiliboolela abachesi mbu, baranjilile okhwiya libanze nibalikhung'asia nibaliboha tsing'anda nibalisamba. Nayo ingano bakhung'asie nibachira mushiachi shianje.’ ”

³¹Yesu nababoolela oluchelo lundi ari; “Obwami bwa Nyasaye buli buri nanwa: Omundu abukulanga olufwa lwomutarakwe namiitsa mumukundakwe.

³²Olwene nolutuutu muno nochelaasia khubufwa bundi bwosi, nebutswa olwa lusebukha nilukhula, nilwikhola omusaala omukhongo okhushila echindi chiosi, khandi kata amanyonyi kombakha ebitsu mumasaka kakwo.”

³³Yesu nababoolela khandi oluchelo lundi ari; “Obwami bwa Nyasaye buli shinga limela eliomukhasi yabukula natsokaasia mubusie obuhela ebimwelo bitaru okhuula lwobusie bwosi bwafiimba khulwelimela.”

³⁴Amakhuwa ako koosi Yesu yaboolelanga abemikanda mutsinjelo. Shiyababoolelakhwo likhuwa liosi liosi halali mutsinjelo tawe.

³⁵Yakhola ario okhuusia akomulakusi yali niyaboola mbu; “Ndakhekhoonyele tsinjelo olwa emboola ninabo; ndakhabafwimbulile amakhuwa akabalaamanyakhwo okhurula khukhulongwa khweshialo tawe.”

³⁶Ne olwa Yesu yali nalekhaane nabemikanda yenjila munzu, abechibe nibamwitsila nibaboola bari, “Okhwinoosie eshisina shioluchelo lwelibanze liomumukunda.”

³⁷Yesu nababoolela ari, “Omundu owamiitsa imwo indayi, niye Omwana womundu;

³⁸omukunda nikwo eshialo; imwo indayi niyo abandu abalayi abomubwami bwa Nyasaye; libanze nilio abandu abalondi aba Omumayanu oyo.

³⁹Ne omusuku owamiitsa libanze, niye Setani. Nalio lichesa, nishio eshihesi eshieshise shino, ne abachesi, nibo abamalaika.

⁴⁰Kho shinga olwa libanze likhung'asibwa nilisambwa mumulilo, nolwa kakhabe kario, olwa eshihesi shieshise shino shiakhoole.

⁴¹Omwana womundu yakharume abamalaikabe nabo bakhakhung'asie ebisichirasio biosi nende abo abonoonanga.

⁴²Yakhabasukune mumulilo, ne ebweneyo bakhalile nibalimasia ameeno.

⁴³Mana abandu abalunjishi bakhaashe shinga eliuba mubwami bwa Sabwe. Abali namarwi bahulile.

⁴⁴“Obwami bwa Nyasaye buli shinga libishilo eliabiswa mumukunda, eliomundu yanyoola ne nalibisa; ne khulwa okhwikhoya yatsia nakusia ebia yali ninabio biosi, mana nakula omukunda okwo.

⁴⁵“Khandi Obwami bwa Nyasaye buli shinga omundu oukhabanga tsinyuma tsindayi.

⁴⁶Ne olwa anyoola yinyuma ndala yobukusi obunji, atsia okhukusia buli shindu eshiali ninashio, ne akula yinyuma eyo.

⁴⁷“Khandi Obwami bwa Nyasaye buli shinga olukhanda lwetsinyeni, olwasukunwwa munyanza mana nilutiila tsinyeni tsietsimbia tsiosi.

⁴⁸Olwa olukhanda olwo lwetsula, abanaabi balukalusia khulukuku nibekhala hasi nibatoola tsinyeni; tsindayi nibara mubibwelo, natsio tsimbi nibasukuna.

⁴⁹Nolwa kaliba kario olwa eshihesi eshieshise shino shiliula; abamalaika bakharule nibakhung'asia abandu abamayanu okhurula mubalunjishi.

⁵⁰Ne bakhabasukune mumulilo; ebweneyo bakhalile nibalimasia ameeno.”

⁵¹Yesu yareeba abeechibe ari, “Mumanyile eshisina shietsinjelo tsino?” Nibamukalusia bari, “Khumanyile.”

⁵²Kho nabakalusia ari, “Kano kamanyisia mbu, buli omwechesia wamalako owekhola omwechi wobwami bwa Nyasaye, ali shinga omwenengo ouyininjia mwibishilolie ebindu ebiyia nende ebikhulu.”

⁵³Olwa Yesu yamala okhuboola tsinjelo etsio yarulaho natsia,

⁵⁴ne nakalukha mwitaala liabwe lia Nazareti. Niyechesia musinagogi okhuula, olwa abandu bahuka nibareeba bari, “Yanyoola heena obuchesi burio nende akamakana kano?

⁵⁵Uno shiniye omwana owomubaatsi? Nyina shiali Mariamu? Ne shiali omwana wabwe Yakobo, Yosefu, Simoni nende Yuda?

⁵⁶Ne abakhaana babwe boosi shibamenyile ninefwe? Kho yanyoola heena amachesi kano?”

⁵⁷Mana nibamuloba. Yesu nababoolela ari, “Omulakusi shiabulanga oluyali ta, okhuyiniakhwo abomushialoshie nende abolwibulolwe beene, nibo abalamuhelesinjia oluyali tawe.”

⁵⁸Ne okhuba shibaali nobusuubili ta, shiyakholakhwo akamakana amanji ebweneyo tawe.