Read wanga MATAYO 22 Bible Online

MATAYO 22 - wanga bible

MATAYO 22

¹Yesu khandi yekhoonyela tsinjelo okhuboola nabandu, naboola ari,

²“Obwami bwa Nyasaye buli burinanwa; Yaliho omuruchi undi owakasilia omusianiwe lisabo lieshiselelo.

³Naruma abakholibe okhuboolela abali nibalaanjilwe mbu betse mwisabo, nebutswa baloba okhwitsa.

⁴Kho naruma abakholi bandi nende oburume buno khu abali nibalaanjilwe abo naboola ari, ‘Emalile okhurechekha lisabo lianje, tsiheyi nende ebimoosi bianera bisinzilwe, ebindu biosi birechekhwe. Mwitse mwisabo lieshiselelo!’

⁵Nebutswa abacheni abali nibalanjilwe abo nibalateeba omulango okwo ta. Mana nibatsiililila nemilimo chiabwe. Mulala natsia mumukundakwe, oundi khubukhalabwe;

⁶ne abandi nabo nibakwa khubakholi abo nibabakhupa nibabeera.

⁷Omuruchi nasinyikha, naruma abelihebe okhumulula abeeri abo nende okhusamba litookho liabwe.

⁸Mana naboolela abakholibe ari, ‘Lisabo lieshiselelo lirechekhwe, nebutswa abacheni abalangwa shibaliteebile eshindu ta.

⁹Kho mutsie khumihanda, mulaanje boosi abamunyolakhwo, betse mwisabo lieshiselelo.’

¹⁰Kho abakholi abo nibarula nibatsia khumihanda nibakhung'asia boosi ababanyalilwa okhunyoola, abalayi nende ababi. Inzu yelisabo niyitsulamwo abacheni.

¹¹“Omuruchi natsia okhulola abacheni abo, nalola omundu undi nafwalile tsingubo etsilali tsieshiselelo ta.

¹²Omuruchi namureeba ari, ‘Owashianje, winjiile muno orie nolafwalile tsingubo tsieshiselelo ta?’ Naye omundu oyo nalaboolakhwo eshindu ta.

¹³Mana omuruchi naboolela abakholibe ari, ‘Mubohe omundu uno amakhono nende ebilenje, mumusukune elwanyi mushiilima. Ebweneyo alalila nende okhulumasia ameenoke.’ ”

¹⁴Mana Yesu namalilisia naboola ari, “Abanji balaangwa, nebutswa nibatiiti abalobolwa.”

¹⁵Abafarisayo barula nibatsia okhwirechekha shinga olwa bakhareka Yesu namarebo.

¹⁶Nibamurumila abeechi babwe nende abandi khubomukanda kwa Herode. Nibaboola bari, “Omwechesia, khumanyile shinga lwoboolanga akatoto. Wechesinjia akobwatoto khukokhwenya khwa Nyasaye, nolateeba akabandu bapaara ta. Okhuba iwe shioteebanga obukhongo bwomundu tawe.

¹⁷Khuboolelekhwo, olola orie? Kali habwene okhurunga obushuru khumuruchi wa Roma?”

¹⁸Nebutswa Yesu namanya emireko chiabwe emibi, kho nababoolela ari, “Inywe abekaati! Muteemanga okhuureka mbushiina?

¹⁹Manyiekhwo amapesa akamwikhoonyelanga okhurunga obushuru!” Nibamureerera Idinari ndala.

²⁰Nabareeba ari, “Eshifwanani shia omurwe nende eliira ebili khudinari yino, nebiawina?”

²¹Nibamukalusia bari, “Nebia omuruchi wa Roma.” Kho Yesu nababoolela mbu, “Kho murunje khumuruchi wa Roma ebili ebia omuruchi wa Roma, ne khu Nyasaye ebili ebia Nyasaye.”

²²Olwa bahulila amakhuwa ako, bahuka, nibamulekha nibatsia.

²³Inyanga yene eyo, Abasadukayo bandi ababoolanga mbu, abandu shibalilamusibwa okhurula mubafu tawe, betsa khu Yesu.

²⁴Nibamureeba bari; “Omwechesia, Musa yaboola mbu, ‘Omundu nafwa nabula nabaana, omusiani wabwe akhoyile okhukalusia omukhasi omulekhwa oyo, yebulile omusiani wabwe abaana.’

²⁵Kho baliho abasiani musafu abomunzu ndala abamenyanga hano ninefwe. Owambeli nateshia, ne nafwa nalali nabaana ta. Omusiani wabwe nakalusia omukhasi omulekhwa oyo.

²⁶Kho malala ako nikekholekha khuwakhabili, khuwakhataru okhuula khu womusafu.

²⁷Olunyuma, omukhasi oyo namala yesi nafwa.

²⁸Bulano khunyanga eyabafu balilamusibwa okhurula mubafu, omukhasi oyo yakhabe owa wina? Okhuba yali niyateshela boosi?”

²⁹Yesu nabakalusia ari, “Mukorirwe, shichila shimumanyile aka Amahandiko noho obunyali bwa Nyasaye tawe.

³⁰Okhuba olwa abafu bakhalamusibwe, bakhabe shinga abamalaika bomwikulu, ne shibakhateshianie tawe.

³¹Ne okhulondana nende akokhulamusibwa khwabafu; mushili okhusomakhwo aka Nyasaye yamuboolela? Yaboola ari,

³²‘Nisie Nyasaye wa Aburahamu, Nyasaye wa Isaka khandi Nyasaye wa Yakobo.’ Ne shiali Nyasaye wabafu ta, habula owa abali mwoyo.”

³³Ne olwa abemikanda bahulilakhwo amakhuwa ako, bahuchisibwa muno nende ameechesioke ako.

³⁴Olwa Abafarisayo bahulila mbu Yesu aholelesiye Abasadukayo, bakhung'ana halala,

³⁵ne mulala khubo, owali omwechesia wamalako, namureeba khulwa okhumuteema ari,

³⁶“Omwechesia nelilako shiina likhongo muno mumalako koosi.”

³⁷Yesu nakalusia naboola ari, “ ‘Oheele OWAMI Nyasayewo nomwoyokwo kwosi, namapaaroko koosi nende amakaniko koosi.’

³⁸Lino nilio lilako likhongo muno khandi likhulundu mukosi.

³⁹Eliakhabili elili shinga elo ndielino mbu, ‘Oheele owashio shinga olwa wiheela omwene.’

⁴⁰Amalako ka Musa koosi nende amechesio kabalakusi keleetanga khumalako kabili kano.”

⁴¹Olwa Abafarisayo bakhung'ana halala Yesu yabareeba ari;

⁴²“Mupaara murie khumakhuwa ka Kristo? Nowomulwibulo lwa wina?” Nibamukalusia nibaboola bari, “Nowomulwibulo lwa Daudi.”

⁴³Nabareeba ari, “Kho nishiina eshiachila Roho niyemilila Daudi okhumulanga mbu, ‘Omwami’? Okhuba Daudi yaboola mbu,

⁴⁴‘Nyasaye yaboola khu Omwami wanje ari, Yikhala hano khumukhono kwanje musaatsa okhuula olwa era abasukubo hasi webilenjebio.’

⁴⁵Kho Daudi naba niyamulanga mbu, ‘Omwami,’ Kristo yakhaba arie owolwibulo lwa Daudi tsana?”

⁴⁶Abulaho owanyalilwa okhuhelesia Yesu likalusio ta, ne okhurula inyanga eyo abulaho omundu owatsaalikha okhumureeba amareebo kandi tawe.