Read wanga MATAYO 14 Bible Online

MATAYO 14 - wanga bible

MATAYO 14

¹Mutsinyanga etsio, Herode omuruchi wa Galilaya yahulila ifuma ya Yesu.

²Naboolela abakhalabanibe ari, “Uno niye Yohana omubatiisi, alamuushe okhurula mubafu, niko akachila ali nobunyali bwokhukhola akamakana kano.”

³Herode niye owali niyatiila Yohana, nende okhumura mumbohe khulwa amakhuwa ka Herodia, omukhasi wa Filipo, owali omusiani wabwe Herode.

⁴Kekholekha kario shichila Yohana omubatiisi yali niyaboolela Herode ari, “Shikali habwene iwe okhuteshia Herodia tawe.”

⁵Herode yenya okhumwiira Yohana, ne naria Abayahudi, shichila bali nibafuchilila mbu, Yohana nomulakusi.

⁶Ne olwa inyanga yokhwitsulila okhwibulwa khwa Herode yola, omukhaana wa Herodia yashina imbeli womukanda kwosi. Herode nasangaala muno.

⁷Mana namusuubisia ari, “Nditsuba mbu, ndalakhuhelesia eshindu shiosi shiosi eshiawenya!”

⁸Naye natsuubilwe nende nyinamwana yaboola ari, “Mbelesia bulano omurwe kwa Yohana omubatiisi khulutelu luno!”

⁹Omuruchi oyo yabeelela, nebutswa khulwa okhwitsubakhwe okhwa yali niyetsubile imbeli wabacheni boosi, yalaka mbu omukhaana oyo ahelesibwe eshia yali niyenyile.

¹⁰Kho naruma omundu mumbohe okhukhalaka omurwe kwa Yohana.

¹¹Omurwe okwo kwareerwa nikuchinjilwe khulutelu nikuhebwa omukhaana oyo, naye nayilila nyinamwana.

¹²Abeechi ba Yohana betsa, nibabukula omubili kwa Yohana nibakuyabila, mana nibatsia nibaboolela Yesu.

¹³Ne olwa Yesu yahulilakhwo akali nikekholeshe khu Yohana, yenjila muliaro narulaho natsia mushitsiimi yenyene. Olwa abandu bahulila amakhuwa ako, barula mumataala kabwe nibachenda khubilenje nibamuloondakhwo.

¹⁴Ne olwa Yesu yarula muliaro, yalola omukanda omukhongo kwabandu, nabalolela tsimbabasi mana nahonia abalwale babwe.

¹⁵Khubwile abeechibe bamwitsila nibaboola bari, “Ebise bihwele, ne hano nimushitsiimi, seebula abandu batsie abeene bakule ebiabalia.”

¹⁶Yesu nababoolela ari, “Shibakhoyile okhutsia habundu undi ta, inywe mubahelesie ebiabalia.”

¹⁷Abeechi abo nibamukalusia bari, “Khuli butswa nemikaate chirano nende tsinyeni tsibili.”

¹⁸Nababoolela ari, “Ndeerere hano.”

¹⁹Mana nalachilisia abandu okhwikhala hasi, nabukula emikaate chirano echio nende tsinyeni tsibili etsio, nahenga mwikulu, ne nabisabila ikhabi. Nabisonyola nakabila abeechi, nabo abeechi nibakabila abemikanda abo.

²⁰Boosi nibalia nibekura. Mana nibakhung'asia ebisonye biatong'a, ne nibitsula ebimwelo ekhumi nabibili.

²¹Abalia bali abasaatsa abahela ebikhumila biraano (5,000), abakhasi nende abaana nibalabalilwe tawe.

²²Mana Yesu nanichilisia abeechi okhwinjila muliaro mbu bamuranjilile okhutsia injelekha weinyanza, naye nashiseebula abemikanda.

²³Ne olwa yali naseebule abemikanda, yatikulukha yenyene mushikulu, natsia okhusaaya. Olwa obwile bwola, yaliyo yenyene.

²⁴Eliaro liali niliakhoola munyanza hakari, nilirundungwa eyi nende eyi namarunda, shichila omuyeka kwali nikuhutsanga okhurula imbeli weliaro.

²⁵Mana eshialo nibutsia okhushia, Yesu yabetsela nachendanga khumaatsi.

²⁶Ne olwa abeechi bamulola nachendanga khumaatsi, ikholo yabarumukha nibaboola bari, “Shino neshishieno!” Ne nibayula obutinyu khulwa oburi.

²⁷Habwenaho Yesu nababoolela ari, “Tinye omwoyo, nisie, mularia tawe.”

²⁸Mana Petero namukalusia naboola ari, “Omwami, noba noli iwe toto, lachilisia enjende khumaatsi nindiitsa ewa oli eyo.”

²⁹Yesu namuboolela ari, “Yitsa.” Mana Petero niyekha okhurula muliaro nachaaka okhuchenda khumaatsi natsia ewa Yesu yali.

³⁰Nebutswa olwa yalola omuyeka omukhongo nikuhutsa, yaria mana nachaaka okhwiyinikha mumaatsi, ne nalanjilisia ari, “Omwami mbonia!”

³¹Lwangu Yesu nanyiila omukhono namutiila mana namuboolela ari, “Iwe owobusuubili butiiti, nishiina eshichilile nokanakania?”

³²Ne olwa boosi benjila muliaro, omuyeka kwalenjela.

³³Mana abeechi abali muliaro nibamwinamila Yesu, nibaboola bari, “Toto iwe oli Omwana wa Nyasaye!”

³⁴Ne olwa bali nibambushe inyanza boola mulukongo lwa Genesareti.

³⁵Ne olwa abandu bamanyilisia mbu ye niye Yesu, barumasia mumbali tsiosi mana abandu nibareerera Yesu abalwale boosi.

³⁶Nibamusaaya mbu afuchilile abalwale batiilekhwo butswa khwichemo lieinguboye, ne boosi abatiilakhwo, bahonibwa.