Read wanga MATAYO 21 Bible Online

MATAYO 21 - wanga bible

MATAYO 21

¹Olwa Yesu nende abeechibe bali ahambi okhuula Yerusalemu, boola Betsifage, hashikulu shia Miseituni. Mana Yesu naruma abeechi babili imbeliwe

²nababoolela ari; “Mutsie mwitaala elihengaane ninenywe, habwene yaho mulanyoolaho isishili niyiboyilwe nende eshimoosi shiayo halala. Mubiboholole, mubindeerere.

³Ne omundu niyakhamureeba likhuwa liosi liosi mumuboolele mbu, ‘Omwami niye oubienya.’ Ne omundu oyo alamuhelesia bwangu.”

⁴Ako kekholekha khulwa okhuusia akaboolwa nende omulakusi mbu:

⁵“Muboolele abandu ba Zayuni mbu, lole, omuruchi wenywe yetsanga ewa muli. Nomuholo, ne yekhaale khusishili, khushimoosi shieisishili.”

⁶Abeechi nibatsia, nibakhola shinga olwa Yesu yali nababooleele.

⁷Nibareera isishili nende eshimoosi shiayo, nibabirakhwo ebifwalo biabwe, naye Yesu niyekhala khubifwalo biali khusishili ebio.

⁸Abandu abanji nibaala ebifwalo biabwe khumuhanda, ne abandi nibarema amasaka kemisaala nibaala khumuhanda okwo.

⁹Abandu abanji abali imbeliwe nende abali inyumawe balaanjilisia bari, “Omwana wa Daudi yetsoomibwe! Noweikhabi owitsa muliira elia Omwami! Nyasaye ouli hekulu mwikulu yetsoomibwe!”

¹⁰Olwa Yesu yenjila Yerusalemu, abandu boosi bomwitookho batsaatsahala muno, nibareeba bari, “Uno niwiina?”

¹¹Abemikanda nibakalusia bari, “Uno niye omulakusi Yesu, womwitookho lia Nazareti elili mulukongo lwa Galilaya.”

¹²Yesu yenjila muhekalu, nalonda abandu boosi abali nibakholelangamwo obukhala. Nafumamia tsimeesa nende ebifumbi biabandu abali nibafunjinjia amapesa nende abali nibakusinjia amakuuku.

¹³Ne nababoolela ari, “Kahandikwa mumahandiko mbu, Nyasaye yaboola ari, ‘Ihekalu yanje yilalaangwa mbu inzu yamasaayo.’ Nebutswa inywe muchikholile okhuba imbinga yabanuuli!”

¹⁴Ababofu nende abalema nibetsa khuye muhekalu, nabahonia.

¹⁵Nebutswa olwa abakhulundu babesaaliisi nende abeechesia bamalako balola ebiamakana bia yali nakholanga, khandi abaana nibalanjilisinjia muhekalu bari, “Omwana wa Daudi yetsoomibwe,” basinyikha muno.

¹⁶Kho nibareeba Yesu bari, “Ohulilanga akababoolanga?” Naye Yesu nabakalusia ari, “Embulilanga. Inywe mushili okhusomakhwo Amahandiko kaboolanga mbu, ‘Iwe Nyasaye wakhola abaana nende kata abashinuuna okhukhwitsoomia obwitsoomi bwa habwene’ ta?”

¹⁷Mana nabalekha narula mwitookho elo natsia Betsania, niyeyalisiayo eshilo eshio.

¹⁸Mumabwibwi olwa Yesu yali nakalukhanga mwitookho yahulila inzala niyimuluma.

¹⁹Nalola omukhuyu khundulo weinjila, natsia ewa kwali, ne nalanyoolakhwo eshiamo shiosi shiosi ta, habula amasafu konyene. Kho naboolela omukhuyu okwo ari, “Shiolaamakhwo ebiamo khandi tawe!” Habwene nahabwene omukhuyu okwo nikuniala.

²⁰Ne olwa abeechi balola ako bahuka nibareeba bari, “Omukhuyu okwo kunialile kurie lwangu butswa kurio?”

²¹Yesu nabakalusia ari, “Emuboolela toto mbu, nimuba nimusuubila ne nimulakanakania mumioyo chienywe ta, munyala okhukhola aka ekholile khumukhuyu okwo. Ne shikali kano konyene ta, nebutswa munyala okhuboolela eshikulu shino mbu, ‘Yichinje wisukune munyanza,’ ne nishikhola shirio.

²²Ne nimuba nimusuubila, mulanyola shiosi shiosi eshiamusaba olwa musaaya.”

²³Yesu nakalukha muhekalu; ne olwa yali niyechesinjia, abakhulundu babesaaliisi nende abakofu betsa khuye nibamureeba bari, “Nibunyali shiina obwoli ninabwo okhukhola ebindu bino? Niwiina owakhuhelesia obunyali buno?”

²⁴Yesu nabakalusia ari, “Ndalamureeba lireebo elala lionyene, ne nimuba nimungalusia, ndalamuboolela obunyali bwendi ninabwo obwokhukhola ebindu bino.

²⁵Obunyali bwa Yohana bwokhubatiisia bwarula hena? Bwarula khu Nyasaye noho khumundu?” Nibachaaka okhuyingana abeene khu beene bari, “Nikhwakhakalusia mbu, ‘Bwarula khu Nyasaye,’ alakhureeba ari, ‘Mbushiina nimulasuubilila Yohana?’

²⁶Ne nikhuboola mbu, ‘Bwarula khumundu,’ khuriire akabandu banyala okhukhola, shichila boosi basuubila mbu Yohana yali omulakusi.”

²⁷Kho nibakalusia Yesu bari, “Shikhumanyile tawe.” Naye nababoolela ari, “Kata siesi shiemuboolela mbu nibunyali shiina bwekholelanga ebindu bino ta.

²⁸“Mulola murie? Yaliho omundu owali nabasianibe babili. Natsia khumukhulundu namuboolela ari, ‘Mwana wanje, tsia okhole emilimo mumukunda kwemitsabibu.’

²⁹Omwana oyo nakalusia ari, ‘Shinzenya okhukhola tawe,’ nebutswa olunyumakhwo nakalukhasia amapaaroke mana natsia.

³⁰Mana samwana natsia khumwanawe undi namuboolela amakhuwa malala ako. Naye nakalusia ari, ‘Efuchilile papa, ndalatsia,’ nebutswa nalatsia tawe.

³¹Khubabili abo owakhola akasamwana yenya niwina?” Nibakalusia bari, “Omukhulundu.” Kho Yesu nababoolela ari, “Emuboolela toto mbu, abasololi bobushuru nende abatamba, bakhamuranjilila inywe okhwinjila mubwami bwa Nyasaye.

³²Okhuba Yohana Omubatiisi yetsa namumanyia injila inunji, ne shimwamusuubilila tawe. Nebutswa abasololi bobushuuru nende abatamba nibo abamusuubilila. Ne kata olwa mwalola ako shimwamala mwikalukhasie mumusuubilile tawe.”

³³Yesu naboola ari, “Rechelesie emuboolele oluchelo lundi. Yaliho omundu owaraaka omukunda kwemitsabibu, nakusirakhwo nolukaka, nayaba obwina obwokhutiinyilamwo emitsabibu, niyombakha omunaara kwabalindi. Mana nahosia omukunda okwo khubalimi, ne narula natsia mushialo shindi.

³⁴Olwa lichesa liola, yaruma abakholibe okhutsia khubalimi abo okhunyoola omukabokwe okhurula khwichesa elo.

³⁵Abalimi abo nibatiila abakholibe, mulala nibanywekha, oundi nibeera, noundi nibamulasa namachina.

³⁶Khandi naruma abakholibe bandi abanji okhushila abambeli, mana abalimi abo nibabakholela malala ako.

³⁷Olunyuma lwene yaruma omwanawe khubo, naboola ari, ‘Balahelesia omwana wanje oluyali.’

³⁸Nebutswa olwa abalimi abo balola omwanawe, baboolelana abeene khu beene bari, ‘Uno niye omwene obulaame bwomukunda kuno. Kho chende khumwiire, mana obulaame bulaba obwefwe!’

³⁹Kho nibamutiila nibamurusia mumukunda kwemitsabibu okwo nibamwiira.”

⁴⁰Yesu nabareeba ari, “Bulano mwene mukunda kwemitsabibu olwa yetsa, nishiina eshia alakhola khubalimi abo?”

⁴¹Nibamukalusia bari, “Aleera abandu ababi abo, mana ahosie omukunda kwemitsabibu okwo khubandu bandi, abalamuhelesia omukabokwe kwelichesa mubise ebikhoyeele.”

⁴²Yesu nababoolela ari, “Shimwasomakhwo aka Amahandiko akaboola mbu, ‘Lichina liene liabombashi baloba mbu libula inganga, bulano liikholile olwanzilo lwomukoona. OMWAMI Nyasaye niye owakhola ako, nako nakokhuhuchisia muno khwifwe ta!’

⁴³“Kho emuboolela toto mbu, Obwami bwa Nyasaye balarusibwa khwinywe nibuhelesibwa lihanga elibula ebiamo.”[7]

⁴⁵Abesaaliisi abakhulundu nende Abafarisayo olwa bahulila tsinjelo tsia Yesu ne nibamanya mbu aboolanga khubo,

⁴⁶bateema okhumutiila. Nebutswa baria emikanda, echiamulolanga okhuba omulakusi.