Read wanga MATAYO 20 Bible Online

MATAYO 20 - wanga bible

MATAYO 20

¹“Obwami bwa Nyasaye buli buri nanwa; Yaliho omundu owarula mumabwibwi natsia okhuhandika abakhalabani abokhukhola emilimo mumukundakwe kwemitsabibu.

²Yalakana ninabo mbu alabarunga idinari ndala khunyanga, nikwo okwalinji omurungo kweinyanga ndala. Yabaruma okhukhola emilimo mumukundakwe kwemitsabibu.

³Yarula khandi natsia mushiiro ahambi saa tsitaru tsiomumabwibwi nalola abandu bandi nibasinjiile butswa nibalakholangakhwo emilimo chiosi chiosi tawe.

⁴Kho nababoolela ari, ‘Mutsie mwesi mukhole emilimo mumukunda kwanje kwemitsabibu, ne ndalamurunga inywe eshimukhoyela!’ Ne nibatsia.

⁵Mana ahambi isaa yakhasasaba nende eyashienda yakhola khandi ario.

⁶Ne ahambi khusaa yekhumi nandala khungoloobe, yarula khandi nanyoola abandu bandi nibasinjiile nabareeba ari, ‘Mbushiina nimusinjiile hano eshiteere shiosi nimulakholakhwo omulimo kwosi ta?’

⁷Nibakalusia bari, ‘Abulaho oukhuhandiche ifwe okhukhola emilimo ta.’ Nababoolela ari, ‘Mutsie mwesi khandi mukhole emilimo mumukunda kwanje kwemitsabibu.’

⁸“Olwa obwile bwola, omwene omukunda oyo, yaboolela omusinjilili wemilimochie ari, ‘Langa abakholi obahelesie omurungo kwabwe, okhuchaachila khubamaliliishe okhuhandikwa okhuula khubaranjiliile.’

⁹Ne olwa abo abahandikwa ahambi khusaa yekhumi nandala yokhubwile betsa, buli shiamulala nanyoola idinari ndala, okwali omurungo kweinyanga ndala.

¹⁰Kho olwa abali nibaranjiliile okhuhandikwa betsa okhurungwa, bapaara mbu balarungwa tsidinari tsinyinji. Nebutswa boosi khandi bahebwa idinari ndala, okwali omurungo kweinyanga ndala.

¹¹Babukula amapesa kabwe mana nibachaaka okhubuluulila omwene mukunda oyo,

¹²nibaboola bari, ‘Abandu bano abamalilishe okhuhandikwa bakholile emilimo khulwe isa ndala yonyene, nefu khwifwilile emilimo chieshiteere eshilamba nomubasu omululu, ne obarunjile omurungo okuhelana nende okwefwe!’

¹³Naye nakalusia mulala khubo ari, ‘Owashianje, shiekhukholeele libi liosi ta. Shikhulakane ninawe mbu ndalakhurunga omurungo kweinyanga ndala?

¹⁴Bukula omurungokwo mana otsie. Ndenya okhuhelesia ouhandikwe olwokhumalilikha uno eshihelana nende eshiekhuhele.

¹⁵Shiendi nobulekhuule khumapesa kanje okhukhola shinga olwa enzenya? Noho okhalishilwe omukongo shichila endi omuhaani?’ ”

¹⁶Mana Yesu namaliila okhuboola ari, “Kho abo abamalilikha baliba abeimbeli, ne abeimbeli baliba abokhumalilikha.”

¹⁷Ne olwa Yesu yali natikulukhanga Yerusalemu, yabukula abeechi ekhumi nababili abo shibeka, naboola ninabo bonyene khunjila ari,

¹⁸“Lole, khutikulukhanga Yerusalemu; ne Omwana womundu alahaanwa khubesaaliisi abakhulundu nende abeechesia abamalako. Nabo balamukhalachila okhwiirwa,

¹⁹mana bamuhane mumakhono aka Abamahanga, abalamutseshelela nibamunywekha netsikhoba nende okhumubamba khumusalaba, ne olunyuma lwetsinyanga tsitaru, Nyasaye alamulamusia.”

²⁰Mana nyinamwana abaana ba Zebedayo niyetsa khu Yesu halala nabaanabe abasiani babili, nasikama imbeliwe namusaba obukhoonyi.

²¹Yesu namureeba ari, “Wenyanga shiina?” Naye nakalusia ari, “Olachilisie mbu, abaana banje babili bano bekhale, mulala khumukhonokwo musaatsa, naye oundi khumukhonokwo mukhasi muburuchibwo.”

²²Ne Yesu nakalusia abasiani abo ari, “Mukorirwe eshiamusabanga. Munyala okhunywakhwo khushikombe eshiamanyakhano eshiendi okhunywa?” Nibakalusia bari, “Khunyala.”

²³Yesu nababoolela ari, “Toto, mulanywakhwo mushikombe shianje, nebutswa akokhwikhala khumukhono kwanje omusaatsa nende omukhasi shikali akanje okhuhaana ta, habula kabeene abo aba Papa wanje yakasilia.”

²⁴Ne olwa abeechi ekhumi bandi abo bahulilakhwo amakhuwa ako, basinyishila abeechi babili abo.

²⁵Kho Yesu nabalanga boosi halala nababoolela ari, “Mumanyile shinga abaruchi babandu bamahanga kandi barukanga abali hasi wabwe khandi shinga olwa abemilisi abo babarukanga obululu.

²⁶Ne shikalaba kario mwinywe tawe. Omundu wenya okhuba omukhongo mwinywe, okhuula abe omukhalabani wenywe.

²⁷Naye owenya okhuba owambeli, okhuula abe omusumba wenywe.

²⁸Nolwa Omwana womundu yesi khandi alayetsa okhukhalabanilwa ta, habula yetsa okhukhalabana, nende okhuhaana obulamubwe khulwa okhununula abanji ario.”

²⁹Ne olwa Yesu nende abeechibe bali nibarulanga Yeriko, omukanda omukhongo kwabandu kwamulondakhwo.

³⁰Ne lola, ababofu babili, abali nibekhaale khundulo weinjila bahulila mbu, Yesu yali nabirangaho. Kho nibachaaka okhulanjilisia nibaboola bari, “Omwami! Omwana wa Daudi! Okhubeele tsimbabasi.”

³¹Abomukanda abo nibabakondeshela nibababoolela mbu baholeele tsi. Nebutswa nabo nibameeta okhulanjilisia bari, “Omwami! Omwana wa Daudi! Okhubeele tsimbabasi!”

³²Yesu nasinjilaho, nabalanga ne nabareeba ari, “Nishiina eshia mwenyanga mbu emukholele inywe?”

³³Nibamukalusia nibaboola bari, “Omwami, khwenya mbu okhutimbule tsimoni tsiefwe khunyalilwe okhulola!”

³⁴Yesu nabalolela tsimbabasi, mana natiila khutsimoni tsiabwe. Ne habwene nahabwene nibachaaka okhulola, ne nibamulondakhwo.