Read wanga MATAYO 23 Bible Online

MATAYO 23 - wanga bible

MATAYO 23

¹Mana Yesu naboolela abemikanda halala nende abeechibe ari,

²“Abahandichi bamalako nende Abafarisayo nibo abali nobunyali bwokhwinoosia amalako ka Musa.

³Kho mukhoyile okhuhulila nende okhuloonda buli shindu eshia bamuboolela okhukhola. Nebutswa mulaloondakhwo ebikhole biabwe ta, shichila shibakholanga akabayaalanga tawe.

⁴Babohanga khumikongo chiabandu emisiko emisiro, khandi echiabalanyala okhuchinga ta. Nebutswa shibafuchililanga kata okhuchinguula eshiteere okhubakhoonya okhuchinga emisiko tsana echio tawe.

⁵Bakholanga koosi mbu abandu babalole. Okhuba bebohanga tsikhanda tsiamaseelo, etsiahandikwakhwo amalako mutsinyukuta tsikhongo khubweni bwabwe nende khwichemo lirambi liokhumakhono kabwe kho mbu baloleshe.

⁶Bachamanga okhwikhala khubifumbi habundu woluyali mumasabo nende ebifumbi bioluyali bieimbeli mutsisinagogi.

⁷Khandi bachamanga okhushiesibwa noluyali nibali mubiiro nende okhulangwa mbu, ‘Omwechesia.’

⁸Nebutswa inywe shimulafuchililekhwo okhulangwa mbu ‘Omwechesia,’ tawe, shichila mwesi muli abebule khandi muli nende omwechesia mulala yenyene.

⁹Khandi shimulalanjekhwo omundu yesi yesi khushialo khuno mbu, ‘Papa’ ta, shichila muli nende Papa mulala yenyene ouli mwikulu.

¹⁰Kata shimulafuchililekhwo okhulangwa mbu, ‘Abami’ tawe, shichila Omwami wenywe ni mulala yenyene, ne niye Kristo.

¹¹Omukhongo muno mwinywe okhuula abe omukhalabani wenywe.

¹²Omundu yesi owiyemekha omwene alatutuyibwa, naye owitutuyia omwene, alachinguulwa.

¹³“Muli mushilaamo shiobubi inywe abahandichi bamalako nende Abafarisayo. Inywe abekaati, mwikalilanga abandu omuliango kwokhwinjila mubwami bwa Nyasaye, ne kata inywe beene shimwinjilangamwo kata okhufuchilila abo abateemanga okhwinjilamwo tawe.[8]

¹⁵“Muli mushilaamo shiobubi inywe abahandichi bamalako nende Abafarisayo! Inywe abekaati! Mwelemanga khunyanza nende okhuchenda mubialo khulwa okhukhola omundu mulala okhuba omuloondi wenywe. Ne olwa muba nimumukholile okhuba omuloondi wenywe, mumukhola akhandi khabili okhuba oukhoyile okhutsia mumulilo kulasimanga ta okhushila kata inywe beene.

¹⁶“Muli mushilaamo shiobubi inywe abemilisi ababofu! Mwechesinjia mbu, ‘Omundu niyakhetsuba khulwa Ihekalu, eshitsuboshie eshio neshiabutswa, nebutswa niyetsuba khulwa itsahabu ya muhekalu, okhuula aliinde eshitsubo eshio.’

¹⁷Inywe ababofu abayingwa! Eshishila eshindi nishilena? Itsahabu noho Ihekalu, eyikholanga itsahabu okhuba indakatifu?

¹⁸Khandi mwechesinjia mbu, ‘Omundu niyakhetsuba khushimalilo shiemisango, eshitsuboshie eshio neshia butswa, nebutswa niyetsuba khulwa eshihaanwa eshili khushimalilo shiemisango, okhuula aliinde eshitsubo eshio.’

¹⁹Muli ababofu murie! Nishiina khubino eshishila eshindi, eshihaanwa noho eshimalilo shiemisango, eshikholanga eshihaanwa eshio okhuba eshitakatifu?

²⁰Kho owitsuba narumbula eshimalilo shiemisango, yetsubanga khushio khandi khubihaanwa biosi ebilikhwo.

²¹Naye owitsuba narumbula Ihekalu, yetsubanga khuyo nende khu Nyasaye oumenyangamwo.

²²Ne owitsuba narumbula mwikulu, yetsubanga khushifumbi shia Nyasaye nende khumwene oyo owikhalangakhwo.

²³“Muli mushilaamo shiobubi inywe, abahandichi bamalako nende Abafarisayo! Inywe abekaati! Muhaanilanga Nyasaye eshitonye eshielikhumi shiamasafu keshiuya shieshing'ari ebilangwa mbu eminana, ebinzari, nende chiira, nebutswa mulechelesnjia amechesio amakhulundu akamalako mbu, obwatoto, tsimbabasi nende obwisiikwa. Mukhoyile okhukhola ako, nebutswa mulalechelesia akandi tawe.

²⁴Inywe abemilisi ababofu! Munyakhananga okhurusia eshindu eshituutu shinga isi mubiokhunywa bienywe, ne nimumila eshindu eshikhongo shinga ingamia nimulashiluutsi tawe.

²⁵“Muli mushilaamo shiobubi inywe abahandichi bamalako nende Abafarisayo! Inywe abekaati! Mwosinjia eshikombe nende isahani khwikulu khwabio butswa, ne mukari mwabio mwitsuulemwo ebia munuulile khulwobulaangu!

²⁶Iwe Omufarisayo omubofu! Ranjilila wosie eshikombe mukari mwashio kho shibe eshilafu kata elwanyi washio!

²⁷“Muli mushilaamo shiobubi inywe abahandichi abamalako nende Abafarisayo! Inywe abekaati! Muli shinga ebilindwa ebibashilwe olufuyo, ebilolekha nibili ebilayi elwanyi wabio, ne mukari bitsuulemwo amakumba kemilambo echibolanga.

²⁸Munjila ndala eyo, elwanyi mulolekhanga abalayi khubuli mundu, nebutswa mukari mwenywe, mwetsulamwo obwikaati nende obwonooni.

²⁹“Muli mushilaamo shiobubi inywe abahandichi bamalako nende Abafarisayo! Inywe abekaati! Muloonganga ebilindwa ebiabalakusi obulayi mana mukaasia ebilindwa biabandu abalunjishi,

³⁰nimwiyitsiala mbu, muba nimwamenya mutsinyanga tsiabakuuka benywe, shimwakhakholile akabakhola nende okhwira abalakusi tawe.

³¹Khulweshio, mufuchililanga mbu muli abolwibulo lwabenabo abeera abalakusi!

³²Tsiililile mana mumalilisie akabakuuka benywe bachaachisia.

³³Inywe abali shinga tsinzokha khandi abetsukhulu betsinzokha! Shimunyala okhwihonokokha okhurula khushinyasio shiomumulilo okulasimanga tawe.

³⁴Kho emuboolela toto mbu, ndalamurumila abalakusi, abandu abachesi nende abeechesia. Abandi khubo mulabeera, ne nimubamba abandi, nabandi nabo nimubakhupa netsikhoba mu tsisinagogi, nimubaloonda okhurula mwitaala okhutsia mulindi.

³⁵Kho eshinyasio eshia abo abeerwa boosi nibabula eshikha shilaba khwinywe, okhurula khukhwiirwa khwa Abeli owali nabula eshikha, okhuula khukhwiirwa khwa Zakaria omwana wa Barakia, owa mwerera hakari wa Ihekalu nende eshimalilo shiemisango.

³⁶Emuboolela toto mbu; eshinyasio eshiabandu berwa abo boosi, shilaba khubolwibulo lwabulano luno.

³⁷“Oo, abandu ba Yerusalemu! Oo, abandu ba Yerusalemu! Inywe mwiranga abalakusi nimulasa namachina abarumwa ba Nyasaye amurumilanga. Akhandi akhanji ndikombanga okhukhung'asia abaana benywe shinga olwa ingokho inyafusi yikhung'asinjia ebiminywi biayo mumbaha tsiayo, nebutswa shimufuchililanga tawe!

³⁸Khulweshio Ihekalu yenywe yakhakwisibwe likunda.

³⁹Khulweshio okhurula bulano emuboolela mbu, shimwakhandolekhwo khandi ta, okhuula olwa mwakhaboole muri, ‘Noweikhabi owitsa muliira lia Omwami.’ ”