Read wanga MATAYO 15 Bible Online

MATAYO 15 - wanga bible

MATAYO 15

¹Mana abandi khu Abafarisayo nende abeechesia bamalako, barula Yerusalemu nibamwitsila Yesu, ne nibamureeba bari,

²“Mbushiina abeechibo nibalalondanga amechesio kabakuuka befwe bakhuhelesia tawe? Okhuba shibasaabanga amakhono nibashili okhulia tawe.”

³Yesu nabakalusia ari, “Ne mbushiina nenywe mufunakanga lilako lia Nyasaye nimuloonda akemilukha chienywe abeene?

⁴Okhuba Nyasaye yaboola ari, ‘Helesinjia papawo nende mamawo oluyali,’ khandi ari, ‘ounyeka samwana noho nyinamwana okhuula yerwe.’

⁵Nebutswa inywe mwechesinjia muri, ‘omundu naba neshindu eshianyala okhukhoonyela samwana noho nyinamwana,’ ne naboola ari, ‘Shino neshia Nyasaye,’

⁶shiakhoyile okhuhelesia samwana noho nyinamwana oluyali tawe. Kho munjila yino mufukulanga lilako lia Nyasaye khulwa okhuloonda emilukha chienywe abeene.

⁷Inywe abekaati! Omulakusi Isaya yali habwene olwa yarumbula akobulakusi khwinywe naboola mbu, Nyasaye aboola ari,

⁸‘Abandu bano, bambelesinjia oluyali mumakhuwa butswa, nebutswa emioyo chiabwe chili ehale khwisie.’

⁹Okhunzinamila khwabwe nokhwa butswa, shichila bechesinjia amalako kabandu akalali amalako kanje tawe!”

¹⁰Mana Yesu nalanga abemikanda mbu betse ewa yali, nababoolela ari, “Recheresie, mana mumanyilisie!

¹¹Shishili eshinjilanga mumunwa kwomundu eshimufwabinjia ta, habula akarulanga mumunwakwe niko akamufwabinjia.”

¹²Mana abeechi nibetsa nibaboola bari, “Omanyilekhwo mbu, Abafarisayo basinyiishe olwa bahuliile amakhuwa akoboolile ako?”

¹³Naye nakalusia naboola ari, “Buli eshiraache shia Papa womwikulu alaaraaka ta, shiakhasiulwe.

¹⁴Mulabateeba tawe! Nabemilisi ababofu. Ne omubofu niyemilila omubofu washie, boosi balakwa mubuko.”

¹⁵Naye Petero naboola ari, “Khwinoosie eshisina shioluchelo luno.”

¹⁶Yesu nababoolela ari, “Khane inywe mwesi shimuli nobumanyilisi ta.

¹⁷Shimumanyilisinjia tawe? Shiosi eshinjila mumunwa kwomundu shibira nishitsia munda mana shirula elwanyi.

¹⁸Nebutswa akarulanga mumunwa kabetsanga nikarulile mumwoyo, nako niko akafwabinjia omundu.

¹⁹Shichila okhurula mumwoyo karulangamwo amayililisio akobumayanu akobwiiri, akobuheyi, akobuyilani, akobwifi, okhububeeyi nende okhuchikha abandu.

²⁰Ako niko akafwabinjia omundu. Nebutswa okhulia nolasaabile amakhono ta, shikhufwabinjiakhwo omundu tawe.”

²¹Yesu yarulayo natsia mumbali tsia Tiro nende Sidoni.

²²Omukhasi omukananayo owali niyamenya mumbali etsio, yamwitsila nalanjilisia ari, “Omwana wa Daudi, umbeele tsimbabasi. Omwana wanje omukhaana ali nebishieno ebimunyasinjia muno.”

²³Nebutswa Yesu shiyamukalusia likhuwa ta. Abeechibe nibetsa nibamusaaya bari, “Museebule, okhuba alanjilisinjia nakhuloondakhwo!”

²⁴Ne Yesu namukalusia naboola ari, “Ndarumwa khubandu ba Isiraeli bonyene, abakora shinga amakondi akabula omwayi.”

²⁵Nebutswa omukhasi oyo yetsa nakwa hasi nasikama. Naboola ari, “Omwami ukhoonye!”

²⁶Yesu namukalusia ari, “Shibuli obulayi okhubukula ebiokhulia biabaana nosukunila tsimbwa tawe.”

²⁷Omukhasi oyo nakalusia ari, “Oli habwene Omwami, nebutswa kata tsimbwa tsiliitsanga khumbungulusi etsirulanga khumeesa yamwene tsimbwa etsio.”

²⁸Mana Yesu namukalusia ari, “Oli omukhasi owobusuubili obukhongo! Akawenya kekholeshe kario.” Khushise shiene eshio omukhaanawe nahona.

²⁹Yesu yarulayo nalondoola khunyanza ya Galilaya. Natikulukha mushikulu niyekhala hasi.

³⁰Mana emikanda emikhongo chiabandu nichitsia ewa yali, nibamureerera abalema, abafwokoya, ababofu, abalanyala okhuboola ta nende abandi abanji, naye nabahonia.

³¹Kho abemikanda bachenya olwa balola abalanyala okhuboola ta, nibaboola, abalema nibahona, abafwokoya nibachenda, nabo ababofu nibalola; ne nibamwitsoomia Nyasaye wa Isiraeli.

³²Yesu nalanga abeechibe, nababoolela ari, “Endolela omukanda kuno tsimbabasi, shichila bakhaba ninasi khulwa tsinyanga tsitaru, ne bulano babula eshiabalia. Shindenya okhubaseebula nibali inzala ta, okhuba bakhatorera khunjila.”

³³Abeechi nibamureeba bari, “Nihena mushitsiimi muno aha khwakhanyoola ebiokhulia ebihela okhuliisia omukanda kuno kwosi?”

³⁴Yesu nabareeba ari, “Muli nemikaate chinga?” Nibakalusia bari, “Khuli nemikaate musafu nende orunyeni rutiiti butswa.”

³⁵Kho Yesu nalaka abandu abo okhwikhala hasi.

³⁶Mana nabukula emikaate musafu echio nende orunyeni orwo, nakhupila Nyasaye orio, nabisonyola, nabihaana khubeechi; nabo abeechi nibabakabila abemikanda.

³⁷Boosi nibalia nibekura. Mana Abeechi abo nibakhung'asia ebisonye biasikala, ne nibitsula ebimwelo musafu.

³⁸Abalia bali abasaatsa ebikhumila bine (4,000), ne abakhasi nabaana shibabalilwakhwo tawe.

³⁹Mana Yesu nabaseebula, niyenjila muliaro natsia mutsimbali tsia Magadani.