Read wanga MATAYO 3 Bible Online

MATAYO 3 - wanga bible

MATAYO 3

¹Mutsinyanga etsio, Yohana Omubatiisi yetsa nachaaka okhuyaala mushitsiimi eshia Ebuyahudi naboola ari,

²“Mwikalukhasie okhurula mubwonooni bwenywe; okhuba Obwami bwa Nyasaye busitile ahambi.”

³Yohana uno niye owa omulakusi Isaya yaboolakhwo ari, “Omundu alanjilisinjia mushitsiimi, ari, ‘Mukaasie injila eya Omwami abirirakhwo; mukololosie emihanda echia achendelakhwo.’ ”

⁴Yohana yefwalanga eshifwalo eshiakaasibwa okhurula khubwoya bweingamia, niyeboha olukhoba lweliseelo mushishienje; ne ebiokhuliabie bialinji tsisiche nende obuushi bwomushitsiimi.

⁵Mana abandu ba Yerusalemu nende aba Ebuyahudi boosi nende kata abomumbali etsilondokhane nende omwalo kwa Yorodani nibarula nibamwitsila.

⁶Nibeyama obwonooni bwabwe, naye Yohana nababatiisia mumwalo kwa Yorodani.

⁷Ne olwa Yohana yalola Abafarisayo nende Abasadukayo nibetsanga khuye mbu ababatiisie, yabareeba ari, “Inywe olwibulo lwetsinzokha, niwiina owamuchetsiyiyie mbu muhonokoshe eshinyasio shioburuma bwa Nyasaye, eshili okhwitsa?

⁸Kho ebikhole bienywe bilolesie mbu toto mwikalukhasiye.

⁹Mulatsaliikha okhuboola mumioyo chienywe mbu, muli abolwibulo lwa Aburahamu tawe. Emuboolela toto mbu, Nyasaye anyala okhubuusilia Aburahamu olwibulo okhurula kata khumachina kano!

¹⁰Kata bulano Nyasaye amalile okhura ihaywa mubisina biemisaala; omusaala kwosi kwosi okulaama ebiamo ebilayi ta, kularemwa nikusukunwa mumulilo.

¹¹Isie emubatiisia namaatsi okhulolesia mbu mwikalukhasiye nimulekha obwonooni bwenywe. Nebutswa owitsa inyuma wanje alamubatiisia khulwa Roho Omutakatifu nende khulwa omulilo. Ye nowobunyali okhushila isie. Shingwanile kata okhumuchinjila ebilaarobie tawe.

¹²Ali nolutelu lwokhuseeselakhwo imele. Alakhung'asia inganoye yoosi nachibikha mushiachi, nebutswa, alasamba omukhutsi mumulilo okulanyala okhusimibwa tawe.”

¹³Mana Yesu narula Galilaya niyetsa mumwalo kwa Yorodani, ewa Yohana yali mbu abatiisibwe.

¹⁴Nebutswa Yohana yateema okhumukaya namureeba ari, “Isie ekhoyile okhubatiisibwa ninawe, nawe witsile orie khwisie mbu ekhubatiisie?”

¹⁵Naye Yesu namukalusia ari, “Fuchilila kabe kario bulano, shichila nikhwo okhuusia akokhwenya okhwa Nyasaye.” Kho Yohana nafuchilila okhumubatiisia.

¹⁶Ne habwena na habwene, olwa Yesu yali niyakhabatiisibwa, yarula mumaatsi, ne likulu nilimwikushila, naye nalola Roho wa Nyasaye niyekha shinga lihusi[1] niyetsa namuyelakhwo.

¹⁷Mana omwoyo nikuhulilikha okhurula mwikulu nikuboola kuri, “Uno niye omwana wanje omuheelwa, ounjamisinjia muno.”