Read wanga MATAYO 24 Bible Online

MATAYO 24 - wanga bible

MATAYO 24

¹Yesu yarula muhekalu, ne olwa yali natsitsanga, abeechibe nibetsa ewa yali nibamumanyia amombakho aka Ihekalu.

²Naye nabakalusia ari; “Toto mulolanga amombakho kano koosi? Emuboolela toto mbu, shililatong'akhwoho kata lichina elala nilili khulindi tawe, koosi kalakwisibwa hasi.”

³Olwa Yesu yali niyekhaale khushikulu shia Miseituni, Abeechi betsa khuye mabiswi nibamureeba bari, “Khuboolelekhwo mbu, ako kakhekholeshe liina? Ne neshilolelo shiina eshiakhamanyie okhwitsakhwo nende okhuula khweshihesi shiolwibulo luno?”

⁴Mana Yesu nabakalusia naboola ari, “Mube meeso, omundu aleshe okhumukoyasiakhwo tawe.

⁵Okhuba abandu abanji bakhetse muliira lianje nibaboola bari, ‘Nisie Kristo,’ ne bakhakoyasie abandu abanji.

⁶Ne olwa mwakhahulile kamahe, nende kamahe nikarumbulwa buli habundu, shimulahendakhwo tawe, okhuba ako kakhoyile okhwikholekha, nebutswa shikamanyisinjia mbu kho eshihesi shiulile tawe.

⁷Amahanga kalakhupana akeene khukeen, khandi oburuchi bulaseerana obwene khubwene. Inzala nende okhurenga khweshialo bilaba buli habundu.

⁸Ebindu ebio biosi bili shinga okhuchaaka khwomukhasi okhulumwa inzibula.

⁹“Nabo abandu balamutiila inywe nibamuyila mukhusandibwa ne nibamwiira. Abamahanga kandi boosi balamusila khulwa isie.

¹⁰Abanji balalekha okhusuubilila isie, ne nibakhobana nende okhusilana abeene khu beene.

¹¹Khandi abalakusi bobubeeyi abanji balabuushilamwo nibakoyasia abandu abanji.

¹²Ne khulwa okhumeetekha okhwobumayanu, obuheeli bwabanji bwakhatiitiye.

¹³Nebutswa oyo owakhefwile okhuula khushihesi yakhahonibwe.

¹⁴Habula eshihesi nishishili okhuula, Amakhuwa Amalayi aka Obwami bwa Nyasaye kano, kakhayaalwe mushialo shiosi, mbu kabe obuloli khubandu bamahanga boosi.

¹⁵“Mwakhalole ‘eshifwanani shieshisinyo,’ eshiomulakusi Danieli yaboolakhwo, nishilisinjisibwe habundu hatakatifu.” (Ousomanga amanyilisie eshisina shiamakhuwa kano).

¹⁶Leshe abali mushialo shia Yuda belushe nibatsia mubikulu.

¹⁷Ouli khushilama shieinzuye, aleshe okhwikha hasi okhuyinia ebindubie ebili munzuye tawe.

¹⁸Kata ouli mumukunda alakalukha ingo okhubukula inguboye tawe.

¹⁹Bali mushilaamo shiobubi, abakhasi abakhabe nibali tsinda nende abakhabe nibanuninjia abaana abatoro mutsinyanga etsio.

²⁰Musaaye Nyasaye mbu, ebise biokhwilukha okhwo bilabakhwoho munyanga tsiomunyiri noho khunyanga eya Isabato tawe.

²¹Shichila mutsinyanga etsio amatinyu kakhabeho, akashili okhubakhwoho okhurula khukhuchaaka khweshialo okhuula bulano ta, ne khandi shikakhabekhwoho inziayo tawe.

²²Ne tsinyanga etsio nitsiakhabeele mbu shitsiayembichitibwa ta, abulaho omundu kata mulala owakhahonokooshe ta. Nebutswa khulwa abalobole ba Nyasaye, tsinyanga etsio tsiakhembichitibwe.

²³“Kho omundu yesi yesi niyakhamuboolela inywe mbu, ‘Lola Kristo ali hano,’ kata mbu, ‘Ali halia,’ mulamusuubilila tawe.

²⁴Shichila Kristo bobubeeyi nende abalakusi bobubeeyi bakhetse, nibakhola akamakana amakhongo nende okhulolesia ebiamakana, khulwa okhukoyasia abandu abanji, kata nikaba nikanyalikha, mbu bakoyasie abahule ba Nyasaye.

²⁵Lole, isie ndikholeleele okhumuboolela inywe amakhuwa kano eshise nishishili okhuula.

²⁶“Kho nibaba nibamuboolela bari, ‘Lola, Kristo ngwoyo ali mushitsiimi,’ shimulatsiekhwoyo tawe, kata nibaba niboola bari, ‘Lole, ngwouno yebisile hano mubisika biomukari,’ mulasuubilile akababoola tawe.

²⁷Khulweshio, shinga lwoluhenu, luhenukhanga mumaleesi okhurula ebukwe nilulaandaala okhuula Mumbo, nolwa Omwana womundu yakhetse bwangu ario.

²⁸“Aha eshindu shifwile shili, niho aha tsingosia tsikhung'aanilanga.

²⁹“Olunyuma butswa lwamanyakhano komutsinyanga etsio, eshialo shiakhelime ti, ne omwesi shikwakhaashekhwo ta, natsio tsing'ining'ini tsiakhakwe okhurula mwikulu, nabwo obunyali bwomwikulu bwakhatechesibwe.

³⁰Mana eshilolelo eshia Omwana womundu shiakhaloleshe hekulu, natsio tsimbia tsiosi tsiabomushialo tsiakhakwe, ne bakhalole Omwana womundu niyetsela mumaleesi komwikulu, mubunyali nende muluyali olukhongo.

³¹Mana olwika lwamayoosi amakhongo lwakhakhupwe, naye naruma abamalaikabe mutsimbeka tsine tsieshialo, ne bakhakhung'asie abalobole ba Nyasaye okhurula mutsimbeka tsiosi tsieshialo.

³²“Kho bulano mweche elieko okhurula khumusaala kwomukhuyu mbu, olwa amasaka kakwo kachakanga butswa okhuhalulukha amasafu nikarulakhwo, nikumanyia mbu, tsinyanga tsieshimiyu tsiulanga.

³³Kho mwesi olwa mwakhalole ako koosi nikekholekha, nolwa mwakhamanye mbu Kristo ali hambi okhwitsa.

³⁴Emuboolela toto mbu, olwibulo luno shilwakharuleho tawe, okhuula olwa ako koosi kakhabe nikamalile okhwikholekha.

³⁵Likulu nende eshialo biakharuleho, nebutswa Amakhuwa kanje shikakharuleho tawe okhuula inziayo.

³⁶“Nebutswa abulaho omundu yesi yesi oumanyile mbu, inyanga yene kata isaa yakhoole liina tawe. Kata abamalaika bomwikulu noho Omwana, shibamanyile ta, habula Papa yenyene niye oumanyile.

³⁷Okhwitsa okhwa Omwana womundu khwakhabe shinga akekholekha tsinyanga tsia Noa.

³⁸Shichila mutsinyanga etsio, omuyembo kweifula nikushili okwitsa, abandu balia nende okhunywa. Ne abasaatsa nabakhasi nibateshiania okhuula khunyanga ya Noa yenjililakhwo muliaro yene.

³⁹Ne shibamanyilisia akali nikekholekhanga ta, okhuula lwomuyembo kwetsa nikubamulula boosi pe. Nolwa kakhabe olwa Omwana womundu yakhetse.

⁴⁰Ebise ebio, abandu babili baliba nibali mumukunda, mulala yakhabukulwe ne oundi yakhalekhwe.

⁴¹Abakhasi babili bakhabe nibasietsanga khuluchina. Mulala yakhabukulwe ne oundi yakhalekhwe.

⁴²“Khulweshio, mube meeso, okhuba shimumanyile inyanga eya Omwami wenywe yakhakalushe tawe.

⁴³Nebutswa mumanye mbu, mwenengo naba niyakhamanyile eshise shiomwifi yetselamwo mushilo, yakhabeele meeso ne shiyqakhafuchilile inzuye okhufunakwa tawe.

⁴⁴Khulweshio mwesi okhuula mwirecheshe, okhuba Omwana womundu yetsanga khushise shia mulamanyile tawe.

⁴⁵“Mana Yesu natsiililila okhuboola ari, ‘Kho niwiina ouli omukholi omwisiikwa khandi omuchesi? Nomwenoyo owa Omwami yemekha okhusinjilila abobwitaalalie mbu, abahelesinjie eshiokhulia mubise ebikhoyeele.’

⁴⁶Noweikhabi omukholi oyo, owomwamiwe achelela ingo nanyoola nakholanga shinga olwa alachilwa.

⁴⁷Emuboolela toto mbu, alamwemekha okhusinjilila emianduchie chiosi.

⁴⁸Nebutswa oubula obwisiikwa oyo, aboola mumwoyokwe butswa ari, ‘Omwami wanje ashiindile okhuchelela,’

⁴⁹ne achaaka okhukhupa abakhalabani bashie, nalia, nende okhunywa nabameesi.

⁵⁰Olunyuma omwami womukhalabani oyo yakhachelele khunyanga yomukhalabani oyo alamanyilekhwo, kata khushise eshilamanyiishe tawe.

⁵¹Omwamiwe oyo yakhamuhelesie eshinyasio, ne namura mushisango shilala nende abekaati. Ebweneyo yakhalile nende okhulumasia ameenoke.”