Read wanga MATAYO 16 Bible Online

MATAYO 16 - wanga bible

MATAYO 16

¹Abandi khu Abafarisayo nende Abasadukayo betsa khu Yesu nibenya okhumureka namareebo, kho nibamureeba mbu abakholelekhwo eshiamakana, okhumanyia mbu ali nobunyali okhurula khu Nyasaye.

²Naye nabakalusia ari, “Khubwile muboolanga mbu, ‘Kulaba omuheso, shichila mbu likulu liakhaanye.’

³Ne mumabwibwi muboola mbu, ‘Ifula yeyimbumbuyeka yilakwa, shichila likulu liakhaanye khandi liliime.’ Mumanyile okhwahukhasia okhufwana khwelikulu, nebutswa shimunyala okhumanyilisia ebilolelo biebise bino tawe.

⁴Olwibulo luno olumayanu olubula obusuubili mu Nyasaye! Muureebanga eshilolelo? Tawe! Shimulahebwa eshilolelo shindi ta, habula eshilolelo shia Yona shionyene.” Mana nabarulakhwo niyenyokha.

⁵Olwa abeechi bambukha niboola injelekha weinyanza, betsulila mbu bali nibebiliile okhubukula emikaate.

⁶Yesu nababoolela ari, “Mubetsenje meeso, nimwilinda okhurula khwimela elia Abafarisayo nende elia Abasadukayo.”

⁷Nibachaaka okhuboolelana abeene khu beene bari, “Aboolanga ario shichila shikhuchinjilekhwo omukaate tawe.”

⁸Yesu namanyile aka bali nibaboolanga, yabareeba ari, “Mbushiina nimuboolanga abeene khu beene mbu shimulikhwo nomukaate kwosi kwosi ta? Muli nobusuubili butiiti burie?

⁹Mushili kata okhumanyilisia? Shimwitsulilanga emikaate chirano echia abandu ebikhumila biraano (5,000) balia, nende obunji bwebimweelo bia mwabunjelesia ta?

¹⁰Ne emikaate musafu echiabasaatsa ebikhumila bine (4,000) balia, echiatong'a mwetsusia ebimwelo binga?

¹¹Muli murie abalamanyilisinjia mbu shiemboolilenje khukemikaate tawe? Chetsihe khwimela elia Abafarisayo nende elia Abasadukayo!”

¹²Mana nibamanyilisia mbu shiyababoolelanga okhuchetsiha khwimela liemikaate ta, nebutswa khumechesio aka Abafarisayo nende Abasadukayo.

¹³Ne olwa Yesu yoola mumbali tsia Kaisaria Filipi, yareeba abeechibe ari, “Abandu baboolanga mbu, Omwana womundu niwiina?”

¹⁴Nibamukalusia bari, “Abandi baboolanga mbu, niwe Yohana Omubatiisi, nabandi baboolanga mbu Eliya, nabandi mbu Yeremia, noho mulala khubalakusi.”

¹⁵Nabareeba ari, “Nenyu, muboolanga mbu nisie wina?”

¹⁶Simoni Petero nakalusia ari, “Niwe Kristo, Omwana wa Nyasaye ouliho mwoyo.”

¹⁷Yesu namukalusia ari, “Oli oweikhabi iwe Simoni, omwana wa Yohana! Okhuba shiali omundu namundu oukhufwimbulile likhuwa lino ta; habula obuuliilwe nende Papa ouli mwikulu.

¹⁸Khandi ekhuboolela, iwe Petero mbu, niwe olwanda, ne khulwanda luno ndalombakhakhwo ikanisa yanje, ne kata lifwa shililachihula tawe.

¹⁹Ndalakhuhelesia tsifunguwo etsia Obwami bwa Nyasaye, ne shiosi shiosi eshioboha mushialo shilabohwa mwikulu, ne shiosi shiosi eshiobolola mushialo shilabololwa mwikulu.”

²⁰Mana Yesu nakania abeechibe mbu balaboolelakhwo omundu yesi yesi mbu niye Kristo tawe.

²¹Okhurula khushise eshio Yesu yachaaka okhuboolela abeechibe habulafu ari, “Okhuula enzie Yerusalemu, esandibwe muno nabakofu, abesaaliisi abakhulundu, nende abeechesia bamalako. Ndaleerwa ne olunyuma lwetsinyanga tsitaru ndalalamusibwa.”

²²Petero namuyila halubeka, nachaaka okhumukania obutinyu ari, “Nyasaye akhulinde Omwami! Kano kaleshe okhwikholekha khwiwe.”

²³Yesu nashiukhana nakondeshela Petero ari, “Rula imbeli wanje iwe Setani! Oli eshisichirasio khwisie, okhuba shioli owelubeka lwa Nyasaye ta, habula oli owelubeka lwabandu.”

²⁴Mana Yesu naboolela abeechibe ari, “Omundu yesi naba niyenya okhunondakhwo, okhuula yekaane omwene, achinje omusalabakwe mana yanondekhwo.

²⁵Okhuba owenya okhuhonia obulamubwe omwene alabukosia; ne oukosia obulamubwe khulwanje alabunyoola.

²⁶Kakhamukasila shiina omundu niyakhenyoolela eshialo shiosi, ne nakosia obulamubwe? Kata shiakhaba shiina eshiomundu yakhahaana khulwa okhuhonia obulamubwe?

²⁷Okhuba Omwana womundu aliitsa nende abamalaikabe muluyali lwa Samwana, mana alirunga buli shiamulala khu aka yakhola.

²⁸Emuboolela toto mbu; baliho khubasinjiile hano bano, abalibula okhufwa okhuula olwa balilola Omwana womundu niyetsa shinga Omuruchi.”