Read wanga MATAYO 27 Bible Online

MATAYO 27 - wanga bible

MATAYO 27

¹Kho olwa bwashia mumabwibwi abesaaliisi abakhulundu boosi nende abakofu ba Abayahudi nibamuhaana mbu yerwe.

²Nibamuboha mumakhono nibamuyila khu Pilato, owali nali omukafuna.

³Mana olwa Yuda, owali nakhobile Yesu yamanya mbu, Yesu akhalachiilwe eshiina eshiokhufwa, yabelela muno, mana nakalusia ebitonye biamapesa amakhumi kataru khubesaaliisi abakhulundu nende abakofu.

⁴Nababoolela mbu, “Enzonoonile okhukhoba omundu oubula eshikha mbu yerwe!” Nibamukalusia bari, “Ifwe nefu khuteeba shiina khukenako? Ako kali khwiwe omwene!”

⁵Mana Yuda nasukuna amapesa ako hasi muhekalu, ne narula natsia niyemika.

⁶Mana abesaaliisi abakhulundu abo nibatoola amapesa ako nibaboola bari, “Nomusilo okhukara mwibishilo liomuhekalu, shichila namapesa keshitsayi.”

⁷Kho nibarecheresania mbu, bakekhoonyele okhukula omukunda kwomundu omulonji, mbu kube okwokhuyabilangamwo abandu abarende.

⁸Niko akachila omukunda okwo nikulangwa mbu, “Omukunda kweshitsayi” okhuula olwa leelo.

⁹Kho akomulakusi Yeremia yaboola kosibwe mbu, “Babukula ebitonye biamapesa ebihela amakhumi kataru, obukusi bwabandu Abaisiraeli bali nibafuchilisania okhurunga khulwa ye,

¹⁰ne nibekhoonyela amapesa ako okhukula omukunda okwomulonji shinga OMWAMI Nyasaye yali niyandachilisia.”

¹¹Yesu yasinjila imbeli womukafuna Omuroma, mana omukafuna oyo namureeba ari, “Iwe niwe Omuruchi wa Abayahudi noho?” Yesu namukalusia, “Niwe ouboolile.”

¹²Ne shiyakalusiakhwo likhuwa khu akabesaaliisi abakhulundu nende khukabakofu bamwinjililakhwo itookho tawe.

¹³Mana Pilato namureeba ari, “Shiohulilanga aka bakhwinjililangakhwo itookho kano koosi ta?”

¹⁴Nebutswa Yesu shiyamukalusiakhwo likhuwa kata elala tawe, kho omukafuna oyo nahuka muno.

¹⁵Buli khwisabo liemikaate echibulamwo limela, omukafuna Omuroma yaleekhuulanga omubohe mulala womukanda kwabandu kuba nikwenyile.

¹⁶Ebise ebio, yaliho omubohe mulala owali niyamanyikha muno, owalangwa mbu Baraba.

¹⁷Kho olwa bali nibakhung'anile halala, Pilato nabareeba ari, “Niwiina awamwenya mbu emulekhuulile, Baraba, noho Yesu, oulangwa mbu Kristo?”

¹⁸Okhuba yali namanyile obulayi mbu, imbalikha niyo eyichilile Abayahudi nibahaana Yesu khuye mbu akhalachilwe okhufwa.

¹⁹Olwa Pilato yali nashikhale khushifumbi eshiobuyasi, omukhasiwe yarumasia likhuwa naboola ari, “Shiolakholakhwo omundu omulunjishi oyo likhuwa liosi libi ta, shichila enyakhaane muno khulwa omundu uno mumalooro eshilo.”

²⁰Ne abesaaliisi abakhulundu nende abakofu bakatilisia abomukanda mbu, basabe Pilato okhubalekhuulila Baraba, naye Yesu yerwe.

²¹Pilato nareeba abomukanda mbu, “Noulena khubabili bano owa mwenya mbu emulekhuulile?” Nibakalusia bari, “Baraba!”

²²Pilato nabareeba ari, “Kho emukhole endie Yesu, oulangwa mbu Kristo?” Boosi nibakalusia bari, “Abambwe khumusalaba!”

²³Pilato nabareeba ari, “Nelibi shiina eliakholile?” Ne nibameeta butswa okhuboola nomwoyo omukhongo mbu, “Abambwe!”

²⁴Olwa Pilato yalola mbu shianyala okhukhola eshindu shiosi shiosi ta, okhuba indiri yinyala okhubaho, yabukula amaatsi, nasaaba amakhonoke imbeli womukanda okwo naboola ari, “Shiendikhwo neshikha khushitsayi shiomundu omulunjishi uno tawe! Ako nakenywe abeene!”

²⁵Omukanda kwosi nikukalusia mbu, “Eshitsayishie shibe khwifwe nende khubaana befwe!”

²⁶Mana Pilato nabalekhuulila Baraba, nalaka mbu, Yesu anywekhwe, mana namuhaana mbu abambwe.

²⁷Mana abelihe ba Pilato, nibayila Yesu mulwanyi olukhongo lwomuruchi, mana omukanda kwabelihe kwosi nikumubotokhana.

²⁸Nibamufwalula tsingubotsie nibamufwala eshifwalo eshiaranzayi.

²⁹Mana nibakaasia olusimbi lwamahwa nibamufwala khumurwe, ne nibara indabushi mumukhonokwe omusaatsa. Kho nibasikama hasi imbeliwe, nibamutseshelela nibaboola bari, “Oyindile, iwe omuruchi wa Abayahudi!”

³⁰Nibamufutsakhwo amare, nibabukula indabushi eyo nibamunyweshela khumurwe.

³¹Ne olwa bali nibamalile okhumutseshelela bario, bamufwalula eshifwalo eshio, nibamufwala khandi tsingubotsie omwene, ne nibamuyila okhubambwa.

³²Ne olwa bali nibarulanga mulwanyi olwo, bakaana nende omundu wokhurula Kirene, oulangwa mbu Simoni; abelihe nibamulunyia okhuchinga omusalaba kwa Yesu.

³³Niboola habundu ahalangwa mbu, Goligotsa, eshisina mbu, “Habundu aheshihanganga.”

³⁴Habwenaho nibahelesia Yesu idivai eyitsokasibwemwo eshindu eshilulu; ne olwa yatsamilekhwo, yaloba okhuchinywa.

³⁵Olwa bali nibamubambile, bakabana ebifwalobie khulwa okhukhupa ikha.

³⁶Olunyuma lwako, bekhalaho okhumuhenhelesia.

³⁷Nibara lihandiko hekulu homurwekwe niliboola aka yenjililwekhwo itookho mbu, “Uno niye Yesu, Omuruchi wa Abayahudi.”

³⁸Mana nibabamba abanuuli babili halala nende Yesu, mulala khumukhonokwe musaatsa noundi khumukhonokwe mukhasi.

³⁹Abandu abali nibabirangaho nibaresia emirwe chiabwe nibanyeka Yesu.

⁴⁰Nibaboola bari, “Iwe ounyala okhulikulula Ihekalu nochiumbakha khandi mutsinyanga tsitaru, wihonie omwene! Noba noli Omwana wa Nyasaye, yikha hasi okhurula khumusalaba.”

⁴¹Munjila ndala eyo, abesaaliisi abakhulundu nende abeechesia bamalako nende abakofu bamutseshelela, nibaboola bari,

⁴²“Yahonia abandi, ne shianyala okhwihonia omwene ta! Shiali niye Omuruchi wa Abaisiraeli? Naba niyekha hasi okhurula khumusalaba, khuba khulamusuubila!

⁴³Yesikanga Nyasaye, naboola mbu, nomwana wa Nyasaye. Kho, lekha khulolekhwo Nyasaye naba namuhonia bulano!”

⁴⁴Kata abanuuli ababambwa halala ninaye abo, boosi khandi bamunyeka bario.

⁴⁵Okhurula khusaa yakhasasaba eshiteere okhuula khusaa yashienda, eshialo shiosi shielima.

⁴⁶Mana ahambi khuisaa yashienda eshiteere, Yesu yaboola nomwoyo omukhongo ari, “Eli, Eli, lama sabakitsani?” Eshisina mbu, “Nyasaye wanje, Nyasaye wanje, undeshile mbushiina?”

⁴⁷Balala khubandu abali nibasinjiileho bahulila, ne nibaboola bari, “Alanganga Eliya!”

⁴⁸Ne habwenaho mulala khubo natsia tsimbilo nabukula eshiangwe, niyenikha mudivai, nashira khulikata liolusi, namuha mbu anywe.

⁴⁹Ne abandi nibaboola bari, “Leshe khulole nikakhaba mbu, Eliya aletsa okhumuhonia!” [10]

⁵⁰Mana Yesu naboola khandi nomwoyo omukhongo, ne nakwisia omwoyo.

⁵¹Ne lola, ingubo yomuhekalu niyirandukhamwo ebitonye bibili, okhurula ikulu okhuula hasi. Eshialo nishirenga, tsinyanda nitsiatikha,

⁵²ebilindwa nibiikukha. Abandu ba Nyasaye abanji abali nibafwa nibalamusibwa.

⁵³Barula mubilindwa, ne olwa Yesu yali niyakhabuukha okhurula mubafu, abandu abo batsia mwitookho litakatifu, ewa abandu abanji babalola.

⁵⁴Olwa omwimilisi wabelihe halala nende abo abali ninaye, nibalindile Yesu, balola okhurenga khweshialo nende akandi koosi akekholekha, baria muno nibaboola bari, “Toto mwene uno abeele Omwana wa Nyasaye!”

⁵⁵Khandi baliho abakhasi abanji abali nibasinjiile ehale nibahenganga, ne nibo abali nibalondanenje nende Yesu okhurula Galilaya nibamukhalabanila.

⁵⁶Khubo, balimwo, Mariamu Magadalene, Mariamu nyinamwana Yakobo nende Yosefu, nende nyinamwana abasiani ba Zebedayo.

⁵⁷Olwa eshialo bwela, omusaatsa undi omuyinda owokhurula Arimatsaya, oweliira mbu Yosefu, owali khandi omwechi wa Yesu yetsa.

⁵⁸Natsia khu Pilato namusaba omubili kwa Yesu. Mana Pilato nalaka mbu, aheebwe.

⁵⁹Mana Yosefu nabukula omubili okwo nakubohela musanda indafu,

⁶⁰nakwalisia mung'ani yiyie omwene imbia, eya yali niyayaba mulwanda. Mana naselenjesia lichina likhongo nalira khumuliango kweing'ani eyo, ne niyenyokha.

⁶¹Mariamu Magadalene nende Mariamu undi baliho nibekhale nibahengane nende ing'ani.

⁶²Inyanga yalondakhwo eyali eya Isabato, abesaaliisi abakhulundu nende Abafarisayo bakhung'anila ewa Pilato,

⁶³nibaboola bari, “Omwami, khwitsulila mbu, omubeeyi oyo olwa yali nashili mwoyo yaboola ari, ‘Ndalalamusibwa olunyuma lwetsinyanga tsitaru.’

⁶⁴Kho laka mbu, ing'aniye yilindwe obutinyu okhuula khunyanga yakhataru, kho abeechibe baleshe okhwitsa okhwiba omubilikwe, mana baboolele abandu mbu, ‘Alamusibwe okhurula mubafu.’ Obubeeyi bwokhumalilikha buno, bwakhaba obubi muno okhushilakhwo obwambeli.”

⁶⁵Pilato nababoolela ari, “Muli nabalindi, tsie mulinde ing'ani eyo obutinyu shinga olwa munyala.”

⁶⁶Kho nibatsia nibalinda ing'ani eyo obutinyu, nibara khwichina elo eshibalikho mana nibalekhaho abelihe okhulinda.