Read wanga MATAYO 18 Bible Online

MATAYO 18 - wanga bible

MATAYO 18

¹Mubise ebio abeechi betsa khu Yesu nibamureeba bari, “Niwiina omukhongo muno mubwami bwa Nyasaye?”

²Mana nalanga omwana omutiiti namura hakari wabwe,

³nababoolela ari, “Emuboolela toto mbu, nimuba nimulekalukhasia mwaba shinga abaana ta, shimulinjilakhwo mubwami bwa Nyasaye kata nahatuutu tawe.

⁴Omundu yesi owitutuyia shinga omwana omutiiti uno, omwenoyo nomukhongo muno mubwami bwa Nyasaye.

⁵“Ne omundu yesi owinjisia omwana mulala shinga uno muliira lianje yanzinjisia isie.

⁶“Ne omundu yesi naba nachila mulala khubaana abatiiti bano, yalekha okhuba nobusuubili mwisie, bwakhabeele obulayi omundu oyo yabohwa okuchina okukali mwikosilie mana yasukunwa mulusiba lwomunyanza.

⁷Abandu bomushialo bali mushilaamo shiobubi khulwa amateemo akachila nibenjila mubwonooni. Okhuba amateemo toto kakhoyile okhubaho, nebutswa ali mushilaamo shiobubi omundu ouchila amateemo ako nibabaho.

⁸“Ne omukhonokwo noho eshilenjeshio nishiba nishiakhachila wenjila mubwonooni, oshikhalache mana oshisukune! Okhuba nobulayi khwiwe okhwinjila mubulamu bweinziayo, nobula omukhono noho eshilenje, okhushila okhuba namakhono nende ebilenje, ne osukunwe mumulilo okulasimanga tawe.

⁹Kata imoniyo niyiba niyakhachila wenjila mubwonooni, ochitsomole mana ochisukune! Okhuba nobulayi okhwinjila mubulamu bweinziayo noli neyimoni ndala, okhushila okhuba ninatsio tsiosi mana osukunwe mumulilo okulasimanga tawe.

¹⁰ “Mube meeso, muleshe okhuchaayakhwo kata mulala khubatiiti bano tawe. Okhuba emuboolela toto mbu, abamalaika babwe bomwikulu shibachweyanga okhuba nende Papa wanje womwikulu tawe.[6]

¹²“Mulola murie? Omundu niyakhaba namakondi eshikhumi (100), ne elala khuko nilikora, shiyakhalekha amakhumi shienda nende ashienda mubikulu ako, ne natsia okhukhaaba elala likorire elo noho?

¹³Ne niyakhanyoola likondi elo, emuboolela toto mbu, alaliikhoyela muno okhushila amakhumi shienda nashienda akalaakora ta ako.

¹⁴Khulweshio, papa wenywe ouli mwikulu shiyekombangakhwo mbu, kata mulala khubatiiti bano akore tawe.

¹⁵“Owashio naba nakhwonoonela, tsia omuboolele obubibwe nimuli ninaye mwenyene. Naba nafuchilila, mulaba mukalushe halala.

¹⁶Ne nalafuchilila ta, bukula omundu mulala noho babili mutsie ninabo, kho mbu babe abaloli khubuli likhuwa liamuboola.

¹⁷Ne naba nalafuchilila khandi ta, oboolele abasanji beikanisa, ne naba naloba okhufuchilila kata akabasanji, omuleshe abe shinga oweshibala noho omusololi owobushuru.

¹⁸“Kho emuboolela mwesi mbu, ebindu biosi ebia muboha mushialo, bilabohwa mwikulu, nebindu biosi ebia muboholola mushialo bilaba nibibohololwe mwikulu.

¹⁹“Khandi emuboolela mbu, babili khwinywe nibaba nibafuchilisania mushialo khwikhuwa liosi liosi eliabasaba, Papa womwikulu alabakholela shinga olwa benya.

²⁰Okhuba aha babili noho bataru bakhung'anila muliira lianje, embetsangaho ninabo.”

²¹Mana Petero niyetsa nareeba Yesu ari, “Omwami, omwana wefwe natsiililila okhunzonoonela, ndakhamuleshela okhuula khanga? Okhuula musafu noho?”

²²Yesu namukalusia ari, “Shiekhuboolela mbu, okhuula musafu ta, habula mbu, okhuula amakhumi musafu akhandi musafu.

²³“Khulweshio, Obwami bwa Nyasaye buchelasibwa nende omuruchi undi owekoomba okhumanyilisia okhurula khubakhalabanibe obunji bwemianduchie.

²⁴Ne olwa yachaaka okhubala, yareererwa oundi khubo, owali niyehola amapesa akahela ebikhumila ekhumi.

²⁵Ne omukhalabani oyo shiyali nende ebindu ebihela okhurunga likofi elo ta. Kho omuruchi oyo nalaka mbu omukhalabani oyo akusibwe, ye omwene halala nende omukhasiwe, nabaanabe, nemianduchie chiosi, khulwa okhurunga likofi elo.

²⁶Omukhalabani oyo nakwa mumakuluke, nasikama namusaaya ari, ‘Omwami, wisimilisie ndalakhurunga koosi.’

²⁷Omuruchi oyo, namulolela tsimbabasi, namuleshela likofi elo mana namulekhuula.

²⁸“Mana omusumba oyo narula natsia nanyoola oundi owokhubasumba bashie owali nelikofilie eliamapesa matiiti. Namukwakhwo mwikosi naboola ari, ‘Runga likofi lianje!’

²⁹Kho omukhalabani washie nakwa hasi, namusaaya, ari, ‘Wisimilisilie, ne ndalakhurunga!’

³⁰Naye nakhaya, namuyila mumbohe okhuula olwa yarunga likofi elo liosi.

³¹Ne olwa abasumba bashie balola akali nikekholeshe, babeelela muno, nibatsia nibaboolela omuruchi wabwe koosi akali nikekholeshe.

³²Kho omuruchi oyo nalanga omukhalabaniwe oyo namuboolela ari, ‘Iwe omukhalabani omumayanu! Ekhulesheele likofi elo liosi shichila usaayile mbu ekhuleshele.

³³Okhoyile okhuba nobeelele omukhalabani washio tsimbabasi; shinga olwa ekhubeelele!’

³⁴Omuruchi oyo nasinyikha, ne nara omukhalabani oyo mumbohe mbu asandibwe okhuula olwa arunga likofi elo liosi.”

³⁵Yesu namalilisia okhuboola ari, “Nolwa Papa wanje ouli mwikulu alimukholela omundu yesi yesi khwinywe oulabeela owashie obwonooni nomwoyokwe kwosi tawe.”