Read wanga MATAYO 17 Bible Online

MATAYO 17 - wanga bible

MATAYO 17

¹Olunyuma lwetsinyanga tsisasaba, Yesu yabukula Petero, Yakobo nende Yohana omusiani wabwe, nabemilila okhutikulukha mushikulu eshiraambi ewa bali bonyene.

²Olwa bali nibahenganga, likondolie liakalukhasibwa; obwenibwe nibwakha shinga eliuba, nebifwalobie nibing'inang'ina muno.

³Ne lola, Musa nende Eliya nibalolekha nibaboolanga nende Yesu.

⁴Mana Petero naboolela Yesu ari, “Omwami, nobulayi khube hano; nochama lekha enzumbashe hano amatili kataru, elala elilio, elindi elia Musa, nelindi elia Eliya.” .

⁵ Olwa yali nashiboolanga, lileesi ling'inang'inu liabafunikha, omwoyo nikurula mwileesi nikuboola kuri, “Uno niye Omwana wanje omuheelwa, owa enjamisibungwa ninaye; mumuhulilenje!”

⁶Olwa abeechi bahulila omwoyo okwo batiilwa noburi muno, ne nibakwa hasi mafumama.

⁷Nebutswa Yesu yetsa nabatiilakhwo naboola ari, “Buushe, mularie ta.”

⁸Olwa bachinguula tsimoni tsiabwe, shibaalola omundu undi ta, habula Yesu yenyene.

⁹Ne olwa bali nibakholomokhanga okhurula khushikulu, Yesu yabakania obutinyu naboola ari, “Shimulaboolelakhwo omundu yesi yesi lilolelo eliamuluutsi elo ta, okhuula olwa Omwana womundu alaba nalamuushe okhurula mubafu.”

¹⁰Mana abeechi abo nibareeba Yesu bari, “Mbushiina abeechesia bamalako nibaboola mbu, Eliya akhoyile okhuranjilila okhwitsa?”

¹¹Yesu nabakalusia ari, “Eliya toto alaranjilila okhwitsa, ne alarechekha ebindu biosi.

¹²Nebutswa emuboolela mbu, Eliya yamala okhwitsa khale, ne abandu shibamumanya ta, bamukholela koosi shinga olwa benya. Kho khandi Omwana womundu alasandibwa mumakhono kabwe.

¹³Kho abeechi nibamanyilisia mbu ababoolelanga aka Yohana Omubatiisi.”

¹⁴Olwa bachelela ewomukanda kwali, omusaatsa undi niyetsa khu Yesu namusikamila naboola ari,

¹⁵“Omwami, beelakhwo omwana wanje tsimbabasi, okhuba noweindulume, ne anyakhananga muno; okhuba akwitsanga mumulilo noho mumaatsi akhandi akhanji.

¹⁶Emureerire khubeechibo, ne nibalanyala okhumuhonia ta.”

¹⁷Yesu nakalusia naboola ari, “Inywe olwibulo olulasuubilanga khandi olumayanu, ndalabetsanga ninenywe okhuula liina? Ndalamwisumilisia okhuula liina? Ndeerere omwana tsana oyo.”

¹⁸Yesu nakondoshela eshishieno eshio, mana nishimurulamwo, ne khushise shieneshio omwana oyo nahona.

¹⁹Mana abeechi nibetsa khuye mumasilisi nibamureeba bari, “Mbushiina nikhulanyalilwe okhuyinia eshishieno eshio?”

²⁰Naye nabakalusia ari, “Khulwa obuleemu bwobusuubili bwenywe. Emuboolela toto mbu, nimwakhaba nobusuubili kata obuhela shinga olufwa lwomutarakwe, munyala okhuboolela, eshikulu shino mbu, ‘Rula hano, otsie halia,’ nashio shilatsia, ne eshindu shiosi shiosi shishilamukhayakhwo inywe tawe.”[5]

²²Olwa Abeechi bali nibekhung'asiye halala Galilaya; Yesu yababoolela ari, “Omwana womundu alahaanwa khubandu,

²³abalamwiira, ne khunyanga yakhataru alalamusibwa.” Abeechi abo nibabeelela muno.

²⁴Olwa Yesu nabeechibe boola Kaperinaumu, abasololi abobushuru obwarungungwa muhekalu betsa khu Petero nibamureeba bari, “Omwechesia wenywe arunganga obushuru obwa Ihekalu?”

²⁵Petero nakalusia ari, “Arunganga.” Ne olwa Petero yenjila munzu, Yesu yaranjilila okhumureeba ari, “Simoni, olola orie? Abaruchi bokhushialo khuno basololanga obushuru okhurula khu wina? Okhurula khubandu abebule belihanga liabwe noho okhurula khubarende?”

²⁶Ne olwa Petero yakalusia mbu, “Khubarende,” Yesu yamuboolela ari, “Khulweshio, abebule belihanga elo shibakhoyile okhurunga obushuru tawe.

²⁷Nebutswa shikhwenya okhusinyisia abandu bano tawe. Kho tsia munyanza ofubemwo olulobo. Ne inyeeni yoranjilila okhuloba, ohenje mumunwa kwayo, ne olanyoolamwo yirupia eyihela obushuru oburungungwa muhekalu, obwanje nende obubwo. Obukule yirupia eyo, mana orunje obushuru bwanje nende obubwo.”