Read wanga MATAYO 26 Bible Online

MATAYO 26 - wanga bible

MATAYO 26

¹Ne olwa Yesu yali namalile okhwechesia amakhuwa ako koosi, yaboolela abeechibe ari,

²“Shinga olwa mumanyile, olunyuma lwetsinyanga tsibili, lisabo lia Pasaka litsiokhubaho, ne Omwana womundu alahaanwa mbu abambwe.”

³Kho abesaaliisi abakhulundu nende abakhulundu bandi nibakhung'anila halwanyi wa Kayafa, omwisaaliisi omukhulundu.

⁴Nibasanjilana halala nibatuta shinga olwa banyala okhutiila Yesu mabiswi, nende okhumwiira.

⁵Habula baboola bari, “Shikhulakholakhwo amakhuwa kano munyanga tsielisabo ta, shichila indiri inyala okhubuukha mubandu.”

⁶Ne olwa Yesu yali Betsania, munzu mwa Simoni omundu wobuchele, Yesu niyekhaale nalitsanga,

⁷omukhasi undi yetsa khuye nali nende eshimuka shiamafura keshing'ari khandi akobukusi obweikulu muno, natsukhulula amafura ako khumurwe kwa Yesu.

⁸Nebutswa olwa abeechi balola bario basinyikha, nibareeba bari, “Mbushiina nikasasibwa butswa kario?

⁹Shichila amafura kano kakhakusiibwe obukusi bweikulu, mana amapesa ako kahebwa abatakha!”

¹⁰Nebutswa Yesu yali namanyile akabali nibaboolanga, kho nababoolela ari, “Munyasinjia omukhasi uno mbushiina? Okhuba yakholeele isie likhuwa lilayi khandi eliolukoosi.

¹¹Inywe buli lwosi muli nende abatakha, nebutswa shimulabetsanga ninasi tsinyanga tsiosi tawe.

¹²Omukhasi uno atsukhuluule amafura kano khumubili kwanje, khulwokhurechekha omubili kwanje okhuyabilwa.

¹³Emuboolela toto mbu, hosi hosi aha amakhuwa amalayi aka Nyasaye kano kakhayaalwe mushialo, amakhuwa komukhasi uno akholile okhuula kakharumbulwe khulwa okhumwitsulila ye.”

¹⁴Kho mulala khubeechi ekhumi nababili owalangwa mbu; Yuda Isikarioti, yatsiila abesaaliisi abakhulundu,

¹⁵nabareeba ari, “Nishiina eshiamulambelesia nemba nehaana Yesu khwinywe?” Kho nibabala ebitonye bieifetsa amakhumi kataru nibamuhelesia.

¹⁶Ne okhurula ebise ebio, Yuda yachaaka okhukhaaba obwiyangu obulayi bwokhukhobelamwo Yesu.

¹⁷Khunyanga yambeli yelisabo liemikaate chibulamwo limela, abeechi abo betsa khu Yesu nibamureeba bari, “Nihena aha wenya mbu khukhurecheshele eshiokhulia shielisabo lia Pasaka?”

¹⁸Naye nabakalusia ari, “Tsie mwitookho, mulanyoolayo omundu mana mumuboolele muri, ‘Omwechesia aboolanga mbu, ebise bianje bili ahambi okhuula, ne isie nende abeechi banje khulaliila lisabo lia Pasaka munzumwo.’ ”

¹⁹Mana abeechi nibakhola shinga olwa Yesu yali nabalachilisiye, ne nibarechekha lisabo lia Pasaka.

²⁰Olwa obwile bwola, Yesu nende abeechibe ekhumi nababili bekhala khulwokhulia.

²¹Ne olwa bali nibaliitsanga, Yesu naboola ari, “Emuboolela toto mbu, mulala khwinywe niye oulaakhoba isie.”

²²Abeechibe nibabeelela muno, ne buli mulala nachaaka okhumureeba ari, “Omwami, ndakhaba nendi isie noho?”

²³Yesu nabakalusia ari, “Oyo outonganga omukaate mushikaye shilala ninasi niye oulaakhoba isie.

²⁴Omwana womundu alafwa shinga olwa Amahandiko amatakatifu kaboola, nebutswa ali mushilaamo shiobubi omundu oukhoba Omwana womundu! Bwakhabeele obulayi omundu oyo naba niyalakhebuulwe tawe!”

²⁵Yuda, owakhoba Yesu nachinguula omwoyo nareeba ari, “Omwechesia, nisie owoboolangakhwo noho?” Naye Yesu nakalusia naboola ari, “Lwokhali Omwene niwe ouboolile.”

²⁶Ne olwa bali nibaliitsanga, Yesu yabukula omukaate, nakhupila Nyasaye orio, nakusonyola, ne nahelesia abeechibe. Nababoolela ari, “Bukule, mulie. Kuno nikwo omubili kwanje.”

²⁷Khandi nabukula eshikombe shieidivai, nakhupa orio khu Nyasaye, nabahelesia. Nababoolela ari, “Bukule munywekhwo mwesi.

²⁸Kano namabanga kanje, akokhutinyisia indakano ya Nyasaye yakhola nende abandube, akasundukha kho mbu abandu abanji baleshelwe obwonooni.

²⁹Emuboolela toto mbu, shindalanywakhwo khandi idivai yino tawe, okhuula khunyanga eya ndakhanywe ninenywe idivai yimbia mubwami bwa Papa wanje.”

³⁰Kho nibemba olwimbo ne nibarula nibatsia khushikulu shia Miseituni.

³¹Mana Yesu nababoolela ari, “Inywe mwesi eshilo shino mulanzilukha nimundekha, okhuba Amahandiko amatakatifu kaboola mbu, ‘Nyasaye alakhupa omwayi, ne amakondi komwitulilie kalasalaasibwa.’

³²Ne olunyuma lwokhulamusibwa khwanje, neranjilile okhutsia Galilaya inywe nimushili.”

³³Naye Petero namukalusia ari, “Kata abandi boosi nibaba nibelukha nibakhulekha, isie shindalakhulekha tawe.”

³⁴Yesu naboolela Petero ari, “Ekhuboolela toto mbu, eshilo shino itaywa niyilashialakula ta, olanzikaana akhandi khataru.”

³⁵Petero namukalusia naboola ari, “Kata nikakhaba mbu okhuula isie efwe ninawe, shiyala okhukhwikaana kata nahatuutu tawe.” Khandi abeechi bandi abo boosi nibaboola bario.

³⁶Mana Yesu natsia nende abeechibe habundu ahalangwa mbu Getsisemane, ne nababoolela ari, “Mutong'e hano nasi neshitsiakhwo halia okhusaaya.”

³⁷Kho nabukula Petero nende abasiani ba Zebedayo babili abo, nachaaka okhubeelela nende okhunyakhana mumwoyo.

³⁸Mana nababoolela ari, “Omwoyo kwanje kuli neshibeela eshinji, kata shinyala okhunzira. Mutong'e hano ne mube meeso.”

³⁹Natsiakhwo hambeli hatiiti, nakwa hasi mafumama ne nasaaya naboola ari, “Papa wanje, nikaba nikanyalikha, rusiakhwo eshikombe shiamanyakhano shino! Nebutswa kalaba aka isie enzenya ta, habula aka iwe wenya.”

⁴⁰Mana nakalukha aha abeechi bataru abo bali, ne nanyoola nibali mundoolo. Naboolela Petero ari, “Kho shimunyala okhuba meeso ninasi kata khulwa isaa ndala yonyene ta?

⁴¹Mube meeso nimusaaya kho mbu, muleshe okhukwa mukhuteemwa. Toto omwoyo kwenyanga, nebutswa omubili nomutofu.”

⁴²Khandi Yesu yatsia nasaaya olwakhabili, naboola ari, “Papa wanje, nikakhaba mbu eshikombe eshiamanyakhano shino shishinyala okhurusibwaho nindalashinywelekhwo ta, lekha akawenya kekhole.”

⁴³Ne khandi niyetsa nanyoola abeechibe nibali mundoolo, shichila bali nibashili netsindoolo tsinyinji.

⁴⁴Mana nabalekha natsia nasaaya olwa khataru naboola amakhuwa malala kene ako.

⁴⁵Mana niyetsa ahabeechi abo bali, nababoolela ari, “Khandi mushikonanga butswa nimuhuluukha? Lole! Eshise shiulile bulano eshia Omwana womundu akhobilwe mubunyali bwabonooni.

⁴⁶Buushe, chende khutsie. Lole, omukhobi wanje ali ahambi okhuula.”

⁴⁷Ne olwa Yesu yali nashiboolanga, Yuda mulala khubeechi ekhumi nababili, niyetsa nende omukanda omukhongo, nibali nende tsinganga nende ebikong'o, nibarumilwe nabakhulundu ababesaaliisi nende abakofu.

⁴⁸Ne owamukhoba yali nabamanyiye eshilolelo naboola ari, “Owanefumbeelele niye owatsana oyo, mumutiile.”

⁴⁹Yuda natsia shilunji khu Yesu namuboolela ari, “Omulembe kube khwiwe Omwechesia,” ne namufumbeelela.

⁵⁰Yesu nakalusia ari, “Owashianje, khola elia witsile okhukhola.” Mana nibetsa nibakwa khu Yesu nibamutiila.

⁵¹Mulala khubali nende Yesu natsomola olukangalwe, narema omusumba owomwisaaliisi omukhulundu, nakhalaka eshirwishie.

⁵²Yesu namuboolela ari, “Kalusia olukangalwo ahalubetsanga. Boosi abekhoonyelanga olukanga okhwira, baleerwa nolukanga.

⁵³Shimumanyilekhwo mbu enyala okhusaaya obukhoonyi okhurula khu Papa wanje, ne habwene nahabwene niyarumila emikanda chiabelihe ekhumi nachibili, echia abamalaika abanji ta?

⁵⁴Kho nikaba kario Amahandiko kakhahesibwa karie, akaboolanga mbu, ‘Kano kakhoyile okhwikholekha?’ ”

⁵⁵Habwenaho Yesu naboolela abemikanda abo ari, “Murulile nende tsinganga nende ebikong'o okhundiila shinga abatiila omunuuli? Buli nyanga ndekhalanga nimwechesia muhekalu neshimwayandiila ta.

⁵⁶Ne kano koosi kekholeeshe mbu akabalakusi baboola mu Amahandiko kosibwe.” Mana abeechibe boosi nibelukha nibamulekha.

⁵⁷Mana abali nibatiilile Yesu bamuyila ewa Kayafa, omwisaaliisi Omukhulundu, ewa abeechesia bamalako nende abakofu bali nibakhung'anile.

⁵⁸Ne Petero yamulondangakhwo inyuma ehale okhuula mulwanyi lwomwisaaliisi omukhulundu. Niyenjila mulwanyi niyekhala hasi nende abelihe okhulola shinga olwa nakabe mukhumalilikha.

⁵⁹Abesaaliisi abakhulundu nende abeshiina boosi bateema okhukhola obuloli bwobubeeyi khu Yesu kho mbu bamwire.

⁶⁰Ne shibanyalilwa okhunyoola obukobosheli bwosi ta, kata olwa abanji berusia nibaboola akobubeeyi khuye. Ne olunyuma, babili berusia

⁶¹nibaboola bari, “Omundu uno yaboola ari, ‘Enyala okhulikulula Ihekalu ya Nyasaye ne mutsinyanga tsitaru nechiumbakha khandi.’ ”

⁶²Mana omwisaaliisi omukhulundu nasinjila namureeba ari, “Shiolikhwo nelikalusio khukano ta? Ne likhuwa shiina liabandu bano bakhwinjililangakhwo.”

⁶³Naye Yesu naholeela butswa. Kho khandi omwisaaliisi omukhulundu namuboolela ari, “Ekhutsuuba muliira lia Nyasaye ouliho mwoyo mbu, okhuboolele noba noli niwe Kristo, Omwana wa Nyasaye.”

⁶⁴Yesu namukalusia ari, “Omwene lwokhaboolile. Ne emuboolela inywe mwesi mbu, Okhurula bulano mulalola Omwana womundu niyekhaale khumukhono musaatsa kwa Nyasaye, khandi niyetselanga khumumaleesi komwikulu!”

⁶⁵Mana olwa Omwisaaliisi omukhulundu yahulila amakhuwa ako, yarandula ebifwalobie, naboola ari, “Anyechile Nyasaye! Mbushiina nikhushienya abaloli bandi? Muhuliile bulano shinga olwa anyechile Nyasaye.

⁶⁶Mukhalaka murie?” Nibamukalusia bari, “Noweshikha, akhoyile okhufwa.”

⁶⁷Balala khubo bamufutsa amare mubweni, nibamukhupa, nabo abandi nibamupaama tsikhofi,

⁶⁸nibamuboolela bari, “Iwe Kristo! Khurumbulilekhwo mbu, oukhukhupile niwiina?”

⁶⁹Naye Petero yali niyekhaale elwanyi mulwanyi. Ne Omukhaana undi niyetsa ewa yali namuboolela ari, “Wesi obeele nende Yesu Omugalilaya.”

⁷⁰Nebutswa Petero yekaana imbeli wabwe boosi naboola ari, “Shiemanyile akoboolanga tawe.”

⁷¹Ne olwa yatsia hashiliibwa, Omukhaana undi namulola, naboolela abali nibasinjiileho ari, “Omusaatsa uno abeele halala nende Yesu Omunazareti.”

⁷²Khandi Petero niyekaana, nakalusia ari, “Nditsuba mbu shiemumanyilekhwo omundu oyo tawe!”

⁷³Ne olunyumakhwo, abali nibasinjiileho beetsa nibaboolela Petero bari, “Toto mwene, wesi oli mulala khubo, okhuba okhuboolakhwo khukhubulanga.”

⁷⁴Mana nachaaka okhwitsuba ari, “Shiemumanyile omundu oyo tawe.” Habwene nahabwene itaywa niyilakula.

⁷⁵Mana Petero niyetsulila aka Yesu yali namubooleele mbu, “Itaywa niyishili okhulakula naunzikaane akhandi khataru.” Narulaho natsia nalila obululu.