Read wanga MATAYO 25 Bible Online

MATAYO 25 - wanga bible

MATAYO 25

¹“Ebise ebio Obwami bwa Nyasaye bwakhachelaasibwe nende abakhaana abashisila ekhumi, ababukula tsitaha ne nibatsia okhwakaanila omwene shiselelo.

²Barano khubo bali abayingwa, ne barano bandi bali abachesi.

³Okhuba olwa abakhaana abayingwa babukula tsitaha tsiabwe, shibabukulakhwo amafura kandi tawe.

⁴Ne abachesi abo nabo nibabukula amafura kandi mubimuka halala nende tsitaha tsiabwe.

⁵Ne lwomwene shiselelo yashinda okhwitsa, boosi ekhumi barenjetsa nibakona tsindoolo.

⁶“Ne mushilo hakari bachaaka okhuhulila olukhu mbu, ‘Lole, omwene shiselelo ngwoyo yetsanga! Rule elwanyi mwitse mumwakanile.’

⁷Mana abakhaana abo boosi nibabuukha, nibarechekha tsitaha tsiabwe.

⁸Kho abayingwa abo nibaboolela abachesi bari, ‘Mukhuhekhwo amafura kenywe, shichila tsitaha tsiefwe tsisimanga.’

⁹Nebutswa abachesi abo nibabakalusia bari, ‘Haundi shikalakhuhela ifwe nende inywe tawe. Khulweshio nobulayi inywe abeene mutsie mwikule amafura kenywe.’

¹⁰Kho olwa abakhaana abayingwa abo bali nibashitsiile okhukula amafura, omwene shiselelo yoola. Ne abakhaana barano abali niberecheshe, nibenjila ninaye mwisabo lieshiselelo, ne omuliango nikwikalwaho.

¹¹“Olunyuma, abakhaana abayingwa abo bosi niboola. Nibalanjilisia bari, ‘Omwami, omwami, khwikulileho omuliango!’

¹²Naye omwene shiselelo nabakalusia naboola mbu, toto mwene emuboolela mbu, isie shiemumanyile ta.”

¹³Mana Yesu namalilisia naboola ari, “Mube meeso, shichila shimumanyile inyanga kata isaa tawe.”

¹⁴“Mubise ebio, Obwami bwa Nyasaye bwakhachelaasibwe nende omundu owali nali okhutsia muluchendo lwehale. Ne nalanga abakhalabanibe, nabalaka okhusinjilila emianduchie.

¹⁵Nahelesia buli mulala okhulondana nende obunyalibwe bwokhubilinda. Owambeli yamuhelesia tsitalanda[9] tsirano, owakhabili namuhelesia tsitalanda tsibili, ne owakhataru namuhelesia italanda ndala. Mana omundu oyo narula natsia khuluchendolwe.

¹⁶Omukhalabani owali nanyoolile tsitalanda tsirano yatsia natsikholela inganga, ne nanyoola tsitalanda tsindi tsirano.

¹⁷Munjila ndala eyo, omukhalabani owali nanyoolile tsitalanda tsibili, yakhola inganga ne nanyoola tsitalanda tsindi tsibili.

¹⁸Ne omukhalabani owali nanyoolile italanda ndala oyo, yatsia nayabila hasi amapesa aka omwamiwe.

¹⁹“Olunyuma lwetsinyanga tsinyinji, omwami wabwe oyo yachelela nabasia ninabo emianduchie.

²⁰Omukhalabani owali niyahebwa tsitalanda tsirano oyo, niyetsa netsindi tsirano naboola ari, ‘Omwami, wambelesia tsitalanda tsirano, lola enyoolile inganga yetsitalanda tsindi tsirano.’

²¹Omwamiwe namuboolela ari, ‘Okholile obulayi, oli omukhalabani omulayi khandi omwisiikwa. Obeele omwisiikwa khubindu ebituutu, khweshio ndalakhwemekha okhusinjilila ebindu ebinji, winjile mubusangaali bwomwamiwo.’

²²“Omukhalabani owali niyahebwa tsitalanda owali niyahebwa tsitalanda tsibili niyetsa naboola mbu, ‘Omwami, wambelesia tsitalanda tsibili, lola enyoolile inganga yetsindi tsibili.’

²³Omwamiwe namuboolela ari, ‘Okholile obulayi, oli omukhalabani omulayi khandi omwisiikwa; obeele omwisiikwa khubindu ebituutu, ndalakhwemekha okhusinjilila ebindu ebinji. Winjile mubusangaali bwomwamiwo.’

²⁴“Kho omukhalabani owali niyahebwa italanda ndala niyetsa, naboola ari, ‘Omwami, ndakhumanya shinga lwoli omundu omutinyu, ouchesanga aha walaraaka ta, oubunjelesinjia aha walamiitsa ta.

²⁵Ndaria mana ninzia okhubisa italandayo mwiloba. Lola! Italandayo njieyino.’

²⁶“Kho omwamiwe namukalusia ari, ‘Iwe omukhalabani omumayanu khandi omutofu! Wamanya mbu enjesanga aha ndalaaraaka ta, nimbunjelesia aha ndalalamiitsa tawe.

²⁷Wali nokhoyile okhukholela italanda yanje inganga, ne mukhuchelela khwanje ndakhanyoolile italanda yanje nende injelesio yayo.

²⁸Khulweshio, mumunuule italanda eyo, ne muhelesie ouli netsitalanda ekhumi oyo.

²⁹Okhuba buli mundu ouli nende ebindu alameetwa ebindi, ne alaba ninabio ebinji, nebutswa oyo oubula eshindu, kata shitiiti eshiali ninashio alanuulwa.’

³⁰Ne omukhalabani omukhaya uno mumusukune elwanyi mushiilima, ewa abandu balalila nibalumasia ameeno.”

³¹“Olwa Omwana womundu yakhetse muluyalilwe halala nende abamalaika boosi, yakhekhale khushifumbishie shioburuchi shioluyali.

³²Ne abandu bamahanga koosi bakhakhung'asibwe imbeliwe, ne yakhabakabulemwo emikanda chibili, shinga omwayi yahukhasinjia amakondi nende tsimbusi.

³³Yakhare abandu abalunjishi khumukhonokwe musaatsa, ne abamayanu khumukhonokwe mukhasi.

³⁴Mana Omuruchi yakhaboolele abali khumukhonokwe musaatsa ari, ‘Mwitse, inywe abahebwa tsikhabi nende Papa wanje, munyoole obulaame obwa Obwami bwamwarecheshelwa okhurula khukhulongwa khweshialo.

³⁵Shichila ndali inzala nimumbelesia eshiokhulia, ndali nobuloho nimumbelesia eshiokhunywa, ndali omucheni nimunzinjisia mutsinzu tsienywe,

³⁶ndali eshiechenye nimuufwala ebifwalo, ndali omulwale nimwitsa okhungoonya, khandi ndali mumbohe nimwitsa okhundolayo.’

³⁷“Mana abalunjishi abo bakhamukalusie nibamureeba bari, ‘Omwami, niliina olwa khwakhulola noli inzala nikhukhuhelesia eshiokhulia, kata noli nobuloho nikhukhuhelesia eshiokhunywa?

³⁸Khandi niliina olwa khwakhulola noli omucheni nikhukhwinjisia mutsinzu tsiefwe, kata noli eshiechenye nikhukhufwala ebifwalo?

³⁹Khandi niliina olwa khwakhulola noli omulwale nende noli mumbohe nikhwitsa okhukhukoonyayo?’

⁴⁰Mana Omuruchi yakhabakalusie ari, ‘Emuboolela toto mbu, shinga olwa mwakholelanga mulala khubatuutu abokhubaana befwe bano, nolwa mwakholelanga isie.’

⁴¹“Olunyuma yakhaboolele abamayanu abali khumukhonokwe mukhasi ari, ‘Muurulekhwo, inywe abali mushilaamo shiobubi, muwinjuile mumulilo okulasimanga ta, okwakasilibwa Setani nende abamalaikabe.

⁴²Shichila ndali inzala, nimulambelesiakhwo eshiokhulia ta, ndali nobuloho, nimulambelesiakhwo eshiokhunywa ta,

⁴³ndali omucheni, nimulanzinjisiakhwo mutsinzu tsienywe ta, ndali eshiechenye, nimulafwalakhwo eshiifwalo ta, ndalwala khandinemba mumbohe, ne nimuletsa okhungoonyakhwoyo tawe.’ ”

⁴⁴“Nabo bakhamukalusie bari, ‘Omwami, niliina olwa khwakhulola noli inzala, noli nobuloho, kata noli omucheni noho nli eshiechenye, nohomba nolwala, kata mumbohe, ne nikhukhaya okhukhukhalabanila?’

⁴⁵Omuruchi naye yakhabakalusie ari, ‘Emuboolela toto mbu, shinga olwa mulaakholela mulala khubatutu bano ta, nolwa mwachweya okhukholela isie murio.’

⁴⁶Mana abamayanu abo bakhayilwe mushinyasio eshieinziayo, nabo abalunjishi nibayilwa obulamu bweinziayo.”