Read wanga MATAYO 19 Bible Online

MATAYO 19 - wanga bible

MATAYO 19

¹Olwa Yesu yali namalile okhuboola amakhuwa ako, yarula Galilaya natsia mungongo tsia Abayahudi injelekha womwalo kwa Yorodani.

²Emikanda emikhongo nichimuloondakhwo, naye nabahonia.

³Abafarisayo bandi nibetsa ewa yali nibamuteema khulwa okhumureeba bari, “Kali habwene omusaatsa okhulekhana nomukhasiwe khulwa eshifune shiosi shiosi eshia yenya?”

⁴Yesu nabakalusia ari, “Mushili okhusomakhwo Amahandiko akaboolanga mbu, mubuchachilo Omulonji yabalonga omusaatsa nende omukhasi ta?

⁵Ne Nyasaye naboola ari, ‘Khulweshio omusaatsa alalekhanga samwana nende nyinamwana, naliimana nomukhasiwe nabo boosi nibaba omubili mulala!’

⁶Kho shibashili babili khandi ta, habula nimulala. Kho aba Nyasaye aliimasiye halala, omundu namundu alabakabukhasia tawe.”

⁷Abafarisayo nibamureeba bari, “Kho mbushiina Musa nahaana lilako mbu, omusaatsa ahandichile omukhasiwe ibarwa eyokhwinoosia akachila nibalekhana mana amuloonde?”

⁸Yesu nakalusia ari, “Musa yamufuchilila inywe okhulekhana nabakhasi benywe shichila muli abemioyo emitinyu. Nebutswa shikali kario okhurula mukhuchaaka khwobulongwi tawe.

⁹Emuboolela mbu, omundu yesi yesi oulekhana nomukhasiwe khulweshifune shiosi shiosi nishilali eshiobuheyi ta, omusaatsa oyo naba nateshia omukhasi undi, aba naheyanga.”

¹⁰Abeechibe nibamuboolela bari, “Nikakhaba mbu kali kario hakari womusaatsa nende omukhasi, nobulayi okhulekha okhuteshia.”

¹¹Yesu nabakalusia ari, “Amechesio kano shikali akabandu boosi ta, habula aba Nyasaye anyalila bonyene.

¹²Biliho ebifune ebiahukhane ebichila abandu bandi nibalanyala okhuteshia ta. Balala bebulwa bario, abandi, nabandu ababakhola bario, nabo abandi shibateshinjia ta, khulwa Obwami bwa Nyasaye. Ounyala okhufuchilila amechesio kano lekha akafuchilile.”

¹³Abandu bandi bareera abaana khu Yesu mbu, abarekhwo amakhono nende okhubasaayila. Abeechibe nibabakondoshela.

¹⁴Yesu nababoolela ari, “Leshe abaana abatiiti betse khwisie, ne mulabakania ta, shichila Obwami bwa Nyasaye nobwabandu shinga bano.”

¹⁵Mana nabarakhwo amakhono ne narulaho natsia.

¹⁶Olundi omusaatsa undi yetsa khu Yesu naboola ari, “Omwechesia, nishiina eshilayi eshiekhoyile okhukhola kho mbu enyoole obulamu bweinziayo?”

¹⁷Yesu nakalusia ari, “Mbushiina niureeba eshili eshilayi? Aliho mulala yenyene ouli omulayi. Ne noba niwenya okhwinjila mubulamu bweinziayo, olinde amalako.”

¹⁸Omusaatsa oyo namureeba ari, “Amalako shiina?” Yesu nakalusia ari, “Shioleranga omundu ta, shiolaheyanga ta, shioleebanga ta, shiolachikhanga owashio ta.

¹⁹Helesinjia papawo nende mamawo oluyali; nende okhuheela owashio shinga olwa wiheela omwene.”

²⁰Omuraaka oyo namukalusia ari, “Ndalinda amalako ako koosi; nishiina eshindi eshiekhoyile okhukhola?”

²¹Yesu namuboolela ari, “Noba niwenya okhuba omulunjishi, tsia okusie ebia oli ninabio biosi, mana okabile abamanani amapesa, ne olaba nelibishilo mwikulu; mana witse unondekhwo.

²²Olwa omuraaka oyo yahulila ako yarulaho natsia nabeeleele, shichila yali omuyinda okhushila.”

²³Mana Yesu naboolela abeechibe ari, “Emuboolela toto mbu, nobutinyu muno omuyinda okhwinjila mubwami bwa Nyasaye.

²⁴Emuboolela khandi mbu, neliangu ingamia okhubirira munduhu yeisindani, okhushila omuyinda okhwinjila mubwami bwa Nyasaye.”

²⁵Ne olwa abeechi bahulila amakhuwa ako, bahuka muno. Ne nibamureeba bari, “Kho niwiina ounyala okhuhonibwa?”

²⁶Yesu nabahenga, nabakalusia ari, “Lino shilinyalikha khubandu ta, nebutswa khu Nyasaye ebindu biosi binyalikha.”

²⁷Mana Petero nakalusia nareeba ari, “Lola ifwe khwalekha ebindu biosi nikhukhulondakhwo, khwakhanyoole shiina?”

²⁸Yesu nababoolela ari, “Emuboolela toto mbu, olwa Omwana womundu alikhala khushifumbishie shioluyali mushialo eshiyia nilwo olwa inywe ekhumi nababili abalondi banje, mwesi mulikhala khubifumbi bioburuchi, nimukhalachila tsimbia ekhumi natsibili etsia Isiraeli eshiina.

²⁹Omundu yesi owalekha tsinzu noho abasiani babwe noho abakhaana babwe noho samwana nende nyinamwana, noho abaana noho emikunda khulwa isie, alinyoola ebindu akhandi eshikhumi kata okhushilakhwo. Khandi alihebwa obulamu bweinziayo.

³⁰Ne abanji abali imbeli baliba abokhumalilikha, ne abokhumalilikha baliba abeimbeli.”