Read wanga MATAYO 28 Bible Online

MATAYO 28 - wanga bible

MATAYO 28

¹Olwa Isabato yali niyihwele, nibushietsanga inyanga yambeli yomwihonga, Mariamu wa Magadalene nende Mariamu undi oyo, bakalukha okhulola ing'ani.

²Ne lola, eshialo shiarenga obutinyu, omumalaika wa Omwami niyekha okhurula Mwikulu, niyetsa naserenjesia lichina okhurulaho, ne naliikhalakhwo.

³Okhufwanakhwe khwali shinga oluhenu, natsio tsingubotsie nitsing'inang'ina shinga eliuba.

⁴Abelihe abo, nibatiilwa neindenga nibaba shinga abandu bafwile.

⁵Omumalaika naboolela abakhasi abo ari, “Mularie ta, shichila emanyile mbu mukhabanga Yesu, owabambilwe khumusalaba.

⁶Shiali hano ta, amalile okhulamukha shinga olwa yaboola. Yitse mulole aha babele nibamwalisiiye.

⁷Mana mutsie bwangu, muboolele abeechibe mbu, alamushe okhurula mubafu. Alamuranjilila okhutsia Galilaya, ne namumulolele ebweneyo. Isie, emalile okhumuboolela.”

⁸Mana nibarula bwangu hashilindwa nibali neindenga, nebutswa bali nokhwikhoya okhunji, nibatsia tsimbilo okhuboolela abeechibe.

⁹Ne lola, Yesu yabakanila nababoolela ari, “Omulembe kube ninenywe.” Nibatsia ahambi ninaye nibamukwa mumakuluke nibamwinamila.

¹⁰Mana Yesu nababoolela ari, “Mularie ta, tsie muboolele abaana befwe batsie Galilaya, ne balandola ebweneyo.”

¹¹Ne olwa abakhasi abo bali nibatsitsanga, balala khubelihe abali nibalindile ing'ani, bakalukha mwitookho nibaboolela abesaaliisi abakhulundu koosi akali nikekholeshe.

¹²Ne olwa abesaaliisi abakhulundu abo bali nibakaanile nende abakofu, nibarecheresaniye khu akabakhoyile okhukhola, bahelesia abelihe abo amapesa amanji.

¹³Mana nibaboolela abelihe abo bari, “Muboolele abandu muri, ‘Abeechibe betsile eshilo nibeeba omubilikwe nikhuli mundoolo.’

¹⁴Ne nikakhaba mbu, omukafuna alahulila ako, khulaboola ninaye afuchilile mbu, inywe mubula eshikha, kho shimulahenda omwoyo tawe.”

¹⁵Abelihe abo nibabukula amapesa ako, ne nibakhola shinga olwa bali nibabooleelwe. Mana amakhuwa ako katsiililila okhutsanibwa mu Abayahudi okhuula olwa leelo.

¹⁶Abeechi ekhumi namulala batsia khushikulu shia Galilaya, ewa Yesu yali nabalachilisiye okhutsia.

¹⁷Ne olwa bamulola, bamwinamila, nebutswa abandi khubo bakanakania mumioyo chiabwe.

¹⁸Yesu nasita ahambi khubo, ne nababoolela ari, “Nyasaye yambelesia obunyali bwosi mwikulu nende khushialo.

¹⁹Kho mutsie mukhole abandu boosi okhuba abalondi banje. Mubabatiisie muliira lia Papa, Omwana nende Roho Omutakatifu.

²⁰Khandi mubechesie okhulonda koosi akemulachilisia okhukhola. Nasi ndalabetsanga ninenywe buli lwosi, okhuula khushihesi shieshialo.”